Spanski Aschwin Faber Wildeboer setti í gjár heimsmet í 100 rygg á stuttbana, tá ið hann á sponsku stutthyljameistarastevnuni í Madrid svam teinin í tíðini 49.20. ‘Gamla’ heimsmetið var 49.32, sum russiski Stanislav Donets svam á evropameistarastevnuni í Rijeka, síðsta vikuskifti.
(Frá vinstru: Helge Meeuw, Stanislav Donets og Aschwin Wildeboer, eftir 100 rygg í Rijeka)
Continue reading Heimsmet í 100 rygg til Aschwin Wildeboer
Fraklendingar hava á stevnu í Istres í Fraklandi knúst stutthyljaheimsmetið í 4×100 frí við tíðini 3:04.98, har amerikumenn á HM í Manchester í vár svumu 3:08.44. Og teir høvdu ikki ein gang brúk fyri Amaury Leveaux og Alain Bernard, men kláraðu tað við at brúka Gregory Mallet (47.41), Fabien Gilot (44.92), William Meynard (47.65) og Frederick Bousquet (45.00). Les SwimInfo
(Frederick Bousquet, eftir 4×50 blandað á EM í Rijeka)
Løgtingið samtykti í gjár endaliga fíggjarlóg fyri 2009, har tey m.a. hækkaðu játtanina til Ítróttarsamband Føroya við 600.000 krónum, ið eru markaðar beinleiðis til úrvalsítrótt. Tað verður eftir øllum at døma ÍSF sum kemur at gera av, hvussu hesin peningur skal brúkast, við kjaki um evnið í leypi av januar mánaða.
He he, ein 12 ára gamalur ‘reef shark’ leyp herfyri úr sínum akvarium, 30 cm upp um kantin og umleið 6 metrar yvir, til ein vatnrutsjibana og niður í ein almennan svimjihyl. Har vóru eingi fólk í hylinum akkurát tá, og fyri alt tað plagdu fólk eisini at svimja saman við honum í akvariuminum. Men tíverri toldi hann ikki klorið í svimjihylinum, og doyði tí hóast umsjónarfólkini royndu at bjarga honum sum skjótast. Les telegraph.co.uk
(Carribean Reef Shark, courtesy Wikimedia Commons, GNU Free Documentation License 1.2)
Tær fýra niðurlendsku Hinkelien Schreuder, Ranomi Kromowidjojo, Inge Dekker og Marleen Veldhuis betraðu í gjár um heimsmetið í 4×100 frí á stuttbana, tá ið tær á hálendsku stytthyljameistarakappingini svumu 3:28.22, har heimsmetið hjá teimum frá heimsmeistarastevnuni í Manchester í vár var 3:29.42. Les SwimInfo
(Tær fýra eftir at hava sett heimsmet í 4×50 frí á EM í Rijeka)
Continue reading Nýtt heimsmet í 4×100 frí hjá kvinnum
Tíðindaskriv úr Klaksvík …
Í samband við kappingina “Klaksvík National”, var skipað fyri lutaseðlasølu undir kappingunum, har vinningarnir vóru fartelefonir, sum Føroya Tele hevði latið.
Avgjørt var at yvirskotið frá lutaseðlasøluni skuldi fara til eitt vælgerandi endamali býnum, og fall valið á tilhaldið fyri eldri “Sóljuna” í Klaksvík.
Í samband við at tilhaldið skipaði fyri jólaborðhald fyri eldri á Klaksvíkar Sjómansheimið, handaðu umboð fyri Ægir, Símun Akursmørk og Kaj Dam, leiðaranum fyri tilhaldinum, Mamy Dahl Sørensen, ein kekk áljóðandi kr. 2.500,-
Continue reading Ægir letur stórfingna gávu til tilhaldið “Sóljuna”
USA og Evropa hava longu mótmælt teimum nýggjum draktunum, serliga tá ið tað kemur til yngri svimjarar, og nú heitir eisini Avstralia á altjóða svimjisambandið FINA, um at gera nakað við mátan sum draktir verða góðkendar. Tey vilja bíða til FINA hevur viðgjørt málið, fyrst í 2009, men seta tó longu nú forboð ímóti ‘superdraktum’ í yngri aldursbólkunum.
Og teirra forboð er nokk so vítt umfevnandi. Dreingir mugu bara brúka draktir sum ganga frá mjødnini av og niður á knæ, og gentur skulu brúka draktir við berum ryggi og bara stroppar um akslarnar. Og hartil verður forboð sett ímóti lynlásum og líknandi í draktini, til at fyribyrgja fyri veruligum ‘kompressiónsdraktum’ (t.e. at draktin situr so stramt, at miðjan á svimjaranum er totalt stív).
Kelda: SwimNews
Continue reading Avstraliumenn forbjóða lynlásum í juniordraktum
Evropeiska svimjisambandið LEN fundaðist leygardagin um draktirnar, og biður nú offisielt altjóða svimjisambandið FINA um at fáa í lag betri reglur. Serliga ynskja tey betri reglur um hvussu nógvar draktir svimjarin má brúka í senn, um hvørji evni draktirnar kunnu gerast burtur úr, og eina betri sertifisering. Les t.d. SwimNews
Avstralski høvuðsvenjarin Alan Thompson ávarar um tey fara at fáa trupult við at standa seg í altjóða kapping, nú stuðulin til teirra toppsvimjarar verður fastfrystur til somu umleið 16 milliónir krónur um árið, sum tey hava skula klára seg við tey seinastu 4. Orsøkin er serliga fíggjarkreppan sum er um allan heim í løtuni, og til samanberingar er fíggjarætlanin hjá bretskari svimjing minst 51 milliónir krónur um árið, hvørt ár fram til OL í London í 2012. Les AFP á Google
Sum tit kunnu lesa t.d. her í The Independent, so skrivaðu venjarar úr millum øðrum 15 av 17 teimum størstu evropeisku svimjitjóðunum undir mótmæli ímóti nýggju superdraktunum, á EM í Rijeka í síðstu viku. Teir ynskja betri kontrol av hvørjar draktir sum verða loyvdar, og krevja at draktirnar eru á marknaðinum í minst 12 mánaðir, áðrenn tær verða loyvdar á stóru meistarastevnunum.
Continue reading Breitt mótmæli ímóti nýggju superdraktunum, frá venjarum á EM
