Budapest 2021 – svimjing.com

Hevur Borodin uppfunnið ein nýggjan máta at svimja crawl?

18 ára gamli Ilya Borodin úr Russlandi varð evropameistari við nýggjum juniorheimsmeti í 400 blandað, tá ið EM á langgeil var í Budapest nú í mai. Og heldur áhugavert, so tað var við einum rættiliga serligum svimjistíli í crawl-partinum av greinini, har hann blandar uppí eitt slag av firvaldaspark tá ið hann andar.

Sí videoina niðanfyri.

Tað minnir um spark sum vit onkuntíð síggjast hjá nýbyrjarum, til at kunna halda sær uppi og á kós, tá ið tekniskar feilir annars fáa svimjaran at vilja søkka ella sleingjast. Men, Borodin er uppá ongar mátar nakar nýbyrjari, hóast sín unga aldur, og svimur týðiligvís skjótt eisini hóast hatta sparkið.

Hatta var EM 2021

Evropeiska meistarastevnan 2021 er nú liðugt avgreidd í Budapest, og hóparnir fara so smátt at finna sær leiðina heimaftur. Vit hava ikki enn frætt um nakran trupulleika við korona, út yvir at fýra kvinnuligir svimjarar máttu verða verandi heima í Turkalandi, tí at tær stutt áðrenn fráferð høvdu fingið staðfest korona.

Faroe SSF XXXV LEN European Aquatic Championships 2020 Duna Arena- Budapest – Hungary 20210522 Photo Giorgio Scala / Deepbluemedia / Insidefoto DBM/LEN Reserved Rights Author must be mentioned when published Editorial/media use only

Okkara egna Signhild Joensen kláraði seg eftir umstøðunum væl, har í meldrinum við ymiskum avbjóðingum eisini uppundir stevnuna, so sum hatta við at venjarin noyddist at melda avboð. Serliga íslendingar hava her verið hjálpsamir, og er tað væl hugsandi at tann succés’in verður endurtikin aftur onkra aðru ferð 🙂

Photo courtesy of Giorgio Scala / Deepbluemedia / Insidefoto

Finski Ari-Pekka Liukkonen EM-gull í 50 frí

Ari-Pekka Liukkonen megnaði í dag at vinna EM-gull í 50 metra frísvimjing á langgeil, sum fyrsti finni síðani Jere Hard tók gullið í 50 firvald á EM í Berlin í 2002. Har vóru nógv onnur spennandi úrslit eisini í kvøld, men er hetta kanska eitt sindur serligt fyri okkum norðurlendingar, at ein norðurlendskur maður er ‘við’ aftur.

Lesið samandráttin hjá evropeiska svimjisambandinum her á len.eu

Celebrating Gold Medal LIUKKONEN Ari-Pekka FIN 50m Freestyle Men Final Swimming Budapest – Hungary 23/5/2021 Duna Arena XXXV LEN European Aquatic Championships Photo Giorgio Scala / Deepbluemedia / Insidefoto

Photo courtesy of Deepbluemedia/Insidefoto

SSÍ samrøða við Signhild aftaná 200 rygg í Budapest

Ein samrøða við Signhild Joensen sum Hörður J. Oddfríðarson úr Sundsamband Íslands gjørdi, nú aftaná at hon hevði svomið sína triðju og síðstu grein á EM 2021 í Budapest, sum var 200 metra ryggsvimjing.

Benedetta Pilato 29.30 og nýtt heimsmet í 50 bringu

16 ára gamla Benedetta Pilato úr Italia setti í dag nýtt heimsmet í 50 metra bringusvimjing á langgeil, tá ið hon í hálvfinaluni á EM 2021 í Budapest svam hesa grein uppá 29.30 sekund, har amerikanska Lilly King átti heimsmetið á 29.40 sekund. Úrslitið er neyðturviliga eisini bæði evropeiskt met, stevnumet og juniormet bæði fyri evropearar og fyri allan heim, sum hon so kann royna at betra um eisini í finaluni í morgin. Sí úrslitalistan her

Photo courtesy of Deepbluemedia/Insidefoto

Signhild 2:18.50 í 200 rygg á EM 2021 í Budapest

Signhild Joensen royndi seg nú fyri løtu síðani í 200 metra ryggsvimjing Evropameistarastevnuni 2021 í Budapest, og varð har nummar 32 av 36 við tíðini 2:18.50. Hetta er besta tíð sum Signhild hevur svomið í hesi grein í ár, har hennara allarbesta tíð er føroyska metið á 2:14.01 frá Danish Open í 2017. Sí úrslitalistan her

Signhild og Rannvá á EM 2021 í Budapest.
Hörður J. Oddfríðarson eigur myndina

Hetta var triðja og síðsta grein hjá Signhild á hesum EM, undir heldur serligum umstøðum, vegna koronaavmarkingar og tað at hon eisini tí endaði við at verða einsamallur luttakari úr Føroyum. Nú kunnu tær báðar í Budapest njóta síðstu kappingar á hesi stevnum, áðrenn leiðin gongur norðureftir aftur mánadagin.

Kathleen Dawson vann (tíbetur) báðar EM-finalurnar í 100 rygg í kvøld

Evropeiska svimjisambandið LEN hevur nú lagt sín samandrátt út fyri dagin í dag, sum millum annað forklárar tað sum hendi í EM-finaluni fyri kvinnur í 100 metra ryggsvimjing. Trupulleikin var, at tekniskur trupulleikar vóru við starthátalararnar aftanfyri nakrar av skamlunum, sum gjørdu at í øllum førum svenska Louise Hansson ikki hoyrdi startin, og tí byrjaði væl seinni enn restin.

DAWSON Kathleen GBR Great Britain WOMEN – 100M BACKSTROKE Swimming Budapest – Hungary 21/5/2021 Duna Arena XXXV LEN European Aquatic Championships Photo Giorgio Perottino / Deepbluemedia / Insidefoto

Sviar klagaðu um hetta, og valdu LEN tá at ógilda hesa tá longu svomnu finalu, fyri at tær síðani skuldu royna aftur eina góða løtu aftaná síðstu kappingar í hesum finaluparti. Tær sóu allar eitt sindur muttar út, tá ið tey traðkaðu inn til hesa endurtøku av finaluni; men tíbetur endaði tað við at somu dámur vunnu gull og bronsu, meðan niðurlendska Kira Toussaint trakk nittuna og misti sítt silvurmerki.

Photo courtesy of Deepbluemedia/Insidefoto

Vinnarar á EM 2021 frá heilsanir frá familju á stórskíggja

Man kann ikki siga annað, enn at ungarar gera sítt til at gera hetta EM serligt, hóast at korona-avmarkingarnar til dømis ikki loyva vanligum áskoðarum at koma í høllina. Eitt er at har er flott pallseting við ljósi og ljóði og so framvegis; men hartil fáa nýggju evropameistararnir persónligar heilsanir frá familjulimum á stórskíggja, beint sum teir hava vunnið og koma upp úr hylinum, sum týðiligvís ávirkar bæði kvinnur og menn.

Mykhaylo Romanchuk (UKR) Swimming, Day 3, Finals Duna Arena, Budapest 19/05/2021 Budapest/Hungary Photo © A. Kovacs/Deepbluemedia/Insidefoto

Photos courtesy of Deepbluemedia/Insidefoto

Kolesnikov skjótari enn evropametið í 100 rygg – men tað taldi ikki, tí tað var í mix

Kliment Kolesnikov svam í gjár skjótari enn evropeiska metið í 100 metra ryggsvimjing á langgeil, tá ið hann sum fyrsti svimjari í 4×100 blandað fyri mix lið svam teinin uppá 52.09 sekund, har evropametið hjá franska Camille Lacourt frá EM í Budapest í 2010 er 52.11.

Men, tað telur ikki sum evropamet, tí at hetta ‘mix’ er kapping har bæði menn og kvinnur luttaka í senn, har altjóða svimjireglurnar ikki enn loyva at fyrsti svimjari kann seta met.

KOLESNIKOV Kliment RUS 50m Backstroke Men Semi-Final Swimming Budapest – Hungary 17/5/2021 Duna Arena XXXV LEN European Aquatic Championships Photo Giorgio Perottino / Deepbluemedia / Insidefoto

Signhild 1:04.72 í 100 rygg á EM 2021 í Budapest

Signhild Joensen royndi seg fyri løtu síðani í 100 metra ryggsvimjing á Evropameistarastevnuni 2021 í Budapest, og varð har við tíðini 1:04.72 nr 44 av teimum 48 sum luttóku í hesi kapping. Signhild eigur sjálv føroyska metið á 1:03.01, sum hon fyrst setti á Bergen Swim Festival í 2018 og síðani svam ájavnt við á somu stevnu í 2019. Sí úrslitalistan her