Svimjifelagið í Eysturkommunu hevur fingið sær heimasíðu á www.reysti.com, við myndasavni og gestabók og upplýsingum um venjingartíðir og líknandi.
Startlistin til FOMM 2011
So er skráin klár til næstu Føroysku Opnu Masters Meistarastevnu. Vit síggja longu í fyrstu kappingum at teir báðir Jon Hestoy og Høgni Mikkelsen ikki fara at endurtaka holmgonguna í 50 firvald, men at vit hinvegin sleppa at síggja kempur sum Kristian Olsen, Martin Venned og Heina W. Rasmussen í hylinum aftur. Hjá kvinnum verður tað nokk serliga Durita Djurhuus sum fer at imponera, umframt ein rúgva av øðrum gengangarum frá í fjør.
DIF lanserað læringsportal um ítróttarskaðar
Dansk Idræts-Forbund hevur saman við itai a/s lanserað hendan portalin um ítróttarskaðar, við ráðgeving um fyribyrging, skaðaviðgerð og enduruppvenjing. Eitt tað mest áhugaverda er nokk teirra app “Idrætsskader – nej tak” til Android og iPhone, ið inniheldur vegleiðingar til at meta um og hjálpa uppá mest vanligu ítróttarskaðar, við smáum videobrotum og sovorðnum. Ávaring, tað fyllir eitt sindur, til dømis eini 35 MB til Android.
Viagra-spam á svimjing.com
Aja, so kom túrurin til okkum eisini. Fyri tíð síðani uppdagaðu vit at spam-leinki um Viagra kom á Facebook um fólk nevndu svimjing.com har, og nú uppdagi eg at hetta eisini kemur fram um man leitar á Google eftir svimjing.com. Hetta er okkurt ‘phishing’-ting … eg veit ikki hvussu álvarsligt, men eri farin undir at skifta alla kotu út á svimjing.com, eftirkanna dátugrunnin, dagføra alt og deaktivera eitthvørt óneyðugt, til at royna at fáa skil á aftur.
Rikke Møller Pedersen um sýruvenjing og laktatmátingar
Videodagbók úr Flagstaff, har danski landsliðssvimjarin Rikke Møller Pedersen greiðir frá sýruvenjing á hæddarlegu í Flagstaff, og tilhoyrandi mjólkasýrumátingar.
Wauw, Sun Yang hevur eina heilt ókey rødd
Eitt sindur ‘auto-tune’ hoyrist, men tó týðiligvís snjøll og klár, umframt at hann sort-of ‘moves like Jagger‘. Hsieh Hsieh Sun Yang ! Via SwimmingWorld Magazine á Twitter.
Úrslit frá Ægir-stevnuni 5. og 6. november 2011
Viðfestur er úrslitalistin frá úttøkustevnuni í Klaksvík her um vikuskiftið, umframt RE- og lef-fílur til hagtalsbrúk. Tilsamans 4 føroyskt met og 2 juniormet varð tað til, umframt at 10 svimjarar vórðu úttiknir til NJM í Reykjavik í desember, 4 aðrir til NM samstundis, og 2 til EM á stuttgeil í Stettin. Mest vinnandi felag varð Suðuroyar Svimjifelag við 18 gull, 15 silvur og 13 bronsu, mest vinnandi svimjari Pál Joensen úr SuSvim við 9 gull og 1 bronsu, og mest vinnandi kvinna Turið S. Christiansen úr Ægir við 4 gull.
Continue reading Úrslit frá Ægir-stevnuni 5. og 6. november 2011
SuSvim-menn 7:54.67 og føroyskt met í 4×200 frí
Teir fýra Eyðbjørn Joensen, Sofus Bech, Jón Hofgaard og Pál Joensen úr Suðuroyar Svimjifelag settu í kvøld nýtt føroyskt met í 4×200 metra frísvimjing, við tíðini 7:54.67 har metið hjá somu fýra frá SuSvim-stevnu í januar mánaða 2011 var 7:55.70.
Ægir-kvinnur 8:47.38 og føroyskt met í 4×200 frí
Tær fýra Ægir-dámurnar Victoria W. Eysturdal, Cecilia W. Eysturdal, Victoria Biskopstø og Turið S. Christiansen settu í kvøld stórt nýtt føroyskt met í 4×200 metra frísvimjing, við tíðini 8:47.38 har metið hjá Ægir frá Ægir-stevnu í mars mánaða 2010 var 8:58.93.
Astrið 28.45 og føroyskt met í 50 firvald
Rituvíksgentan Astrið Foldarskarð setti fyri løtu síðani nýtt føroyskt met í 50 firvald, við tíðini 28.45 har føroyska metið hjá Biritu Debes var 28.85. Astrið svimur fyri Ægir í Klaksvík, og kláraði við hesum at kvalifisera seg til norðurlendsku meistarastevnuna í Íslandi í desember, har kravtíðin er 28.74. Kristina Eliasen úr Havnar Svimjifelag megnaði eisini at svimja undir tað nú fyrrverandi metið og kravtíð til NM við 28.73.
