Ferðaleiðari Hjørdis Mortensen heilsar úr Róm, at hetta hevur verið læruríkt, spennandi og stuttligt hjá teimum … og úrslitini tala jú fyri seg
EJM 2021 liðugt avgreitt
Tag: EJM 2021
Elisabeth 2:24.40 í 200 rygg á EJM 2021
Elisabeth Erlendsdóttir royndi seg í morgun í 200 metra ryggsvimjing á Evropeisku JuniorMeistarastevnuni í kappsvimjing á langeil, og varð har nr 20 av teimum 24 luttakandi við tíðini 2:24.40. Besta tíð hjá henni nakrantíð er 2:23.33 frá OL-úttøkustevnuni SuSvim Open í apríl mánaða; men tvær bestu tíðir í trimum royndum er jú avgjørt góðkent 🙂 Sí úrslitalistan her
Bartal 24.45 í 50 frí á EJM 2021
Bartal Erlingsson Eidesgaard royndi seg í morgun í 50 metra frísvimjing á Evropeisku JuniorMeistarastevnuni 2021, og varð har nummar 65 av 82 luttakandi við tíðini 24.45 sekund. Hetta var stórt persónligt met hjá Bartali, í mun til hansara 24.95 frá SuSvim Open í februar í ár, og hevur hann við hesum flutt seg frá at verða hin 10. besti føroyski svimjarin nakrantíð í greinini, til nú at vera hin 5. besti. Sí úrslitalistan her
16 ára gamli Popovici er nú heimsins skjótasti í 100 frí
Hetta hendi í gjár, tá ið tey avgreiddu finaluna í 100 metra frísvimjing á Evropeisku JuniorMeistarastevnuni í kappsvimjing á langgeil, ið sum kunnugt er í Róm í Italia í hesum døgum. Rumenski David Popovici svam longu týsdagin heimsins fjórskjótastu tíð í ár, tá ið hann sum fyrsti svimjari í 4×100 frí setti nýtt juniorheimsmet við tíðini 47.56 sekund – fyri síðani í gjárkvøldið at svimja skjótastu tíð yvirhøvur í heiminum í ár, við tíðini 47.30 í EJM-finaluni í 100 frí fyri einstaklingar. Sí LEN
Photo courtesy of Deepbluemedia/G. Scala
Bartal 1:59.53 í 200 frí á EJM 2021
Bartal Erlingsson Eidesgaard royndi seg í morgun í 200 metra frísvimjing á Evropeisku JuniorMeistarstevnuni í kappsvimjing á langgeil, og varð har nr 44 av 48 luttakandi við tíðini 1:59.53, bara 3 hundraðpartar frá hansara bestu tíð nakrantíð á 1:59.50 frá Reykjavík International í januar 2020. Sí úrslitalistan her
Bartal 30.49 og persónligt met í 50 bringu á EJM 2021
Bartal Erlingsson Eidesgaard royndi seg í morgun í 50 metra bringusvimjing á Evropeisku JuniorMeistarastevnuni 2021, og svam tá hendan teinin uppá 30.49 sekund, har besta tíð hjá honum til nú var 30.68 sekund frá Føroysku Meistarstevnuni í fjør. Sí úrslitalistan her
Elisabeth 1:04.67 í 100 rygg á EJM 2021
Elisabeth Erlendsdóttir royndi seg í morgun í sínari fyrstu kapping á Evropeisku Juniormeistarstevnuni í Róm, í 100 metra ryggsvimjing. Tað gekk upp á stás – hon setti persónligt met við tíðini 1:04.67, har hennara besta tíð til nú var 1:05.60 frá OL-úttøkustevnuni SuSvim Open í apríl mánaða. Sí úrslitalistan her
Elisabeth reyk upp eftir úrslitalistanum við hesi tíðini, til eitt 22. pláss av 51 luttakandi, har hennara upprunaliga styrkismeting var at verða nr 42 av 51 luttakandi. Sekstan sluppu víðari til hálvfinalurnar, so har manglaði lítið í.
Elisabeth var longu áðrenn hetta hin næstskjótasta føroyska nakrantíð í hesari greinini, men hevur nú neyðturviliga minkað nógv um munin fram til Signhild Joensen á fyrstaplássi.
Bartal 53.07 í 100 frí á EJM 2021
Bartal Erlingsson Eidesgaard svam í morgun sína fyrstu kapping á Evropeisku Juniormeistarastevnuni í Róm, sum var 100 metra frísvimjing. Og tað gekk heilt væl – hann setti persónligt met við tíðini 53.07 sekund, har hansara besta tíð til nú var 54.02 sekund frá FM í Vági í fjør. Sí úrslitalistan her
Tíðin rakk til eitt 65. pláss millum teir 85 luttakandi, har hansara styrkismeting áðrenn kappingina var at verða nr 80 av 95. Altso nøkur pláss uppeftir, eisini hóast teir vóru færri sum luttóku enn upprunaliga tilmeldað.
Bartal er nú hin næstskjótasti føroyski svimjarin nakrantíð í hesari greinini, aftanfyri bara Magnus Jákupsson. Áðrenn í morgun var hann hin 7. skjótasti, men fór hann nú upp um Óla Mortensen, Alva Hjelm, Heðin L. Olsen, Pál Joensen og Rók Trygvason.
David Popovici 47.56 og nýtt juniorheimsmet í 100 frí
Rumenski David Popovici setti í dag nýtt juniorheimsmet í 100 metra frísvimjing á langgeil, tá ið hann á evropeisku juniormeistarstevnuni í Róm svam hendan tein uppá 47.56 sekund, sum fyrsti svimjari í liðsvimjingini hjá Rumenia í 4×100 frí.
Metstór luttøka á EJM 2021
Evropeiska svimjisambandið LEN skrivar her um metstóra luttøku á Evropeisku Juniormeistarastevnuni í kappsvimjing 2021, nú tey eru eini 566 svimjarar úr 48 londum sum eru tilmeldaði, har samlaða talið av limalondum í LEN er 52. Úr Føroyum eru tey sum kunnugt Elisabeth Erlendsdóttir og Bartal Erlingsson Eidesgaard, bæði úr Havnar Svimjifelag, sum fara at luttaka hesar dagarnar í Róm í Italia.
Sum skilst ætlar LEN at stroyma frá øllum EJM, uttan at tað skal kosta okkum nakað, annaðhvørt á All Aquatics ella her á DailyMotion