Category: Svimjing.com

Tey sum skriva og viðmerkja her á svimjing.com fara nú at uppdaga, at hasin Word-líknandi amboðsbjálkin nú knappliga er burtur. Orsøkin er (sum ikki einaferð), at hetta er eitt eykamótul til heimasíðuskipanina sum eftir innlegging hevur víst seg at viðføra ávísar trupulleikar, og eg helt tí at tíðin var komin til at taka hann bara burtur.

Tey sum skriva skulu nú venja seg við at skriva serliga kotu til at fáa t.d. feitan tekst ella skráskrift, men ein leiðbeining er lukkkutíð beint undir feltinum har man skrivar, sum forklárar hvørjar sniðingarmøguleikar man hevur.

Trupulleikarnir hava annars verið serliga at ávísar teldur ikki hava kunnað skrivað yvirhøvur. Sikkurt tí at tær ikki loyvdu innlegging av hesum serliga ‘FCK editorinum’ ella okkurt sovorðið. Eg rendi meg til dømis inn í trupulleikan á eini telducafé á Rhodos, og avgjørdi tá á staðnum at hetta gekk altso ikki 🙂

Hartil irriteraði tað meg persónliga, at tekstur sum man kopieraði frá t.d. Word kom til at hava sama snið sum har, heldur enn ta snið (og her serliga ta skrifttypu) sum vit nú einaferð hava valt til heimasíðuna. Haldi at heimasíðan gjørdist óruddilig av hesum.

Og at enda var editorurin ein forðing fyri at onnur enn eg funnu útav at seta inn videobrot og myndir. Ein orsøk til at tað hevur gingið so leingi áðrenn eg tók editorin burtur, var faktiskt at eg annars ikki visti hvussu eg skuldi fáa myndir á síðuna bara við standard mátanum. Men tað havi eg altso lært nú, og so var tíðin komin.

Eg skal fara at skriva eina leiðbeining til hvussu man setir inn myndir, kanska longu í kvøld. Og hitt við YouTube verður eisini áðrenn alt ov leingi.

Ein nýggj og spennandi útgáva er á veg av heimasíðuskipanini Drupal, sum vit brúka her á svimjing.com. Tað er altíð lættast at dagføra um man er so nær standard útgávuni sum gjørligt, og eg havi tí loyvt mær at steingja fyri teimum eyka funkum sum vit allíkavæl ikki brúktu serliga nógv. Nevniliga skipanin við teldupostlistum, umframt møguleikan at senda inn tilfar gjøgnum teldupost.

Hetta eru funkur sum liggja uttan fyri standard Drupal, og sum mennararnir av teimum tí skulu dagføra til nýggjastu útgávu, eftir at hon er offisielt útkomin. Tað vísir seg altíð at taka rættiliga tíð (vurderi einar 3 mánaðir); og eg haldi tað tí vera líka lætt at sløkkja fyri teimum, tá ið vit allíkavæl ikki brúka tær. Skuldi tørvurin víst seg seinni, so ber til at leggja tað inn aftur.

Annars vísir tað seg at hatta við at senda inn í telduposti ikki er so neyðugt sum vit kanska hildu. Fleiri og fleiri fartelefonir hava jú internet, og tá er tað lættari bara at fara beint á svimjing.com og skriva, enn at skula gera okkurt heilt ørvísi í sínum teldupost-forriti. Og hitt við teldupostlistum, well tað var altíð ein rættiliga nørdut loysn 🙂

Sigið endiliga frá um okkurt ikki riggar sum ætlað. Hesar avmarkingar burdu yvirhøvur ikki ávirka restina av skipanini; men man veit jú ongantíð við teldum.

Nú er vónandi friður av svimjingini í nakrar dagar, meðan vit royna at styrkja okkum við dunnu og gás og rís a la mande. Um tit allíkavæl mangla okkurt at gera um jólini, so kunnu tit til dømis hyggja at hvat Ottar í Hjøllum fæst við um dagarnar, sum ferðaleiðari og skíðinstruktørur í Zell am Ziller.

Bara ein av hesum regluligu dagføringunum, sum koma tá ið teir ið gera skipanina finna trygdarhol í henni. Hon burdi ikki broytt nakað sum helst á heimasíðuni, men sigið endiliga frá um okkurt uppførir seg ørvísi nú.

Eg (Rókur) havi nú skift út mótulið sum tók sær av at senda teldupostar til brúkarar um nýtt tilfar á svimjing.com, við eitt líknandi men meira einfalt. Hitt riggaði fyri so vítt fínt, men var eitt sindur ov roksut við at man skuldi seta eina rúgvu av krossum – ‘halda’ alt møguligt – og allíkavæl risikeraði ikki at fáa fráboðan um okkurt áhugavert.

Nýggja mótulið er meira einfalt: Far inn undir tínar kontosetingar (“Mín konto”) og vel “Fráboðanarsetingar”, og tendra so fyri høvuðskontaktini (‘Fráboðanarstøða virkjað’). Síðani kanst tú velja til ella frá um tú vilt fráboðast um nýtt innihald, um nýggjar viðmerkingar, og um hvussu nógv tú ynskir at síggja í teldupostinum (bara yvirskriftir ella eisini tekst). Og tað er so tað.

Burtur er altso møguleikin fyri at velja at fáa fráboðanir um akkurát hendan ella handan postin, og frávelja fráboðanir um onkran annan post; men vónandi ger tað bara skipanina greiðari. Í staðin fært tú nú ein regluligan teldupost (í løtuni 6 tímar millum hvønn teldupost) sum listar upp nýtt innihald og/ella viðmerkingar síðani seinasta teldupost.

Til ber sjálvsagt eisini at brúka RSS, ella bara hyggja regluliga inn á heimasíðuna 🙂

Vit hava fingið nakrar eitt sindur keðiligar viðmerkingar frá dulnevndum brúkarum her á svimjing.com, og ‘ónevndi brúkarin’ er tí fyribils forðaður fyri at viðmerkja. Kanska með alla. Men tað er ikki verri enn at tit kunnu skráseta tykkum sum brúkari við dulnevni her á heimasíðuni, um tit ikki vilja leggja navn til.

‘Ónevndi brúkarin’ er annars bestemt eisini komin við áhugaverdum viðmerkingum, hesar fáu mánaðirnar sum heimasíðan hevur virkað, og tað er tí við ávísum sorgblídni at vit forða fyri honum nú. Vónandi merkir tað bara at hesir brúkarar skráseta seg, og so halda áfram at skriva.

Annars virða vit umsitarar dulnevnið hjá tykkum, á tann hátt at veruliga navnið ongantíð verður avdúkað av okkum her á heimasíðuni. Faktiskt verja vit okkum móti at koma til at avdúka av óvart, við ikki sjálvir at hyggja eftir hvør teldupostadressa er skrásett til brúkaran. Ein dulnevndur skal fáa frið at viðmerkja dulnevnt, so leingi sum viðmerkingarnar ikki gerast ov ljótar… og verða tær tað, so steingja vit bara fyri atgongdina hjá viðkomandi.

Námen, eg (Rókur) vóni at tit skilja støðuna. Vit vilja helst ikki drepa kjakið her á heimasíðuni, men eisini umganga at vit fáa droytt klandur her millum navngivnar brúkarar og fólk sum ikki ein gang vilja leggja navn til síni fornermilsi. Í øllum førum so leingi sum vit umsitarar eru í feriu og/ella ov sløvir til at fylgja við 🙂