Magnus Jákupsson svam seg í kvøld víðari til finalu á British Gas International Meet í Manchester, tá ið hann í 50 metra frísvimjing svam teinin uppá 23.64 sekund.
(Magnus Jákupsson á Danish Open 2012. René Thomsen eigur myndina)
Hetta var triðskjótasta tíð í innleiðandi riðlunum, og heilt nær hansara persónliga meti á 23.48 sekund, sum hann svam á donsku meistarastevnuni á langgeil í 2012.
Continue reading Magnus 23.64 og í finalu á British Gas International Meet
Svømmesport skrivar her at danska svimjisambandið hevur sent 6 svimjarar til British Gas International Meet í Manchester, íroknað Magnus Jákupsson.
(Magnus Jákupsson á DMK 2013. Jákup Jacobsen eigur myndina)
Tey byrja við innleiðandi kl 17, og hava so heldur øvut (men áhugavert) innleiðandi um kvøldið og finalur um morgunin, ið sambært Daniel Skaaning er snilt til at fyrireika seg til at kunna svimja skjótt um morgunin. Altso ein góð fyrireiking hjá teimum sum eru nóg góð at koma í finalu nú í Manchester, men sum skulu kempa fyri at sleppa í finalu á EM í Berlin.
Startlistarnir síggjast her, har vit millum annað síggja at Magnus í dag fer at royna seg í 200 rygg.
Suðuroyar Svimjifelag skipar nú fríggjakvøldið hin 27. juni fyri svimjing um Vágsfjørð. Teinurin er umleið 540 metrar frá nýggja langhylinum í Líðini og yvirum til Polarfrost. Havnar Svimjifelag hevur eitt tilboð til sínar rørslusvimjarar, sum umfatar ferðing og svimjing og mat og gisting umborð á Johonnu og annað. Annars er at kontakta Suðuroyar Svimjifelag.
(Mynd: Erling Eidesgaard)
Amerikanska Katie Ledecky megnaði í gjárkvøldið at seta enn eitt heimsmet, tá ið hon á Woodlands Senior Invitational svam 800 metrar frísvimjing uppá 8:11.00, har hennara heimsmet frá HM í Barcelona í fjør var 8:13.86. Hetta var so afturat heimsmetinum í 1500 metra frí hóskvøldið, á eini stevnu sum ikki hevur serliga stóran týdning. Sí SwimmingWorld
Pál Joensen vann sær í dag gull á Deloitte Øresund Triathlon við Charlottenlund Fort norðanfyri Keypmannahavn, tá ið hann sum partur av liðnum “Friends of Saysky” svam 1.9 km teinin uppá 20 minuttir og 31 sekund.
Amerikanska Katie Ledecky setti í gjárkvøldið nýtt heimsmet í 1500 metra frísvimjing, tá ið hon á ‘Woodlands Senior Invitational’ í Texas svam teinin uppá 15:34.23. Heimsmetið hjá henni var 15:36.53, frá HM í Barcelona í fjør. Sí SwimmingWorld
Hendan stevnan nú er ikki nøkur stevna har svimjarar vanliga toppa, so nú verður nærmast væntað at hon fer at trýsta heimsmetið enn longur niður, tá ið størri stevnur verða í summar.
Katie Ledecky set new world record in 1500 Free! 15:34.23 #TWSTInvite14 pic.twitter.com/X47wlHEs3o
— Woodlands Swimming (@swimTWST) June 19, 2014
Á meira prestigufyltu Arena Grand Prix í Santa Clara, vann Lotte Friis greitt kappingina í 1500 metra frísvimjing við tíðini 16:00.35, sum nú er triðskjótasta tíð í heiminum í ár. Tað sigur kanska eitt sindur um hvussu skjótt Ledecky svam, meira ella minni aleina í Shenandoah.
Pál Joensen vann sær í dag sítt næsta silvurheiðursmerki á Mare Nostrum stevnunum 2014, tá ið hann í 1500 metra frísvimjing finaluni í Barcelona svam teinin uppá 15:10.38, beint aftanfyri suðurafrikanska Devon Myles Brown á 15:10.02.
Tað var ein av hesum klassisku kappingunum hjá Páli, har hann legði hart út og dró frá fyrst nógvu hundrað metrarnar, fyri síðani at verða innheintaður ímóti endanum.
(Heiðursmerki hjá Páli á Mare Nostrum 2014. Pál Joensen eigur myndina)
Continue reading Pál 15:10.38 og silvur í 1500 frí á Mare Nostrum í Barcelona
Óli Mortensen setti í morgun nýtt føroyskt juniormet í 1500 metra frísvimjing, tá ið hann á Mare Nostrum stevnuni í Barcelona svam teinin uppá 15:54.62. Hann átti sjálvur juniormetið á 15:59.02, frá Danish Open í mars mánaða. Seinnapartin skal Pál royna seg í skjótasta riðli, við bestu tilmeldingartíð av øllum.
(Óli og Pál tosa um eitthvørt á Mare Nostrum stevnuni í Barcelona í fjør)
Føroysk úrslit í morgun
1500 frí menn: Óli Mortensen (1996) 15:54.62 – juniormet
100 frí kvinnur: Victoria Wigant Eysturdal (1998) 1:02.24 (#73 av 76)
100 bringa kvinnur: Ásbjørg Hjelm (1999) 1:22.58 (#36 av 36)
50 frí menn: Eyðbjørn Joensen (1996) 25.48 (#93 av 99)
200 frí menn: Óli Mortensen (1996) 1:56.21
Tey mangla enn at avgreiða 200 frí hjá monnum og 400 frí hjá kvinnum
Óli Mortensen setti í dag nýtt føroyskt met og juniormet í 200 metra firvaldasvimjing á langgeil, tá ið hann á Mare Nostrum stevnuni í Barcelona svam teinin uppá 2:11.04.
Pál Joensen átti nú farna føroyska metið á 2:12.55 frá Reykjavík International Games í 2009.
Óli eigur eisini juniormetið í 200 metra firvald á stuttgeil, á 2:06.94 frá SuSvim-stevnu í mars mánaða. Har er føroyska metið hjá Páli 2:03.96, frá HS-stevnu í apríl 2012.