Evropameistarastevnan á stuttgeil 2025 verður í Lublin í Póllandi í næstu viku, við luttøku av eisini fýra føroyskum svimjarum. Luttakaralistarnir síggjast nú her á heimasíðu EA, sum benda á harða kapping, men eisini møguleika fyri at staðfesta stig 2 í úrvalsskipan ÍSF, sum er at røkka topp-32 á EM, HM ella OL.
Føroysku tilmeldingarnar eru:
- Bartal E. Eidesgaard (2003, HS) 22.60 í 50 frí (#60 av 70)
- Bartal E. Eidesgaard (2003, HS) 49.27 í 100 frí ( #62 av 77)
- Líggjas Joensen (2008, Ægir) 1:47.80 í 200 frí (#62 av 81)
- Líggjas Joensen (2008, Ægir) 3:48.74 í 400 frí (#38 av 64)
- Líggjas Joensen (2008, Ægir) 7:55.67 í 800 frí (#30 av 38)
- Bartal E. Eidesgaard (2003, HS) 27.83 í 50 bringu (#53 av 61)
- Bartal E. Eidesgaard (2003, HS) 1:00.51 í 100 bringu*
- Lea O. Højsted (2008, Ægir) 26.87 í 50 frí (#45 av 48)
- Elisabeth Erlendsdóttir (2005, HS) 28.03 í 50 rygg (#28 av 37)
- Elisabeth Erlendsdóttir (2005, HS) 1.00.26 í 100 rygg*
- Lea O. Højsted (2008, Ægir) 32.11 í 50 bringu (#40 av 43)
- Lea O. Højsted (2008, Ægir) 1:08.89 í 100 bringu (#39 av 43)
- Lea O. Højsted (2008, Ægir) 1:04.95 í 100 blandað*
*Okkurt galið við hesum listum, so at styrkismetingin ikki er røtt
Føroyingarnir luttaka hartil í 4×50 frí og 4×50 blandað fyri mix-lið, har tað sær út til at møguleikarnir eru OK at enda í topp-32, í øllum førum í aðrari liðsvimjingini.
Føroyskir svimjarar hava longu fleiri ferðir staðfest, at vit hoyra til á stigi 2 í úrvalsskipan ÍSF, tá ið tað kemur til kappsvimjing bæði sum einstaklingar og sum lið. Men, tað er væl altíð gott at staðfesta støðið, og at leggja svimjarar afturat sum einstaklingar ella sum partur av eini liðsvimjing.
EM á stuttgeil 2025 verður í Lublin í Póllandi frá týsmorgni 2. desember til sunnukvøld 7. desember 2025. Við teimum fýra, eru ferðaleiðari Sabina Poulsen og venjari Jon Hestoy, umframt at Rakul í Lágabø og Dan Hjelm eru við sum dómarar.