Ikki lætt at vera suðurafrikanskur toppsvimjari

Heimsmethaldarin Roland Schoeman og tveir aðrir av teimum sum vunnu 4×100 frí OL-gull í Athen 2004, fáa ikki fíggjarligan stuðul frá svimjisambandi sínum til at ferðast heim at svimja á suðurafrikansku meistarastevnuni, og verða tí ikki undan-úttiknir til OL í Beijing 2008. Harvið missa teir møguleikan at luttaka við landsliðnum á venjingarlegum og altjóða svimjistevnum, umframt at í øllum førum Schoeman missur tann studning sum hann fær frá svimjisambandinum til at venja í USA. Inntil august næsta ár, tá ið teir aftur fáa kjans at kvalifisera seg.
Continue reading Ikki lætt at vera suðurafrikanskur toppsvimjari

Sloveni svomið Amazon-ánna á tamb uppá 65 dagar

Puha, 5.265 kilometrar eftir 65 døgum, ella umleið 81 kilometrar um dagin. Martin Strel úr Slovenia hevur svomið Amazon-ánna á tamb, millum hávar og krokodillur, anaconda-kvalaraslangur og piratfiskar. Hann stríddist við krampa og høgum blóðtrýsti, svøvnloysi, larvuinfektiónir, konstant svøvnloysi og gnaddsár frá vátdraktini. Lisið í Ekstra Bladet

Í Wikipedia stendur at hann eisini hevur svomið Donau, Mississippi og Yangtze áirnar á tamb, umframt aðrar meira ókendar. Hann ætlar sær tó ikki at svimja Níl-ánna á tamb, tí hon eftir hansara tykki bara er ein løkur í mun til t.d. Amazon-áina.

Okkurt petti á túrinum máttu tey stoyta blóð í (Amazon) ánna, fyri at distrahera piratfiskar og hávar. Hann varð eisini raktur av eini 4 metrar høgari flóðaldu á túrinum. Til ber at lesa nógv meira um Martin Strel, og síggja myndir og video og tílíkt, á heimasíðuni www.amazonswim.com

Kina ringasta úrslit í 15 ár

Kinesiski landsliðsvenjarin Zhang Yadong sigur at hann fer ikki at mótmæla, um stjórarnir hjá honum loysa hann úr starvi, nú eftir ringa úrslitið í Melbourne. Tað varð einans til éina silvur og éina bronsu á HM, sum er ringasta úrslit hjá Kina í 15 ár. Landsliðsvenjarin heldur orsøkina vera avoldaðar venjingarhættir, og loysnin skal tí verða at fáa útlendskar venjarar til Kina, umframt at senda kinesiskar svimjarar uttanlanda.

Sum dømi nevnir 400 metur svimjarin Zhang Lin, at hann og koreanski Tae-Hwan Park vóru líka góðir, inntil Park fór til Avstraliu at venja. Park vann sum kunnugt gull í 400 frí og bronsu í 200 frí í Melbourne. Eitt annað dømi er Wu Peng, sum vann silvur langt eftir Michal Phelps í 200 firvald. Hann fer næsta mánaða til USA at venja saman við Phelps, fyri at læra.

Hetta við at fara til USA er veruliga blivið gongda leiðin hjá heimsstjørnunum í dag. Sat og hugdi at upptøkuni frá Melbourne í gjár (runt teir 200 firvald hjá Phelps), og fangaði tilfeldigvís at kommentatorarnir nevndu at breiddin ‘sum teir høvdu spátt frammanundan’ varð blivin nógv størri í dag. Haldi tað var í teimum 200 frí hjá kvinnum, har so gott sum øll finalan var evropeisk. Tá forkláraðu teir hesa gongdina við, at fleiri og fleiri svimjarar fóru til USA at svimja á college.

Her eru upprunatíðindini á swimnews.com

Speedo og onnur heiðra Michael Phelps

Speedo hevur eina heilsíðulýsing við Phelps í mest lisnu avísirnar í USA í dag, “USA Today” og “New York Times”. NBC kallar hann “the greatest athlete on the planet”, ESPN.com sigur at hansara bragd var “the greatest swim performance ever”, og Yahoo kallar hann “the person of the week”.

Speedo hevur enntá eitt heilt avsnitt í nethandli sínum á www.speedousa.com, har man kann keypa ta kappingar- og venjingarútgerð sum Phelps brúkar. Alt frá kappingardrakt til blusu, ryggsekk, hondplátur og fitjur. Og tey hava lagt video av teimum 7 gullheiðursmerkjunum og 5 einstaklinga-heimsmetunum hjá honum her, online á heimasíðuni.
Continue reading Speedo og onnur heiðra Michael Phelps

SSF skipað fyri skeið í merkjaskipanini

Seinastu 4 dagarnir hava 4 venjarar og 1 svimjisambandsumboð verið á skeið í norsku merkjaskipanini, at læra at læra onnur um skipanina.  Skeiðið vísti seg at verða sera áhugavert, serliga tí at undirvísarin var so royndur sum instruktørur og venjari, líka frá vatntilvenjing til landslið, umframt at hava hollar royndir innan svimjisambandsarbeiði.

Tey sum luttóku vóru øll úr FLOT, við tað at hetta felag tíverri er tað einasta sum veruliga tók merkjaskipanina til sín, tá einaferð fyri 10 árum síðani. Við høvuðsvenjaranum Rúna Gaardbo á odda, við tað at hann um nakar umboðar merkjaskipanina í Føroyum. Afturat honum vóru so Pálin og Halda Olsen, umframt undirriitaði, sum í dag venja viðkomandi nýggjar svimjarar í FLOT. Hartil luttók Jórun Eið úr Skeggjum eisini, sum umboð fyri SSF.

Undirvísarin var 65 ára gamli Per Irgens úr Noregi, sum hevur roynt so gott sum alt innan svimjiundirvísing. Einaferð ein succésríkur svimjivenjari í Grimstad, sum hevði upp til 11 landsliðssvimjarar í senn hóast býurin bara hevur einar 12.000 innbúgvarar og stórar grannar. Seinni knýttur at landsliðnum, sum venjari, fysioterapeutur og sikkurt svimjisambandsumboð eisini. Royndi í nøkur ár við stórari eydnu at reka sín egna svimjiskúla, sum hann so meira ella minni livdi av at hava. Hevur í dag mest skeið í merkjaskipanini og lívbjarging, umframt at vera norskur frásøgumaður hjá Eurosport.

Og so hevur hann ikki minst skrivað nýggju bókina “Slik lærer du å svømme” saman við tiltikna Ørjan Madsen, sum í dag er sports-chef hjá týska svimjilandsliðnum. Hendan bók greiðir sum navnið sigur frá fyrstu fasunum í svimjiskúlanum, og er fyrsta fyrsta av trimum grundbókum hjá norska svimjisambandinum.

Skeiðið skuldi kanska mest vera um sjálva merkjaskipanina, men varð skjótt um hvussu man byggur upp og rekur ein slíkan skúla, umframt at vit sjálvsagt fingu góð ráð og leiðbeining í hvussu man lærir børnini grundleggjandi evnini: Vatntilvenjing, kaving, flóting, glíð og framdrift. Hareftir fóru vit víðari til einstøku svimjigreinarnar og vendingar.

Skeiðið var sum heild ógvuliga drúgt men áhugavert. Vit vóru á skeið frá kl 9 til 18 mánadag, 9 til 18:30 týsdag og 9 til 18:30 mikudag, umframt eina løtu í morgun eisini (frá 9 til 12). Bara í gjár vóru vit í hylinum 4 ferðir, í umleið 6 tímar tilsamans. Hann hevur yvirhøvur nógv góð fiff, og vónandi finna vit 5 so útav at geva lærdómin víðari, nú gongd skal koma á at læra onnur um skipanina eisini.

Per biður forrestin heilsa, at tey løgdu merki til føroyingarnar á HM í Melbourne. Norska svimjisambandið hevði sum krav at landsliðssvimjarar skuldu annaðhvørt betra seg ella (um tey eru á heimsstøði) í øllum førum svimja upp til sítt besta. Hetta kláraðu tey vist nokk so dánt, men Per heldur at føroyingarnir slógu í øllum førum øll tey norðurlendsku londini í betringum. Har vóru jú bara trý føri har føroysku svimjararnir ikki settu bestu tíð. Og hartil helt hann at støðið var ógvuliga høgt hjá føroyingunum.

Per Irgens skal forrestin vera speakari á internationala svimjistevnan Bergen Swim Festival, sum verður í Bergen 5. – 6. mai 2007, eina viku eftir FM, og sum eg fyrr havi skrivað um her. Hann sær sjálvsagt gjarna at vit senda nakrar av okkara góðu svimjarar yvir har tá, at seta okkum í enn meira í respekt millum norðmenn. Alexander Dale Oen burdi verið har tá, við tað at hann venur í Bergen til dagliga (norðurlendskur methavari í bringusvimjing hjá monnum, sum tíverri ikki náddi nakað heiðursmerki í Melbourne, hóast hann svam 3. bestu tíð yvirhøvur).

Tríggir teir síðstu dagarnir á HM

Sum nevnt so steðgaði heimasíðan her eitt sindur upp í vikuskiftinum, vegna svimjistevna í Klaksvík. Eg má tí heldur skunda mær at draga saman um hesar seinastu dagarnar, har Pál svam flott føroyskt met í 1500 frí, meðan Hackett ikki kláraði at vinna sítt fimta HM í somu grein á rað, og Phelps mátti síggja vónirnar um 8 gullheiðursmerki fara uttan at hava nakra ávirkan á tað sjálvur.

Pál svam teir 1500 frí á 16:23.56 sum var meira enn 10 sekund skjótari enn gamla metið. Harvið settu føroysku svimjararnir 6 føroysk met, og svumu faktiskt bestu tíðir í allarflestu kappingum. Øll fýra settu føroyskt met, og sum heild er hetta óvanliga flott klárað av teimum øllum, umframt av teimum sum vóru teimum til hjálpar.

Kap. Dagf. Grein Riðil Geil Svimjari Tilm.tíð Úrslit Gev gætur
2 25/3 400 frí 3/10 5 Pál Joensen 4:10.76 4:08.40 Føroyskt met
5 25/3 400 fri 3/9 7 Jutta Thomsen 4:36.52 4:36.15
5 25/3 400 frí 3/9 1 Mona Simonsen 4:40.94 4:34.47 Persónligt met
10 26/3 200 frí 5/15 7 Pál Joensen 1:59.41 1:59.82
16 27/3 200 frí 3/14 7 Jutta Thomsen 2:16.01 2:10.81 Føroyskt met
16 27/3 200 frí 4/14 8 Mona Simonsen 2:17.28 2:12.45 Persónligt met
17 27/3 800 frí 2/6 8 Pál Joensen 8:49.89 8:30.31 Føroyskt met
19 28/3 100 frí 6/22 4 Kristian Olsen 55.55 54.43 Føroyskt met
19 28/3 100 frí 8/22 2 Pál Joensen 56.43 55.07 Persónligt met
22 29/3 100 frí 5/18 8 Mona Simonsen 1:04.33 1:03.01 Persónligt met
28 30/3 50 frí 7/24 6 Kristian Olsen 24.56 24.65
28 30/3 50 frí 14/24 8 Pál Joensen 26.88 26.03 Persónligt met
29 30/3 800 frí 2/7 3 Jutta Thomsen 9:33.64 9:32.79 Persónligt met
29 30/3 800 frí 2/7 6 Mona Simonsen 9:35.39 9:18.65 Føroyskt met
36 31/3 1500 frí 4/7 5 Pál Joensen 16:33.14 16:23.56 Føroyskt met

Hvat heimsstjørnunum viðvíkur, so vórðu seinastu dagarnir eisini áhugaverdir. Svenski veteranurin Therese Alshammar vann gull í 50 firvald (setti CR í semifinaluni), og silvur í 50 frí (hon er fødd í 1977, altso eini 30 ár nú), og landsmaðurin Stefan Nystrand vann bronsu í 50 frí. Michael Phelps vann á Ian Crocker í 100 frí. Kate Ziegler vann á Laure Manaudou í 800 frí. Avstralska kvinnustafettin í 4×100 blandað setti heimsmet. Amerikansku Michael Phelps og Katie Hoff setti bæði heimsmet í 400 blandað.

Og sjokk/gølur vóru eisini. Kamphanarnir Grant Hackett og Larsen Jensen nyttaðu báðir einki tá ið tað kom til stykkis, hóast spádómurin hjá Hackett varð til veruleiki, at 7 fóru undir 15 minuttir í 1500 frí. Ian Crocker diskaði amerikansku stafettina í 4 x 100 blandað, sum gjørdi at Michael Phelps harvið ikki kundi náa tey metnógvu 8 gullheiðursmerkini.

Men sum heild man hetta hava verið eitt heilt serligt HM, bæði fyri føroyingar og fyri heimin sum heild. 6 føroysk met og eini 15 heimsmet, umframt ein rúgva av ‘championship records’ (CR- besta tíð svomin á einum HM). Ein einastandandi Michael Phelps, sum tangeraði metið hjá Mark Spitz ,og vegna sítt fjølbroytni verður hildin at hava framt eitt tað størsta bragdið nakrantíð.

Soleiðis vórðu seinastu heiðursmerkini býtt:

Leygardag

50 firvald kvinnur

  1. Therese Alshammar (SWE), 25.91
  2. Danni Miatke (AUS), 26.05
  3. Inge Dekker (NED), 26.11

50 frí menn

  1. Benjamin Tobriner-Wildman (USA), 21.88
  2. Cullen Jones (USA), 21.94
  3. Stefan Nystrand (SWE), 21.97

200 rygg kvinnur

  1. Margaret Hoelzer (USA), 2:07.16 (CR)
  2. Kirsty Coventry (ZIM), 2:07.54
  3. Reiko Nakamura (JPN), 2:08.54

100 firvald menn

  1. Michael Phelps (USA), 50.77
  2. Ian Crocker (USA), 50.82
  3. Albert Subirats Altes (VEN), 51.82

800 frí kvinnur

  1. Kate Ziegler (USA), 8:18.52 (CR)
  2. Laure Manaudou (FRA), 8:18.80
  3. Hayley Piersol (USA), 8:26.41

4 x 100 blandað kvinnur

  1. Avstralia, 3:55.74 (WR)
  2. USA, 3:58.31
  3. Kina, 4:01.97

Sunnudag

50 rygg menn

  1. Gerhard Zandberg (RSA), 24.98
  2. Thomas Rupprath (GER), 25.20
  3. Liam Tancock (GBR), 25.23

50 bringa kvinnur

  1. Jessica Hardy (USA), 30.63
  2. Leisel Jones (AUS), 30.70
  3. Tara Kirk (USA), 31.05

400 blandað menn

  1. Michael Phelps (USA), 4:06.22 (WR)
  2. Ryan Locthe (USA), 4:09.74
  3. Luca Marin (ITA), 4:09.88

50 frí kvinnur

  1. Lisbeth Lenton (AUS), 24.53
  2. Therese Alshammar (SWE), 24.62
  3. Marleen Veldhuis (NED), 24.70

1500 frí menn

  1. Mateusz Sawrymowicz (POL), 14.45.94
  2. Yury Prilukov (RUS), 14:47.29
  3. David Davies (GRB), 14:51.21
  4. Larsen Jensen (USA), 14:52.98
  5. Federico Colbertaldo (ITA), 14:56.22
  6. Craig Stevens (AUS), 14:59.11
  7. Grant Hackett (AUS), 14:59.59
  8. Erik Vendt (USA), 15:07.76

400 blandað kvinnur

  1. Karie Hoff (USA), 4:32.89 (WR)
  2. Yana Martynova (RUS), 4:40.14
  3. Stephanie Rice (AUS), 4:41.19

4 x 100 blandað menn

  1. Avstralia 3:34.93
  2. Japan, 3:35.16
  3. Russland, 3:35.51

Libby Lenton sett heimsmet í 100 frí, ella hevur hon ?

Avstralska Libby Lenton hevur sum fyrsta kvinna svomið undir 53 sekund í 100 frí á langbana, nú eftir HM, tá ið hon luttók í kappingini ‘Duel in the Pool’ millum USA og Avstralia. Nú er spurningurin bara um heimsmetið verður góðkent, við tað at hon svam ímóti Michael Phelps. Tíðin varð 52.99.

FINA-reglurnar siga at svimjarar mugu ikki fáa hjálp til at seta røttu ferð, við til dømis at síggja ella hoyra millumtíðir, fáa tekn frá venjaranum, ella fáa hjálp frá øðrum svimjarum. Hetta hevur til nýliga verður tulkað sum at konufólk ikki kunnu seta met í kapping móti mannfólki, av tí at mannfólk jú yvirhøvur svimja skjótari enn konufólk, og tað tí er rímiliga lætt at finna ein sum kann svimja akkurát nóg skjótt til at hjálpa kvinnuni at svimja við met-ferð.

Men hesar reglur eru eftir øllum at døma broyttar ella í ferð við at verða broyttar. Talsmaður David Lyall hjá Swimming Avstralia sigur at tey hava verið í samband við FINA, og at tey eru optimistisk um at metið verður góðkent. Meðan onkur onnur kelda í FINA hevur sagt at umstøðurnar mugu kannast fyrst.

Í tíðindunum her á SwimNews verður so ein heilt annar spurningur settur afturat, um hvussu vítt avstraliarar fara at verða líka kritiskir inn á seg sjálvar nú, sum tá ið týska Britta Steffen í fjør setti verandi met í somu grein. Tá ivaðust týskir fjølmiðlar og avstraliarar nevniliga í um Steffen var ‘rein’, síðani hon kundi svimja so skjótt. Men nú svimur Lenton knappliga nógv skjótari, samstundis sum hon um nøkur sær ógvuliga maskulin út.

Lesið upprunatíðindini her á SwimNews

Herferð móti føroysku luttøkuni á HM

Nikki Dryden á swimnews.com hevur seinastu tríggjar dagarnar talað rættiliga harðliga at politikkinum hjá FINA, at veita fíggjarligan stuðul til veikari lond at luttaka á HM. Í tveimum teimum fyrstu greinunum (29. og 30. mars) sleppa vit føroyingar rættiliga snikkaleysir, við tað at hann fyrst og fremst leggur á ‘turistunum’ úr Afrika. Men í gjár er álopið rættað móti teimum 5 londunum sum FINA hevur stuðlað hóast tey ikki eru góðkend av Olympisku nevndini, og tá verður álopið jú beint á Føroyar, bæði so og so.

Fyrsta greinin eitur “Where are all the Women?“, har hann kritiserar at FINA ikki hevur kravt javnt býti millum menn og kvinnur á liðunum. Eftir øllum at døma betalir FINA fyri uppihald og flogferð hjá 4 svimjarum og 2 hjálparfólkum úr hvørjum landi, uttan at krevja at talan skal vera um t.d. 2 menn og 2 kvinnur. Og tí luttaka ein rúgva av londum bara við monnum.

Her er eingin orsøk hjá okkum at føla okkum rakt, við tað at Føroyar luttaka við 2 gentum og 2 dreingjum.

Næsta greinin eitur “Quantity Not Quality: FINA’s Strategy“, har hann leggur á at summi lond luttaka við reinum turistum. Nevnir onkran svimjara úr Ghana, føddur ár 1975, sum akkurát kláraði at svimja undir 4 minuttir í 200 bringu, bara fyri at verða kolldømdur. Og at nógvir rímiliga gamlir luttakarar fóru til Avstraliu fyri síðani at strika sína luttøku í seinastu løtu.

Nøkur citat:

“Why is there a 32 year old who goes a 3:58 in the 200 breast competing at the World Championships? How on earth is that helping to develop swimming in Ghana? I do not think it is. Instead, I think it’s a nice free trip to Australia for a bunch of men.”

“Of those 11, there were three 32 year olds, one 30 year old, and one guy aged 29. Why are they scratching from the 50 free? Too much shopping?”

Men aftur her er eingin orsøk hjá okkum at føla okkum rakt. “So all together, Faroe Isles are doing very, very well” 🙂

Triðja greinin “Money Can Be Spent More Wisely” rakar tó nógv meira plett, á eitt mál sum er ógvuliga eymt fyri okkum føroyingar. Nevniliga at vit ikki hava olympiskan limaskap. Dryden heldur her at FINA-pengarnir eru burturblakaðir, um stuðulin allíkavæl ikki kann føra til OL-luttøku, og tað kann man so diskutera. Talan er sambært Dryden um 5 lond, sum merkir at vit eru 20% av trupulleikanum.

Eg veit hvørki um maðurin er liðugur at skriva um hetta mál, ella um tað hevur nakran týdning fyri hvat fólk halda um politikkin hjá FINA. SwimNews er gott nokk ein tann størsta svimjiheimasíðan í heiminum, sum hevði til dømis 55.405 ‘pageviews’ í gjár, sambært mátingunum hjá Alexa. Men eingin sigur at fólk eru einig, bara tí at Dryden skrivar soleiðis. Vit føroyingar mugu bara royna at hava argumentini klár, ífall at onkur týðandi skuldi sett okkum somu spurningar.

Ella fáa okkum IOC-limaskap 🙂

Franska L’Equipe ákærir Thorpe fyri doping

So er tað tað, er svimjingin ‘rein’? Franska avísin L’Equipe skrivar sambært Eurosport at ein dopingroynd hjá avstralska Ian Thorpe vísir óvanliga høg virði av testosteron (mannligt kynshormon) og onkrum øðrum hormon kallað ‘leutenising’, sum tó bæði eru náttúrlig at hava í kroppinum, í lægri nøgdum. Thorpe mótmælir sjálvsagt harliga, og sigur seg hava sett eina æru í netupp at hava verið ‘reinur’ og arbeitt móti doping.

Eurosport skrivar tó í øðrum tíðindum, at avstralsku antidoping-myndugleikarnir siga onga orsøk vera til halda at Thorpe var dopaður. “Media reports that an athlete has failed a drugs test are simply incorrect.”.

Eisini áhugavert , at hálendski venjarin Jaco Verhaeren traðkar fram og verjir Thorpe, hóast tað sum so ikki er nakað beinleiðis samband millum teir báðar (Verhaeren er venjari hjá m.ø. Pieter van der Hoogenband). Hann skeldar avísina út fyri at skriva sovorðið bara fyri at dálka um karrieruna hjá Thorpe, uttan yvirhøvur at hava kontakta Thorpe fyrst.