Jákup Jacobsen hevur sent mær hesar myndirnar, frá kappingini í Farum í dag, umframt nakrar viðmerkingar.
Eitt fitt par í Farum
Markus á heiðursmerkjapallinum í 50 firvald. Hann vann silvur í juniorbólkinum
Í 100 blandað hevði hann bestu tíð av øllum juniorum, men varð kolldømdur fyri at svimja ov langt undir í rygg.
Pál er í ógvuliga tungari venjing í løtuni, sum óivað ávirkar tíðirnar hjá honum
Teir báðir Pál Joensen og Magnus Jákupsson vunnu sær hvør sítt gull á eysturdonsku meistarastevnuni á stuttgeil, tá ið Pál í 800 frí svam teinin uppá 7:52.68, og Magnus 100 rygg uppá 52.62. Tíðin hjá Pál er nakað væl frá hansara bestu tíð á 7:36.24 frá Duel in the Pool stevnuni í USA í 2011, meðan tíðini hjá Magnusi er persónligt met við éinum hundraparti, í mun til hansara 52.63 frá Swedish Swim Games herfyri. Pál varð hartil nummar 4 í 200 frí, við tíðini 1:49.14, har hansara besta tíð er 1:46.61 frá EM í Rijeka í 2008, og 1:47.56 uttan superdrakt.
(Jákup Jacobsen eigur myndina, frá DM á langgeil í vár)
Astrið Foldarskarð og Markus Joensen royndu seg eisini í dag, fyri felagið VAT sum tey skiftu til her við svimjiársbyrjan. Astrið var í finalu í 50 frí og firvald, har hon í 50 frí varð nummar 5 við tíðini 26.92, og í 50 firvald nummar 6 við tíðini 29.09. Markus varð nummar 10 í 50 firvald við tíðini 26.37, og so seinni kolldømdur í 100 blandað fyri at svimja meira enn 15 metrar undir vatni. Astrið varð eisini nummar 7 sum partur av stafettini hjá VAT í 4×50 blandað, og Markus nummar 6 fyri somu stafett hjá monnum.
Guðrun Mortensen vann í kvøld bronsuheiðursmerki fyri eftirskúla sín Berns, tá ið hon á vestdonsku meistarastevnuni í Århus svam teinin uppá 27.21, har Julie Levisen úr Aalborg svam 25.78 og Line H. Vestergaard úr Silkeborg 27.03. Guðrun eigur sjálv føroyska metið, sum er 26.04 frá tá ið hon vann gull á NJM í Íslandi í 2011. Alvi Hjelm svam seg við tíðini 1:07.46 til eitt 17. pláss í 100 metra ryggsvimjing, meðan føroyski danin Frans Johannesen svam seg til silvur í bæði 50 og 200 frí, við tíðunum 23.60 og 1:50.61, umframt at hann vann silvur sum partur av 4×50 blandað stafettini hjá Esbjerg.
Tey á Bernstorffsminde Efterskole gjørdu annars hesa skemtiligu video herfyri, sum aftursvar til eina aðra stuttliga video har Jeanette Ottesen varð (óoffisiellur) evropameistari í ‘turrsvimjing’, við nýggjum heimsmeti. Tey á Berns kalla avrikið hjá Guðruna fyri tangering av heimsmetinum hjá Jeanette.
Her er videoin við Ottesen
Pál Joensen vann sær í kvøld gull í 400 metra frísvimjing fyri menn, tá ið hann á Østdanske Kortbanemesterskaber í Farum svam teinin uppá 3:47.57, frammanfyri Anton Ørskov Ipsen á 3:48.35 og Marcus Krøyer Svendsen á 4:02.71. Besta tíð nakrantíð hjá Páli er 3:40.12 frá tíðini við superdraktum afturi í 2009, og 3:41.05 í tí sum er loyvt í dag. Astrið Foldarskarð svam seg víðari til finalur bæði í 50 frí og firvald, tá ið hon í 50 frí svam sjeyndbestu tíð 27.09, og í firvald sættbestu tíð 28.58. Markus Joensen svam 10. bestu tíð 26.16 í 50 firvald, og 13. bestu tíð 30.54 í 50 bringu.
Alvi Hjelm megnaði í kvøld at vinna sær bronsuheiðursmerki á Vestdanske Kortbanemesterskaber í Århus, tá ið hann í 400 metra frísvimjing svam teinin uppá 4:01.37, har besta tíð hjá honum er 3:58.52. Føroyski Frans Johannesen vann gull í somu grein, við tíðini 3:58.93, og í millum teir báðar Alva var so Anton Bromer sum svam 3:59.61. Alvi og Frans vunnu eisini bronsu í 4×200 metra frí, har teirra lið Esbjerg svam 7:43.57 aftanfyri Aalborg 1 á 7:26.28 og AGF 1 á 7:42.06, har Alvi sum fyrsti maður í stafettini svam 1:56.15, í mun til sína bestu tíð í 200 frí á 1:54.00. Í 50 frí svam Guðrun Mortensen seg víðari til finalu, við triðbestu tíð 26.96 aftanfyri Julie Levisen úr Aalborg á 25.94 og Line H. Vestergaard úr Silkeborg á 26.88.
Sum tit kunnu lesa millum annað í Israel Today og SwimmingWorld, so hevur ein gøla stungið seg upp eftir World Cup stevnunum í Dubai og Doha, tí at vertirnir har eftir øllum at døma bevíst ikki vildu vísa neyðuga virðing fyri ísraelskar luttakarar. Teir høvdu nevniliga millum annað valt at vísa blankt flagg út fyri svimjaranum Amit Ivry, sum vann silvur í Doha.
Nú hevur altjóða svimjisambandið FINA sent út pressuskriv, at hetta ikki var í lagi, at teirra egnu fólk har beinanvegin fingu tað rættað, og at fyriskipararnir í Duba og Doha hava fingið eina ávaring.
FINA gave a warning to the Organisers of the two FINA Swimming World Cup meets and recalled them that the FINA rules must be equally applied by all FINA National Federation
Sambært svimjinevnd SSF er svimjistevnan útsett sum skuldi verða í Fuglafirði nú leygardagin 26. oktober, og vit síggja nú eisini at hon ikki longur stendur í kalendaranum hjá Svimjisambandi Føroya. Fyrsta svimjistevna fyri yngru bólkarnar verður tí sambært kalendaranum ikki fyrr enn Reysta-stevnan í Leirvík hin 23. november.
Aftur í dag gekk tað gott hjá Magnusi Jákupssyni á Svenska Simspelen 2013 í Väsby; í 50 rygg vann hann gull við nýggjum stevnumeti 24.64, og í 200 rygg vann hann eisini gull við tíðini 1:58.09, so at hann tilsamans hevur vunnið gull á øllum trimum ryggteinum, umframt silvur í 50 firvald. Magnus varð eisini heiðraður fyri besta mannliga avrik á stevnuni, fyri vinnaratíðina 52.63 í 100 metra ryggsvimjing í gjár, sum gevur 804 FINA stig.
Teir báðir Óli Mortensen og venjari Kristian Martin Joensen úr Havnar Svimjifelag eru nú komnir til Doha í Qatar, har Óli í morgun luttók í 400 metra frísvimjing.
Og nú gekk heilt gott; tíðin hjá Óla var 3:56.38, sum er persónligt met í mun til hansara 3:57.16 frá NJM í Finnlandi í fjør.
Óli varð nummar 17 av 25, ella nummar 3 av 5 um vit bara hyggja at teimum sum eru árgang 1996 ella yngri. Sí úrslitalistan her.
Her er ein ‘teasari’ frá World Cup í Doha …
Magnus Jákupsson kappast á Swedish Swim Games 2013 hetta vikuskiftið, har hann í dag við nýggjum persónligum meti (og stevnumeti) 52.63 vann gull í 100 metra ryggsvimjing, og síðani silvur aftur við nýggjum persónligum meti 24.03 í 50 firvald. Til samanberingar stóð føroyska metið í 50 frí (ella ‘yvirhøvur’) heilt leingi á 24.05, sum var Heini Rasmussen (silvur) á Oyggjaleikum í 1997.
(Stuttlig mynd hjá Daniel Skaaning av NTC-svimjarum á Swedish Swim Games 2013)
