HS stevnan kom bara heilt væl í gongd í morgun, tá ið Pál Joensen longu í øðrum riðli sett nýtt føroyskt met, við at svimja 400 blandað í tíðini 4:34.41. Aðrar tíðir vóru eisini heilt nær at metunum, tá ið t.d. Shaila millum Garðarnar svam undir 30 í 50 firvald (metið er 29.89), og Kári á Høvdanum svam umleið somu tíð sum metið hjá sær í 100 rygg.
Category: Kapping
Jacob Carstensen sett heimsmet
Danski Jacob Carstensen setti farna vikuskifti masters heimsmet í 200 frí við tíðini 1:48.40, tá ið hann luttók á stevnuni East Masters Championships. Hetta var í bólkinum ‘B’, sum eru svimjarar millum 30 og 34 ár. Amerikanski Rowdy Gaines átti gamla metið á 1:50.91, sum hann setti fyri 18 árum síðani. Lesið her á swimnews.dk.
Magisku minutt mørkini
Minutt mørkini hava altíð verið nakað serligt fyri svimjarar, kannska serliga 1 minutt, í 100 frí. Men eftirhondini hava vit svimjarar undir álíkavíst 1, 2 og 4 min. í fleiri greinum, og sum vit vita nærkast onkur jú 8 og 15 min. mørkunum við ferð.
Fyrstur at svimja skjótari enn eitt minutt, var tann kendi Johnny Weissmuller(USA), sum tey flestu kenna fyri sín leiklut sum Tarzan. Men Johnny Weismuller svam veruliga skjótt. Longu í 1922 svam hann sum tann fyrsti undir minuttin, 58,6 og vann 3 gull við OL í 1924 og 2 gull í 1928.
Fyrsta kvinna undir minuttin var austraska Dawn Fraser, sum svam 100 frí upp á 59,9 í 1962.
Don Schollander(USA) var fyrsti maður undir 2 min, í 200 frí. Tað var í 1963.
Við OL í 1980 vakti tað veruligan ans, tá Vladimir Salnikov(Sovj) svam 1500 frí undir 15 min. 14.58.27
Omanfyri nevndu tíðir eru á langbana, undantikið Johnny Weismuller, har kenni eg ikki hyljastøddina.
Í Føroyum var tað Høgni Mikkelsen úr Klaksvík, sum fyrstur breyt minutt markið, hetta var í 1975 (haldi eg). Eg veit ikki hansara fyrstu tíð undir minuttið, men hansara met upp á 55,3, var sett í 1977 og stóð í 10 ár.
Elspa Mørkøre var fyrsta kvinnan undir minuttið, meini hetta var í 2006. (korigera meg um eg fari skeivur.)
Petur Heðin á Fløtti var fyrstur undir 2 min, til oyggjaleikir í Føroyum í 1989. (1.58.xx)
Í 100 firvald hava nakrir verið undir minuttið, veit ikki hvør var fyrstur, eitt boð er Jon Hestoy, onkuntíð fyrst í 80’unum.
Í 100 rygg var Kári J. á Høvdanum fyrstur undir minuttið, hetta var í 2007
Pál Joensen var fyrstur undir 4 min, í 400 frí, NJM í Havn 2007, 3.54.xx (ella var hann undir fyrr)
Stuttligt kundi verið at gitt eitt sindur um hvørji minutt mørk fara at verða brotin í næstum:
Eg eri vísur í at Pál Joensen kann svimja undir 8 min, í 800 frí, hann liggur undir 4 til venjing, fleiri ferð sama dag !
Tað næsta verður nokk eisini Pál, í 1500 frí, undir 15 min. Eg rokni við at hetta markið verður brotið í ár !
Eg giti at vit eiga onkran sum er mentur at fara undir minuttið í 100 IM – eitt boð?
Eg haldi eisini vit eiga menn/dreingir sum áttu at komið undir 2 minutt, fyrst í 200 rygg, hareftir í 200 firvald; hvat av hesum kemur fyrst, hvør og nær ?
Hjá kvinnum/gentum er nokk nakað longri til næsta minutt markið verður brotið, ella …
Eitt boð kundi verið 200 frí.
Harnæst 100 firvald, og evt 100 rygg, men her er eitt fitt petti enn !
Tey seinastu minutt mørkini eg vænti verða brotin eru:
200 IM og 100 bringu hjá monnum; havi ringt við at fáa eyga á nakran sum kann fremja hetta, men er nakar í yngra ættarliðnum sum man megna hetta ?
Innbjóðing til HS stevnu 26.-27. januar 2008
Viðfest er innbjóðing og tilmeldingarfíla til HS stevnu komandi vikuskifti. Gevið gætur at tilmeldingarfreistin er longu nú í morgin, hóskvøld 24. januar kl 21. Eftir øllum at døma hava flest øll fingið hesa innbjóðing, sum skulu brúka hana; men síðani eg sjálvur ikki fekk hana fyrr enn nú eg bað um hana, so leggi eg hana bara her á heimasíðuna eisini 🙂
Skeggjar stevna 2008
Hey øll somul
Bert ein áminning. Tilmeldingarfreistin til Skeggjar-stevnuna er leygardagin 26.jan.
Við svimjikvøðu
Rúni
18 føroysk met, 3 gull, 3 silvur, 4 bronsu
So góð var úrtøkan hjá Suðuroyar Svimjifelag á langteinastevnuni Reykjavíkar International 2008. Jón Bjarnason rósti serliga Maluna V. Bærendsen í Útvarpinum, fyri at hava sett 7 føroysk met í trimum greinum og sum heild at hava svomið gott alt vikuskiftið; men helt tó eisini sum heild at tey øll høvdu rós uppiborið. Lesið um metini her á susvim.com.
Og nú 12 met í Íslandi
Tey koyra á har vesturi. Malan Vitalis Bærendsen betraði um sítt met í 200 bringu, sum hon annars setti í morgun, og setti samstundis met í 100 bringu á veg til teir 200. Og Pál betraði um sítt met í 200 firvald, eisini frá í morgun. Lesið og síggið myndir á susvim.com.
9 føroysk met sett í Reykjavík til nú
Dánjal Martin, Malan, Pál og Shaila hava sett hvør sítt føroyska met í morgun, í ávíkavist 100 bringu (1.10.94), 200 bringu (2.51.39), 200 firvald (2.18.05) og 100 firvald (1.09.87). Hartil svam Malan eina tíð í innleiðandi 50 bringu í gjár, sum átti at hava verið føroyskt met við tíðini 36.60, men sum vegna tekniskar trupulleikar hjá fyriskiparunum gjørdist bara 38.67. Lesið m.a. frásøgn hjá Susvim-venjaranum á susvim.com. Continue reading 9 føroysk met sett í Reykjavík til nú
HS best á FLOT stevnuni 2008
So er FLOT stevnan 2008 endaliga avgreidd, og úrslitið varð at Havnar Svimjifelag vann flest gullheiðursmerki, Ægir næstflest og Susvim triðflest. Besti svimjari á stevnuni var Jóhannes Agnarsson úr Havnar Svimjifelag, sum vann 5 av teimum 7 gullheiðursmerkini sum felagið fekk tilsamans.
Her eru tað tó nakrir glaðir dreingir úr Klaksvík sum eru ovast …
FLOT stevnan væl á veg
Svimjararnir í bólki 1 hava svomið í kvøld, og í morgin árini verður tað so bólkur 2. Stevnan hevur fyri so vítt gingið upp á stás, men vit fingu tó onkrar undarligar trupulleikar við stevnuforritinum WinGrodan her móti endanum, sum viðførdi at viðfestu úrslitalistar ikki umfata ta allarsíðstu kappingina (kapping 12, 4×33 frí hjá gentum).
Úrslitið var har annars at Ægir genturnar vunnu klárt í tíðini 1.57.00, meðan Reki gjørdist nummar 2. Eg havi ikki tíðina hjá Reka her, men hon var so vítt eg minnist 2.46 okkurt. FS hevði eisini eina stafett, sum tó tíverri varð kolldømd tí at ein genta gavst.