svimjing.com

FINA innført peningavirðislønir í HM

Í ár er fyrstu ferð at altjóða svimjisambandið FINA gevur heiðursmerkjavinnarunum peningavirðislønir afturat heiðursmerkjunum. US$12.000 fyri gull, 7.000 fyri silvur og 5.000 fyri bronsu, umframt US$25,000 bonus fyri heimsmet. Umroknað við dagskursinum altso einar 67.000 krónur fyri gull, 39.000 fyri silvur, 28.000 fyri bronsu og 140.000 fyri heimsmet. Alt í alt gevur sambandið einar 2 milliónir amerikanskir dollarar til heiðursmerkjavinnararnar, ella 11,2 milliónir danskar krónur.

Um vit til stuttleikar rokna eitt sindur uppá møguleikan hjá Michael Phelps at taka 7 gull, so eru tað altso einar 469.000 krónur frá FINA, umframt sikkurt bonus frá amerikanska svimjisambandinum eisini, og frá sponsorum. Av teimum 7 greinunum eigur hann nýggj heimsmet í tveimum; so um vit varliga vænta at hann setur heimsmet aftur í teimum, verður tað 469.000 + 280.000 = 749.000 krónur frá FINA aleina, fyri luttøkuna á HM 2007. Ikki so galið.

Upprunaligu tíðindini á SwimNews

Startlistin klárur til HM 2007

Samlaði startlistin til HM 2007 er nú lagdur út á omegatiming.com. Hann er 160 síður langur og inniheldur bæði tilmeldingarnar listaðar upp fyri hvørt land sær, umframt sjálvan startlistan við plasering av luttakarum í mun til teirra tilmeldingartíðir. Har er eisini avsett pláss til ‘live timing‘, so hatta verður nokk ein av teimum síðum sum vit svimjiáhugaðu fara at vitja nógv í komandi viku.

Niðanfyri havi eg listað upp allar tilmeldingar hjá føroyingunum, við viðmerking um hvønn dag tey svimja, og hvussu tey eru plaseraði í mun til samlaða talið av luttakarum í greinini. Gott at síggja at føroyingarnir verri enn so eru aftast, um enn tað eisini er langt upp á toppin:

Kap.	Dagf.	Grein	Svimjari	Tilm.tíð	Plasering
2	25/3	400 frí	Pál Joensen	4:10.76	62 av 83
5	25/3	400 fri	Jutta Thomsen	4:36.52	58 av 73
5	25/3	400 frí	Mona Simonsen	4:40.94	59 av 73
10	26/3	200 frí	Pál Joensen	1:59.41	90 av 119
16	27/3	200 frí	Jutta Thomsen	2:16.01	90 av 112
16	27/3	200 frí	Mona Simonsen	2:17.28	97 av 112
17	27/3	800 frí	Pál Joensen	8:49.89	40 av 47
19	28/3	100 frí	Kristian Olsen	55.55	120 av 177
19	28/3	100 frí	Pál Joensen	56.43	133 av 177
22	29/3	100 frí	Mona Simonsen	1:04.33	112 av 136
28	30/3	50 frí	Kristian Olsen	24.56	92 av 195
28	30/3	50 frí	Pál Joensen	26.88	146 av 195
29	30/3	800 frí	Jutta Thomsen	9:33.64	43 av 51
29	30/3	800 frí	Mona Simonsen	9:35.39	44 av 51
36	31/3	1500 frí	Pál Joensen	16:33.14	43 av 53

Viðhefta fílan er sjálvur listin av omegatiming.com.

SUM

30-03-07 fríggjadagur

Upphiting byrjar kl 17:00 og kappingin byrjar kl 18:00
Venjarafundur verður kl 17:10 og hjálparfólkafundur kl 17:20
Møtið stundisliga til fundirnar
Svomið verður fríggjakvøldið til kl 21:45

Hvørt felag má hava 3 hjálparfólk við, tað verður ein long kapping, 64 kappingar
vh
Dan Hjelm

HS vann HS-stevnuna

Svimjistevna var í Havn í vikuskiftinum, har svimjarar úr bólki í 3 og eldri kappaðust á øllum teinum upp til 1500 metrar. Úrslitið varð at HS greitt vann kappingina um flestu heiðursmerki, við FS á øðrum plássi og Ægir á triðja. Tað skal tó nevnast at suðuroyarfeløgini vóru skerd, av tí at tríggir teir bestu svimjararnir har suðuri vóru farnir til HM í Avstraliu.

Continue reading HS vann HS-stevnuna

Tær týsku so góðar at tær vilja dopingtestast meira

Týsku svimjigenturnar eru blivnar so góðar í seinastuni, at tær nú bjóða seg til at verða dopingtestaðar meira, til at sleppa undan óneyðugan mistanka. Landsliðsvenjarin Ørjan Madsen sigur at tær enntá eru gingnar við til at frysta niður blóðprøvar, til at kunna prógva at tær ikki eru dopaðar, nú tær svimja í Melbourne.

Týska landsliðið hevur annars ikki verið so gott seinastu árini, síðani stórheitstíðina í 70’unum og 80’unum tá ið tær vóru dopaðar… so mikið at einir 169 ítróttarfólk nú fáa endurgjald frá týska statinum. Men nú eru tær so sanniliga við aftur, eftir til dømis at hava sett 3 heimsmet á EM í fjør. Og serliga amerikanar hava tí (sambært Madsen) gruggast um, hvussu vítt tær eru dopaðar ella ei.

Les upprunaligu tíðindini á eurosport.com

Landsliðið komið fram til Melbourne

Fylgið við á tsvim.com og ssf.fo, har landsliðsvenjari og svimjisambandsformaður siga frá ferðini til Avstraliu. Eftir øllum at døma gongur tað fínt; tey hava ferðast frá fríggjakvøld til mánamorgun, við einum steðgi í Keypmannahavn har tey m.a. høvdu tíð til at venja. Nú komu tey so fram til Melbourne tíðliga mánamorgun, sum er sunnukvøld her hjá okkum.

Elvir svimjing til astma ?!?

Ofta verður sagt at svimjing er gott fyri astmatikarar, tí at luftin í høllini er so heit og slavin. Men í SvømmeKlubben SYD hava fleiri elitusvimjarar nú fingið staðfest astma; og orsøkin verður hildin at vera tann vánaliga luftútskiftingin í Svømmecenter Falster. Tit kunnu lesa um hetta á heimasíðuni hjá TV2 ØST, á heimasíðuni hjá Svømmeklubben SYD, og á heimasíðuni hjá Svømmecenter Falster.

Metstórt tal av HM-luttakarum

2195 luttakarar og 1455 dómarar fara at luttaka úr 173 londum, sum er væl meira enn seinasta ‘highscore’ á 157. Hetta eru fleiri lond enn tey sum luttaka í øllum ítróttargreinum á Olympisku leikum tilsamans. Størstu luttakarlondini eru Kina (109 svimjarar), USA (95), Avstralia (93) og Russland (89). Meira enn 105.000 bilettir eru longu seldar til tiltakið, og útselt varð longu í gjár til finalurnar á vippu.Sí annars melbourne2007.com.au.

Nólsoyarsvimjingin hesu megin summarferiuna í ár

Gev gætur at tíðindini her eru enn bara leysatíðindi frá fyrireikarunum av; men eg frætti herfyri at tey ætla sær at skipa fyri Nólsoyarsvimjingina áðrenn summarferiuna í ár, sum jú er mikið áhugavert fyri kappsvimjarar. Vanliga hevur nólsoyarsvimjingin jú ligið á Ovasøku, eina til tvær vikur eftir Ólavsøku, tá ið flestu svimjarar hava verið burturi frá svimjingini í minst ein mánaða. Men í ár umhugsa tey at hava tiltakið kanska longu leygardagin 26. mai, sum burdi ligið væl fyri hjá bæði motionistum og kappsvimjarum.

Hetta verður tó ikki endaliga avgjørt fyrr enn einaferð á páskum, tá ið tey sum vara av fara at hava fyrireikandi fund um tiltakið. Altso um hvussu vítt leygardagurin 26. mai skal verða dagurin, ella um tey skjóta tað út til seinni. Tað eru Evald Rasmussen, Erlendur Simonsen og Jákup av Skarði sum eru fremstu fyrireikarar, um onkur er eyka forvitin. Tit kunnu vænta at fyriskipanin verður tann vanliga, at man skal skaffa sær vátdrakt, bát og hjálparfólk sjálvur, og so annars bara melda til og møta upp.

Sjónvarpsskrá fyri HM í Melbourne

Sum tit kunnu síggja undir Les meira her, so havi eg roynt at sjussa saman eina skrá fyri nær Eurosport sendir frá HM. Eitt sindur biksut, við tað at skráin á eurosport.com ikki vísir so langt út í framtíðina enn, og eg tí mátti brúka ta donsku í staðin… sum undarliga nokk ikki altíð vísti somu tíðir (altso út yvir at hon brúkar DK-tíð heldur enn GMT).

Men skráin fyri sjálva HM-stevnuna er jú langt síðani fastløgt, og tí kunnu vit væl ganga út í frá at Eurosport sendir umleið somu tíð, um teir senda ‘live’. So her niðanfyri síggja tit fyrst nær innleiðandi og finalur eru føroyska tíð sambært skránni, og síðani nær Eurosport (sambært eurosport.dk) ætlar sær at senda ‘live’ og endursendingar.

Sun 25/3	Mán 26/3	Týs 27/3	Mik 28/3	Hós 29/3	Frí 30/3	Ley 31/3	Sun 1/4
Melbourne: . Innleiðandi 00:00-03:00 . Finalur 10:00-12:00 .	Melbourne: . Innleiðandi 01:00-03:00 . Finalur 10:00-12:00 .	Melbourne: . Innleiðandi 01:00-02:00 . Finalur 10:00-12:00 .	Melbourne: . Innleiðandi 01:00-03:00 . Finalur 10:00-12:00 .	Melbourne: . Innleiðandi 01:00-03:00 . Finalur 10:00-12:00 .	Melbourne: . Innleiðandi 01:00-03:00 . Finalur 10:00-12:00 .	Melbourne: . Innleiðandi 01:00-04:00 . Finalur 10:00-12:00 .	Melbourne: . Innleiðandi 01:00-03:00 . Finalur 10:00-12:00 .
Eurosport: . LIVE 00:00-04:30 . . Eyka 17:00-18:30 . . . .	Eurosport: . LIVE 01:00-03:00 10:00-12:00 . Eyka 00:15-01:00 17:30-18:00 . . .	Eurosport: . LIVE 01:00-03:00 10:00-12:00 . Eyka 00:30-01:00 07:30-08:15 15:45-16:30 . .	Eurosport: . LIVE 01:00-03:00 10:00-12:00 . Eyka 00:00-01:00 07:30-08:15 16:45-18:00 . .	Eurosport: . LIVE 01:00-03:00 10:00-12:00 . Eyka 00:30-01:00 07:30-08:15 16:45-18:00 23:30-01:00 .	Eurosport: . LIVE 01:00-03:00 10:00-12:00 . Eyka 07:30-08:15 17:00-18:00 23:30-01:00 . .	Eurosport: . LIVE 01:00-04:00 10:00-12:00 . Eyka 07:30-08:15 . . . .	Eurosport: . LIVE 01:00-03:00 10:00-12:00 . Eyka 00:00-01:00 . Mán 2/4 … 13:00-14:30 .

Spyr meg ikki hvussu Eurosport kann senda ‘live’ til kl 3 um morgunin, tá ið tey halda uppat at svimja kl 2. Møguliga feilur í skránni, sum eg so rætti tá ið tey rætta. Men annars spennandi at Eurosport sendir so nógv ‘live’ frá eisini innleiðandi, tí so sleppa vit kanska at síggja onkran føroying hesar dagarnar 🙂

Um tit vilja vita hvørjar greinar sum verður svomnar teir ymisku dagarnar, so farið á annaðhvørt melbourne2007.com.au, ella takið niður viðfestu offisiellu kappingarskrá.