Kári J. á Høvdanum vann silvur í 50 rygg og var nær við at taka gullið eisini. Pál Joensen var heilar tvær longdir framman fyri nummar tvey í 1500 frí, í nýggjum føroyskum meti. Vinarliga hyggið á njm2007.com og livetiming.se, tí vit eru eitt sindur ov pressaði her til at orka at dagføra fleiri heimasíður í senn 🙂
 |
| From NJSC 1. session |
Tað hava verið rættiliga nógvar rættingar gjørdar til startlistan sum eg sendi út fyrradagin, og viðfest er tí ein nýggj útgáva, sum eg eisini havi sent luttakandi londum at rættlesa, lagt á njm2007.com og dagført LiveTiming við. Har burdi ikki verið nógv eftir at rætta, men sigið endiliga frá um tit finna okkurt.
Continue reading NJM 2007 startlisti – næsta útgáva
Sambært tíðindunum her á SwimNews ætlar amerikanska svimjisambandið at senda beinleiðis frá meistarastevnuna í stuttum hyli nú 30. november til 1. desember, á heimasíðuni SwimNetwork.com sum er gjørd serliga til endamálið. Meistarastevnan er í 25 yard hyli, men er tó so eisini úttøkukapping til HM í 25 metra hyli í Manchester í vár.
Tað sær bara heilt gott út fyri Føroyar, nú fyribils startlistin er klárur at eftirmeta. Pál liggur til at vinna gull í 400 og 1500 frí, umframt eina bronsu í 200 frí. Kári J. á Høvdanum er seedaður til silvur í 50 rygg, og er eisini rímiliga nær teimum bestu til at kunna at vinna heiðursmerki í 100 og kanska 200 rygg. Restin liggur í lægra endanum, men møguliga kunnu tey pressa seg eitt sindur upp, nú vit eru á heimabana.
Startlistin liggur eisini á www.njm2007.com, og er annars sendur øllum limalondum at eftirmeta. Hann er tastaður inn (av mær) í einum, seigum strekki, so tað kann væl hugsast at har eru nakrar prentvillur og annað sum skal rættast komandi dagarnar.
Elspa Mørkøre hevur í hesu viku sambært sport.fo svomið tíðir í bringu og firvald, á innanhýsis stevnu hjá WestSwim í Esbjerg, sum eru betri enn føroysku metini. Hetta var á innanhýsis stevnu hjá WestSwim í Esbjerg. Men gev gætur at tíðirnar sum er ikki eru góðkendar sum føroysk met.
Elspa svam 100 bringu í tíðini 1:15.83, sum er heili 2½ sekund skjótari enn metið hjá Maluni V. Bærendsen á 1:17.23. Harvið hevur Elspa svomið skjótastu tíð á 100 metrar í øllum greinum, um enn hon enn offiselt eigur metið í teimum trimum.
Í 50 firvald svam hon 29.37, har metið hjá Shailu millum Garðarnar er 29.89.
Men altso, hetta skal alt takast við størsta fyrivarni; tí fyri tað fyrsta er tað meira enn so komið fyri at Svimjisamband Føroya ikki hevur góðkent slík met svomin av einstaklingi uttanlanda, og fyri tað næsta er tað nokk ein spurningur um man yvirhøvur kann seta met á innanhýsis stevnu, um einki annað felag eisini luttekur.
Stjørnurnar á 100-teininum undrast sambært hesi grein í SwimNews á at Stefan Nystrand kundi svimja so skjótt longu nú, tá ið tað enn er langt til OL í Beijing. Teir halda at tað má vera tekin uppá ov lítla tunga venjing beint nú, og tað tí er ivasamt um Nystrand kann møta á OL við líknandi formi.
Pieter van den Hoogenband viðgongur at hann ikki kann svimja 45.83 á stuttbana nú, og at hann yvirhøvur bara kann svimja harum einar 2-3 ferðir um árið, men at hann nokk skal vera klárur á langbana í Beijing. Sama sigur kanadiski Brent Hayden, at hann hansara venjingarnøgd í løtuni ikki loyvir honum at svimja so skjótt, men at alt tað broytist til OL. Og italski Filippo Magnini sigur seg beinleiðis vera róligur, at Nystrand ómøgliga kann halda handan formin teir komandi 9 mánaðirnar, við so lítlari venjingarnøgd sum Nystrand hevur.
Nystrand venur nevniliga ikki meira enn 20 km um vikuna, har hinir lættliga hava tað trífalda. Magnini flennti í samrøðurni og segði at hann svam 13-14 um dagin. So stóri spurningurin er nú um Nystrand fer at kunna svimja so skjótt, ella um hinir hava rætt at hann ikki kann halda seg á slíkum støði við so lítlarni venjing. Livst so spyrst.
Nú verður tað gott nokk sagt at franska Manadou ikki hevur 800 frí sum eina av sínum sergreinum longur, og heldur brúkar teinin sum test og styrkiroynd til at gerast betri í 200 og serliga 400 frí. Men tað var tó so ein stórhending tá ið hon nú doyði móti endanum av teimum 800 á fronsku meistarastevnuni, og tískil ikki longur er besti franski svimjari á teininum. Lesið í SwimNews.
So eru úrslitini komin frá fyrsta parti av Silva Cup 2007, og fyri eina ferð skyld er FLOT ovast! Birita Debes stóð fyri størsta hálið við at vinna 3 gull og 2 silvur, í flottum tíðum sum 29.87 í 50 frí og 1:13.22 í 100 rygg.
Continue reading Úrslit frá Silva Cup, bólkur 3
Um eina viku møtast 89 svimjarar úr Norðanlondum í høllini í Gundadali, at kappast um norðurlendsku juniormeistaraheitini. Føroyingar luttaka við 11 svimjarum, harav serliga vágbingurin Pál Joensen kann føra til at føroysk svimjing verður kend og viðurkend sum ongantíð áður.
Éitt heiðursmerki er nóg mikið til at útlendingarnir fara at nikka viðurkennandi til føroyingar, líka mikið um tað bara eru úr bronsu. Eitt silvurheiðursmerki er líka gott sum fyri tveimum árum síðani, og prógv um støðugt høgt støði í Føroyum (í fjør vunnu vit 4 bronsu). Eitt gullheiðursmerki? Well, tað hevði ljóðað utopiskt fyri bara fáum árum síðani, og hevði kanska viðført at útlendingarnir heldur stirnaðu enn at nikka.
Men Pál kann vinna fleiri. Gullheiðursmerki. Í løtuni er støðið hjá honum sambært altjóða ranglistunum so høgt, at hann kann gera seg alvorliga galdandi í øllum fríteinum frá 200 til 1500. Banka undir borðið og alt hatta har, men hann liggur altso til fínastu heiðursmerki, um ikki útlendingarnir hava krógvað síni størstu talent.
Samstundis gerst Kári á Høvdanum bara betri og betri, og er tí at rokna sum okkara jokari á stevnuni. Svimur hann upp um sítt besta, og hinir kanska ikki liva heilt upp til sítt, so kann alt henda. Og hendir tað – vinnur Pál gull, og Kári eisini okkurt – so er tað líka við at hini eisini kunnu gera seg galdandi. Tí tá kunnu vit gera okkum dælt av øllum tí sum hoyrir til at vera á heimabana, meðan hini í skelki spekulera uppá hvat tað var sum hendi.
NJM er størri enn Oyggjaleikir, tá ið tað kemur til góðsku á svimjarum. Norðurlond eru ikki at kimsa at, tí serliga sviar eru støðugt í heimsflokki, meðan hini londini eisini ferð eftir ferð stinga seg upp í millum. Og tað er tí ikki so langt frá einum norðurlendskum juniormeistaraheiti til eitt evropeiskt, sum man kanska hevur hug til at halda. Og EJM… EJM er longu komandi summar !
Í kvøld og í morgin skipar svimjifelagið Reki fyri Silva Cup í Leirvík, fyri svimjarar í yngru bólkunum 1 til 3. Bólkur 3 byrjar at hita upp í kvøld kl 18:30, og í morgin er tað so bólkur 1 kl 8 og bólkur 2 kl 12. Sí eisini viðfestu innbjóðing, men gev gætur at upphitingin í kvøld er flutt í mun til innbjóðingina, frá kl 19:15 til kl 18:30.
