Ja, hetta vendir rætta veg – SwimmingWorld.TV ynskir at sleppa vísa landsdystin millum Føroyar og Ísland, og Kringvarp Føroya er sinnað at loyva tí. Talan verður ikki um beinleiðis sending, men um at vit koma at senda teimum riðlarnar ein-og-ein, so at fólk sjálvi kunnu velja hvørjar kappingar tey vilja síggja. Kringvarp Føroya fer væntandi at vísa stevnuna beinleiðis á síni heimasíðu, og hartil verður hon so at síggja í sjónvarpinum, nú leygarkvøldið.
FINA fer at senda beinleiðis á netinum frá øllum World Cup stevnum
Super, tað sær út til at FINA hevur tikið seg ordiliga saman í ár, til at skipa fyri ‘live stream’ frá øllum World Cup stevnum í oktober og november á éinari “FINA TV” síðu, byrjandi við stevnuni í Dubai nú í vikuskiftinum. Sí eisini fina.org.
DR Sporten við Páli til Stockholm og Vágs
Nú er tað so offisielt váttað, at DR Sporten fer at fylgja við Páli til World Cup í Stokkhólmi, og síðani ferðast við føroyska landsliðnum aftur til Føroyar. Í Føroyum fara tey so at fylgja honum nakrar dagar í venjing í Vági, til at síggja hvussu hesin heilt serstaki OL-kandidatur venur. Fyrr ella seinni verður tað so til eina vangamynds-sending um Pál, har tey partvís greiða frá hansara lívi og venjing heima í Vági, og partvís fylgja honum á World Cup stevnuni í Stokkhólmi. Puha, man má nokk heldur til at finna sína fínu skjúrtu fram ! 🙂
Týskur methavari sera fegin um at svimja upp ímóti Páli
Hetta er heilt surrealistiskt, at síggja hvussu ein týsk svimjistjørna leggur mynd út av sær og Páli á Facebook, og reypar av at svimja upp ímóti føroyinginum. Yannick Lebherz eigur týska metið í 400 blandað, sum er 4:05.08 frá EM í Eindhoven í 2010. Nú um vikuskifti kappaðust hann og Pál á “Postdamer Kurzbahnmeisterschaften”, og lýsir hann har hæddarpunktið at vera tá ið hann í 400 frí svam líka skjótt sum Pál, 3:50.62. Pál var sum kunnugt mitt í harðari venjing, har ‘Hoffie’ hevði sett hann at svimja 100 + 200 + 400 + 1500 + 400 blandað, við venjing inn í millum, og har Pál vann alt uttan 200 frí.
“Das Highlight war mit Sicherheit der geteilte erste Platz mit Pal Joensen über 400m Freistil. Ein echt spannendes und amüsantes Rennen, das wir in 3:50,62 beendeten.”
Langhylurin í Bergen verður ‘óvurderiligur’ fyri norska svimjing
Hvørki forsetin í norska svimjisambandinum Per Rune Eknes ella landsliðsstjórin Petter Løvberg eru í iva, at langhylurin ‘Helleren’ í Bergen fer at hava ómetiliga týdning fyri økið har á vestlandinum, og fyri norska svimjing sum heild. Norðmenn eiga enn einki veruligt 50m svimjistadion, og komandi langhylurin er tí at samanbera við eitt fótbóltsstadion fyri ein fótbóltsspælara, kanska trupult hjá ‘vanligum’ fólki at skilja týdningin av, men ein risa munur í dagligdegnum hjá íðkaranum. Ein konkret ætlan er at fáa EM á stuttgeil til Bergens í desember 2013, um altso høllin verður klár tá. Les Brostein, via www.simma.nu/no
Startlistin til World Cup í Stockholm er klárur
Ja so er startlistin til World Cup í Stokkhólmi at finna her á www.simforbundet.se. Vit síggja millum annað at Pál fer at fáa skarpan gang frá sjálvum Paul Biedermann í 400 frí, og at hann (Pál 🙂 er styrkismettur sum nr 1 í 1500 frí. Okkara yngru svimjarar eru at finna niðarlagari á listunum, miðskeiðis og eitt sindur longur aftarlaga í sínum kappingargreinum, men tó ongantíð aftast.
Continue reading Startlistin til World Cup í Stockholm er klárur
Leadville, danski ‘loynidómurin’ í Colorado
Áhugaverd grein og videobrot her á 9news.com, um hvussu Paulus Wildeboer fyri triðju ferð hevur tikið danska landsliðið og onnur við sær til fyrrverandi silvurnámsbýin Leadville, 3000 metrar uppi í Colorado-fjøllunum, at venja í eyka høgari hædd. Tað er ein rættiliga avanserað hæddarvenjingarteknikkur sum hann hevur uppbygt, ið umfatar at fyrireika seg í iltteltum áðrenn, fara upp í hasa heilt høgu hæddina, og síðani niður aftur í meira vanligar 2000 metrar, og síðani aftur at sova í iltteltum, til at fáa so góða effekt sum gjørligt.
Continue reading Leadville, danski ‘loynidómurin’ í Colorado
Natholdet hyggur at turr-svimjingini
Ógvuliga láturligt, ja, men tað syrgiliga er at nógvir danskir kommunalpolitikarar hava hildið hetta verða rætta loysn. Lukkutíð bjargar tíðin okkum ofta, í dag eru hesir somu til láturs.
Ingibjörg og Eygló settu nýggj met í 50 rygg í dag
Ahem, ein landsdystur ímóti Íslandi verður kanska ikki heilt so lættur at vinna, um íslendarar senda síni bestu. Í gjárkvøldið setti Ingibjörg Kristín Jónsdóttir úr Sundfélagi Hafnarfjarðar til dømis nýtt íslendskt met í 50 metra ryggsvimjing, við 28.45 har gamla metið hjá Sarah Blake var 28,91, umframt at Eygló Ósk Gústafsdóttir úr Ægi setti nýtt ‘stúlknamet’ við 28.69. Til samanberingar er føroyska metið og juniormetið hjá Biritu Debes 29.00, so hon má rubba seg um hesar báðar koma við til Føroyar.
Pál Joensen undir pressi í Potsdam
Pál Joensen er hendan mánaðin í Potsdam, tríggjar vikur upp undir World Cup í Stokkhólmi (minus eitt lítið svipp til Føroyar ísv landsdystin), har hann av sonnum verður pressaður av venjaranum Jörg Hoffmann. Vit tosa um tríggjar ferðir venjing um dagin, umframt ymiskt annað stuttligt sum ein kapping í Berlin í dag har Pál svam 100 + 200 + 400 + 1500 frí og 400 blandað, og vann alt uttan 200 frí. Tíðirnar vóru 51.96 í 100 frí, 1:52.11 í 200 frí, 3:50.62 í 400 frí, 15:15.46 í 1500 frí og 4:34.12 í 400 blandað, alt á stuttgeil, har Jón Bjarnason úr Calella viðmerkir ‘ikki nakað at reypa av, men nokk til at vinna’, og at 200 meturin reyk tí at 1500 frí var beint áðrenn. Og á ja, so vandi hann millum kappingarnar 🙂
