Birita Debes úr FLOT setti í áðni nýtt føroyskt juniormet í 50 metra frísvimjing, við tíðini 26.54 har juniormetið hjá henni frá FM 2010 var 27.03. Ein betring á næstan eitt heilt hálvt sekund, og bara 5 hundraðpartar frá føroyska metinum á 26.49, sum Shaila millum Garðarnar svam á evropeisku stuttgeilameistarastevnuni í Rijeka í 2008.
Eva 2 hundraðpartar frá Oyggjaleikum
Eva Trygvadóttir úr Ægir var í morgun heilt nær kravtíðina til Oyggjaleikir í summar, tá ið hon á Ægir stevnuni í Klaksvík vann 50 metra bringusvimjingina við tíðini 34.84, har kravtíðin til Oyggjaleikir er 34.82.
Cecilia nýtt juniormet í 400 frí
Cecilia Eysturdal úr Ægir setti fyri løtu síðani nýtt føroyskt juniormet í 400 metra frísvimjing, við tíðini 4:25.58 har juniormetið hjá henni frá X-mas Sprint kappingini hjá HS í desember var 4:29.86. Hon hevur harvið kvalifiserað seg til evropeisku juniormeistarastevnuna í Beograd í summar, har kravtíðin hjá hennara árgangi var 4:25.85. Og hon er aftur í hesari greinini nær kravtíðini til Oyggjaleikir í summar, sum er 4:23.46.
Pál á Speed Endurance Swimming Blog
Nú nevndi Speed Endurance Swimming Blog eisini Pál Joensen, enntá við rós til hesa stakkars heimasíðu …
I first saw this on the excellent svimjing a few months ago, but for some reason didn’t post here. Well, time to correct my mistake. Just a great way to spend 3:36 of your life.
HS á venjingarlegu á Akureyri
Havnar Svimjifelag fór í gjár til Íslands á venjingarlegu, at venja á skíðum og í hyli á Akureyri. Tey føra dagbók á www.hs.fo, og hava eisini eina myndarøð sum hendan her niðanfyri er tyvstolin úr. Sær út til at onkur er nøgdari enn annar 🙂
Cecilia juniormet í 200 frí
Cecilia Eysturdal úr Ægir setti beint nú nýtt føroyskt juniormet í 200 metra frísvimjing, við tíðini 2:08.23 har juniormetið hjá henni frá NJM í desember mánaða var 2:08.53. Tíðin er tó enn nøkur sekund frá oyggjaleikakravtíðini á 2:05.75, og hon var tí týðiligvís sjálv ikki heilt nøgd við avrikið.
Turið juniormet í 200 bringu
Turið S. Christiansen úr Ægir setti fyri løtu síðani nýtt juniormet í 200 metra bringusvimjing, við tíðini 2:40.07, har juniormetið hjá henni frá Ægir stevnu í oktober mánaða í fjør var 2:40.30. Nýggja metið var bara 3 tíggjundapartar frá kravtíðini til Oyggjaleikir á 2:39.72, sum kanska forklárar hví at tey tó so ikki vóru heilt nøgd, her norðuri.
Cecilia juniormet í 800 og 1500 frí
Cecilia Eysturdal úr Ægir setti í dag føroyskt juniormet í 1500 frí, við tíðini 17:33.16 har juniormet hennara frá FM í fjør var 18:30.11. Splitt-tíðin hjá henni eftir 800 frí á 9:18.01 var eisini føroyskt juniormet, í mun til metið hjá henni frá NJM í desember á 9:20.65. Altso tvey juniormet í somu kapping, og ein betring á næstan 1 heilan minutt, og bara tvey sekund frá gullnálakravtíðini á 17:31.05.
Pál Joensen spyr Løgmann hvar stuðulin blívur av
Pál Joensen hevur her um dagarnar sent Løgmanni bræv, at spyrja hvar tær 4 milliónirnar blíva av, sum Landið eftir ætlan skuldi veita til langhyl í Vági. Landið hevði lovað Svimjihøllini á Oyrunum stuðul, síðuleypandi við at tey lovaðu Saltsiloini á Drelnesi langt meira stuðul … men er nú farið víðari við ætlanunum um at veita SALT verkætlanini stuðul, uttan at nevna orð ella ei um langhylin. Stóri spurningurin er nú, um politikararnir eru til at líta á, ella um Pál má rýma uttanlands at venja eftir summarferiuna.
On-Sport.dk tosar við Mie Ø. Nielsen
Danska ítróttarrásin www.on-sport.dk tosar her við Mie Ø. Nielsen, sum vann 7 gullheiðursmerki á NJM 2010, hóast hon hoyrdi til yngra árgangin av teimum báðum sum kundu luttaka tá. Tey tosa eisini við íslendska venjara hennara Eyleifur ‘Leivi’ Jóhannesson, og við pápan Benny Nielsen sum vann silvur á OL í Beijing í 1988. Annars áhugavert at hoyra um hasa skipanina hon kann brúka, við serligum úrvalsítróttarflokki í fólkaskúlanum, til at kunna venja so nógv afturat skúlagongdini.