Sára 4:55.81 og føroyskt met í 400 blandað

Sára Ryggshamar Nysted úr Suðuroyar Svimjifelag setti nú tíðliga sunnumorgun stórt nýtt føroyskt met og juniormet í 400 metra blandaðari svimjing, tá ið hon á HS-stevnuni í Gundadali svam teinin uppá 4:55.81. Poula Øssursdóttir Mohr átti føroyska metið á 4:57.64, frá Ægir-stevnu í 2013, meðan Sára sjálv átti juniormetið á 4:59.32 frá SuSvim stevnu í mars mánaða.

Video frá úttøkustevnuni í dag

Her eru nakrir riðlar frá SMS úttøkustevnuni til oyggjaleikir og Baku, sum Havnar svimjifelag skipar fyri hetta vikuskiftið. Fleiri svimjarir svumu undir kravtíð millum annað Óli Mortensen og Marius Ihlen Gardshodn úr HS í 400 frí hjá monnum (riðil 3, geil 4); Astrið Foldarskarð (HS), Jonna Bjartalíð Thomsen (Ægir) og Lív Eidesgaard (HS) í 50 firvald (riðil 4, geil 3, 4 og 2); Alvi Hjelm (Ægir) og Bartal Hestoy (HS) í 200 blandað (riðil 1, geil 4 og 3) og Sára R. Nysted úr Susvim í 200 blandað (riðil 2, geil 3).

Tíðin hjá Sáru R. Nysted í 200 blandað var 2:19.78, sum sær út til at vera nýtt føroyskt met og junior met. Tó, úrslitini her skulu takast við fyrivarni tí tey eru ikki váttaði. Gamla metið hjá Poulu Ø. Mohr frá NM 2012 var 2:20.21.