Magnus megnaði her fyri løtu síðani at vinna juniorsilvur eisini í 50 frí, við tíðini 23.77 á DMK 2011. Besta tíð hjá honum í greinini er væl skjótari, 23.28 frá FM í vár, men tað sigur nakað um støðið hjá honum, at hann soleiðis komfortabult kann vinna silvur eisini her, eftir at hava vunnið bronsu í 100 blandað og silvur í 100 rygg sama morgun, sambært vælvitandi keldum ikki petti úthvíldur til hesa stevnu.
Magnus Jákupsson hevur í morgun sett nýtt føroyskt juniormet í 100 metra blandaðari svimjing, tá ið hann við tíðini 57.75 vann bronsu á donsku juniormeistarastevnuni, og kvalifiseraði seg til seniorfinalu í kvøld (sum hann tó ikki luttekur í). Juniormetið hjá honum var 58.51 frá HS-stevnu í desember í fjør, meðan føroyska metið hjá Páli Joensen er 57.66.
Løtu seinni vann hann juniorsilvur í 100 rygg, við 56.37 eitt sindur frá føroyska metinum hjá sær frá Saint-Dizier í vikuskiftinum 55.33, aftanfyri Morten Bak Hansen sum setti nýtt danskt juniormet við 53.76. Her velur Magnus at luttaka eisini í seniorfinaluni í kvøld, sum 7. skjótasti svimjari, væntandi í harðari kapping við báðar Wildeboer-brøðurnar og aðrar.
Danir hava sum kunnugt sína meistarastevnu á stuttgeil nú í hesari vikuni, frá í morgin og til einaferð sunnudagin. Hon er avgerandi fyri donsku úttøkuna til NJM í Reykjavík og EM á stuttgeil í Stettin, og hartil verður tað eyka spennandi fyri okkum føroyingar, at sleppa at síggja Magnus Jákupsson í dysti ímóti dønum, fleiri ferðir styrkismettur til at enda ovarlaga í rúgvuni. Fylgið við á til dømis www.svimjing.com/live, frá í morgin klokkan 08:30.
Ávaring, gamlir menn í svimjibuksum, og tað ger tað ikki betri at fleiri av teimum hava fingið sær ‘Movember’ yvirskegg 🙂
Brot út ítróttarsendingini 3-2 hjá Kringvarpi Føroya hin 7. november 2011, um familjuna á Fløtti.
Her er ein video frá Reysta-stevnuni í Leirvík í vikuskiftinum, har tey fýra Bartal, Jákup, Vár og Ella úr Havnar Svimjifeilag vinna 4×33 frí. Tað er Erling Eidesgaard sum filmar.
Magnus Jákupsson megnaði her í vikuskiftinum at seta 1 føroyskt met (og juniormet) afturat í Saint-Dizier, umframt at vinna bronsu í 100 og 200 rygg, luttaka í eini røð av finalum, og allan vegin ígjøgnum svimja imponerandi tíðir niður ímóti sínum egnu metum. Føroyska metið var 55.33 í 100 rygg, har metið hjá honum frá FM í vár var 55.34.
Continue reading Magnus føroyskt met í 100 rygg, bronsu í 100 og 200 rygg
Viðfestur er úrslitalistin frá svimjistevnuni í Leirvík í dag. Samlaða úrtøkan var at Suðuroyar Svimjifelag vann flest heiðursmerki, 13 gull, 14 silvur og 11 bronsu, meðan vertirnir Reysti vunnu næstflest 9 gull og 15 bronsu, og Ægir triðflest 6 gull, 5 silvur og 4 bronsu. Mest vinnandi svimjari var Sára R. Nysted úr Suðuroyar Svimjifelag sum vann 5 gull og 3 silvur, og mest vinnandi drongu Óli Poulsen úr Reysti sum vann 5 gull og 1 bronsu.
Continue reading Úrslit frá Reysta-stevnuni í dag, 18. november 2011
Danska meistarastevnan á stuttgeil verður í Thisted nú í komandi viku, frá hósdegi 24. til sunnudag 27. november 2011, við luttøku av millum øðrum av okkara Magnusi Jákupssyni. Og tey eru røsk har yviri í Thy, nú tey lova okkum mest umfatandi ‘live stream’ frá danskari svimjistevnu nakrantíð, við topp-professionellari framleiðslu, viðmerkjarum í høllini, møguleika at chatta og hava live timing afturvið. Til at hjálpa sær hava tey fingið lokalu fyritøkuna Streamfactory, sum eftir øllum at døma eru við at vera eitt heimsnavn innanfyri ‘live stream’ framleiðslu av ítrótti. Via SwimNews.dk
Suðuroyar Svimjifelag bjóðar til BankNordik svimjistevnu í Vági nú leygardagin og sunnudagin 26 til 27. november, í øllum svimjisgreinum uttan 1500 frí. Stevnan er løgd so at til ber at sigla suður leygarmorgun og sleppa heim aftur sunnukvøldið. Sí viðfestu innbjóðing.
