Heimsmetini rapa á World Cup í Doha og Dubai

Tað sær út til at rigga bara heilt væl hjá FINA og ávísum svimjarum, at hava World Cup stevnur á stuttgeil, beint aftaná stóru summarstevnurnar á langgeil. Í farnu viku setti ungarska Katinka Hosszu heimsmet í 100, 200 og 400 metra blandaðari svimjing, tá ið tey svumu í Doha, og nú í gjár setti hon so aftur heimsmet í 200 metra blandaðari svimjing, umframt at landsfelagin Daniel Gyurta setti heimsmet í 200 metra bringusvimjing.


Altjóða svimjisambandið FINA gevur umframt tær $1500 fyri hvørt gullheiðursmerki á World Cup, eisini bonus á $10.000 fyri hvørt heimsmet sum verður sett. Hartil eru stevnurnar bólkaðar í øki, við stórari virðisløn til tey 6 sum klára seg best í økinum (t.d. $50.000 til nr 1), og at enda er so tann stóra virðislønin á $100.000 til tann sum vinnur mest á øllum 7 stevnum tilsamans. Í fjør vann Hosszu allarmest, og fekk fyri tað $365.000 tilsamans. Til nú hevur Hosszu vunnið einar $58.500 í ár, og Gyurta $14.500.

Til ber at síggja World Cup í svimjing beinleiðis her á FINA.org

Heimsmet sett á World Cup 2014

  • Doha 27/8 – Katinka Hosszu (HUN) 2:02.61 í 200 blandað
  • Doha 28/8 – Katinka Hosszu (HUN) 57.25 í (innleiðandi) 100 blandað
  • Doha 28/8 – Katinka Hosszu (HUN) 4:20.83 í 400 blandað
  • Dubai 31/8 – Katinka Hosszu (HUN) 2:02.13 í 200 blandað
  • Dubai 31/8 – Daniel Gyurta (HUN) 2:00.48 í 200 bringu

Heimsmetið hjá Gyurta var betring av hansara egna meti frá HM í Istanbul 2009, sum var síðsta HM- ella EM-stevna áðrenn sokallaðu ‘superdraktirnar’ vórðu forbjóðaðar við ársbyrjan 2010. Heimsmetini hjá Hosszu eru sum heild betring av hennara egnu met frá World Cup stevnum í Eindhoven og Berlin í fjør, ið tá vóru stevnurnar beint aftaná HM á langgeil í Barcelona.

Tað er ivasamt um nakar føroyskur svimjari fer at luttaka á World Cup stevnum í ár, nú eingin stevna longur er í Evropa, út yvir World Cup stevnan í Moskva hin 4. og 4. oktober 2014. Hinar eru út yvir nú í Doha og Dubai, í Hong Kong, Beijing, Tokyo og Singapore.

One thought on “Heimsmetini rapa á World Cup í Doha og Dubai”

Ger viðmerking

This site uses Akismet to reduce spam. Learn how your comment data is processed.