svimjing.com

Her er innbjóðing til svimjistevnu í Klaksvíkar Svimjihøll leygardagin 11. og sunnudagin 12. februar 2017, sum Ægir skipar fyri. Hetta er opin stevna fyri allar aldursbólkar, og samstundis næstseinasti kjansur at klára kravtíð til Oyggjaleikir 2017.

Frans Johannesen vann aftur í dag heiðursmerki á Lyngby Open 2016, tá ið tey avgreiddu 4. og 5. part av stevnuni har. Fyrrapartin varð tað til gull í 200 blandað, tá ið hann svam tann teinin uppá 2:13.56, og seinnapartin varð tað so vist nokk til 30.25 og silvur í 50 bringu, 54.97 og silvur í 100 frí og 25.07 og bronsu í 50 frí. Sí úrslitalistarnar her.

Teir báðir Óli Mortensen og Frans Johannesen vunnu sær hvør sítt bronsuheiðursmerki, tá ið finalurnar á stytri teinum vórðu avgreiddar í kvøld, á Lyngby Open 2017. Óli vann bronsu við 26.48 í 50 firvald, og Frans við 25.17 í 50 frí.

Alvi Hjelm vann sær í dag eitt silvurheiðursmerki í 200 metra bringusvimjing, tá ið hann á Lyngby Open 2017 svam teinin uppá 2:30.86, aftanfyri danska Jacob Klint Axelsen á 2:29.93 men frammanfyri svenska Joakim Löfgren á 2:31.32. Hetta var vist nokk besta tíð hjá Alva, í mun til hansara 2:32.13 frá FM á langgeil 2016. Pál Joensen eigur føroyska metið á 2:21.71, frá Bergen Swim Festival 2015.

Frans Johannesen vann yvirbevísandi 200 metra frísvimjing á langgeil, tá ið tann greinin varð avgreidd nú í dag, við tíðini 1:55.49 har Þröstur Bjarnason úr Íslandi varð nr 2 við 1:59.45 og Alvi Hjelm nr 3 við 2:00.43. Besta tíð hjá Alva er 1:56.94 í hesi grein, meðan Frans hevur svomið 1:46.18.

Óli Mortensen vann fyri løtu síðani gull í 400 metra blandaðari svimjing á langgeil, tá ið tey avgreiddu ta kappingina á Lyngby Open 2017. Tað var rættiliga sannførandi svimjing, har Óli úti á ytstu geil legði seg klárt á odda beinanvegin í firvaldasvimjingini, fyri eina løtu at verða eitt lítið sindur innheintaður í rygg, og síðani draga frá aftur í seinnu helvt av ryggsvimjingini, og í bringu og í crawl. Tíðin 4:41.61 er eitt lítið sindur frá hansara persónliga meti á 4:41.42, har Alvi Hjelm so aftur eigur føroyska metið á 4:30.17.

Svimjistevna er í Lyngby nú í vikuskiftinum, har teir tríggir Óli Mortensen, Alvi Hjelm og Frans Johannesen eisini royna seg.

Og tað gongur heilt ókey, har Óli í kvøld vann gull í 400 frí, so syngjandi við 4:03.15 frammanfyri Frans á 4:07.85 og Niklas B. Thielemann á 4:11.88.

Frans varð hartil nr 2 í innleiðandi 50 bringu við 30.57, og nr 3 í innleiðandi 50 frí við 25.06. Tey avgreiða so hálvfinalur og finalur í morgin.

Hetta er svimjistevna á langgeil, tvs í 50 metra hyli. 

Úrslitini síggjast her á livetiming.dk