Videoir frá NJM 2007 nú í betri góðsku

Bartal stríðist í hesum døgum við at legga videoir frá Norðurlendsku JuniorMeistarastevni í 2007 upp av nýggjum, ið sum kunnugt var í Føroyum. Tá løgdu vit videoirnar upp í gruggutum 240p, til at spara bandbreidd ella tí at YouTube ikki kláraði meira ella okkurt sovorðið, men nú er tað so endiliga í umleið somu stødd sum úr videotólinum, 480p.

Her er tað Kári J. á Høvdanum sum vinnur norðurlendskt silvur, bara 4 hundraðpartar frá gullinum …

Sí www.youtube.com/njsc2007

SwimmingWorld um Pál og Kára á NJM (!)

Stutt men gott – SwimmingWorld skrivar her tíðindi við yvirskriftini “Faroe Islands Hosts Nordic Juniors Swimming Championships”, um føroysku metini hjá Pál og Kára.

“PAL Joensen and Kari Hovdanum shined at the Nordic Junior Championships as the duo combined to set six national records for the Faroe Islands as the nation hosted the short course meet from Dec. 1-2.

Joensen set a range of freestyle records with standards in the 200 (1:51.92), 400 (3:54.64) and 1500 (15:24.50) freestyle events.

Meanwhile, Hovdanum swept his nation’s backstroke standards with records in the 50 (26.95), 100 (57.76) and 200 (2:06.44) backstrokes”

Ótrúligt vikuskifti

Tríggjar gull, eina silvur og eina bronsu. Vit eru nokk øll meira ella minni sperlað, sum hava verið uppi í hesum her við NJM í vikuskiftinum, men tað hevur verið tað heila vert.

Um tit vilja lesa meira um NJM, so farið á www.njm2007.com/fo ella www.susvim.com. Tit kunnu eisini síggja video frá stevnuni á www.youtube.com/njsc2007, og síggja myndir á picasaweb.google.com/njsc2007.

Ikki at siga at vit ikki fara at skriva meira um NJM her. Eg orki bara ikki at seta meg at skriva alt tað umaftur her, beint nú, sum allíkavæl stendur á offisiellu síðuni 🙂 Continue reading Ótrúligt vikuskifti

Gull og silvur til Føroyar

Kári J. á Høvdanum vann silvur í 50 rygg og var nær við at taka gullið eisini. Pál Joensen var heilar tvær longdir framman fyri nummar tvey í 1500 frí, í nýggjum føroyskum meti. Vinarliga hyggið á njm2007.com og livetiming.se, tí vit eru eitt sindur ov pressaði her til at orka at dagføra fleiri heimasíður í senn 🙂

From NJSC 1. session

Continue reading Gull og silvur til Føroyar

NJM 2007 startlisti – næsta útgáva

Tað hava verið rættiliga nógvar rættingar gjørdar til startlistan sum eg sendi út fyrradagin, og viðfest er tí ein nýggj útgáva, sum eg eisini havi sent luttakandi londum at rættlesa, lagt á njm2007.com og dagført LiveTiming við. Har burdi ikki verið nógv eftir at rætta, men sigið endiliga frá um tit finna okkurt.
Continue reading NJM 2007 startlisti – næsta útgáva

So er NJM startlistin klárur

Tað sær bara heilt gott út fyri Føroyar, nú fyribils startlistin er klárur at eftirmeta. Pál liggur til at vinna gull í 400 og 1500 frí, umframt eina bronsu í 200 frí. Kári J. á Høvdanum er seedaður til silvur í 50 rygg, og er eisini rímiliga nær teimum bestu til at kunna at vinna heiðursmerki í 100 og kanska 200 rygg. Restin liggur í lægra endanum, men møguliga kunnu tey pressa seg eitt sindur upp, nú vit eru á heimabana.

Startlistin liggur eisini á www.njm2007.com, og er annars sendur øllum limalondum at eftirmeta. Hann er tastaður inn (av mær) í einum, seigum strekki, so tað kann væl hugsast at har eru nakrar prentvillur og annað sum skal rættast komandi dagarnar.

NJM 2007, kanska bjartasta løtan í føroyskari svimjing nakrantíð

Um eina viku møtast 89 svimjarar úr Norðanlondum í høllini í Gundadali, at kappast um norðurlendsku juniormeistaraheitini. Føroyingar luttaka við 11 svimjarum, harav serliga vágbingurin Pál Joensen kann føra til at føroysk svimjing verður kend og viðurkend sum ongantíð áður.

Éitt heiðursmerki er nóg mikið til at útlendingarnir fara at nikka viðurkennandi til føroyingar, líka mikið um tað bara eru úr bronsu. Eitt silvurheiðursmerki er líka gott sum fyri tveimum árum síðani, og prógv um støðugt høgt støði í Føroyum (í fjør vunnu vit 4 bronsu). Eitt gullheiðursmerki? Well, tað hevði ljóðað utopiskt fyri bara fáum árum síðani, og hevði kanska viðført at útlendingarnir heldur stirnaðu enn at nikka.

Men Pál kann vinna fleiri. Gullheiðursmerki. Í løtuni er støðið hjá honum sambært altjóða ranglistunum so høgt, at hann kann gera seg alvorliga galdandi í øllum fríteinum frá 200 til 1500. Banka undir borðið og alt hatta har, men hann liggur altso til fínastu heiðursmerki, um ikki útlendingarnir hava krógvað síni størstu talent.

Samstundis gerst Kári á Høvdanum bara betri og betri, og er tí at rokna sum okkara jokari á stevnuni. Svimur hann upp um sítt besta, og hinir kanska ikki liva heilt upp til sítt, so kann alt henda. Og hendir tað – vinnur Pál gull, og Kári eisini okkurt – so er tað líka við at hini eisini kunnu gera seg galdandi. Tí tá kunnu vit gera okkum dælt av øllum tí sum hoyrir til at vera á heimabana, meðan hini í skelki spekulera uppá hvat tað var sum hendi.

NJM er størri enn Oyggjaleikir, tá ið tað kemur til góðsku á svimjarum. Norðurlond eru ikki at kimsa at, tí serliga sviar eru støðugt í heimsflokki, meðan hini londini eisini ferð eftir ferð stinga seg upp í millum. Og tað er tí ikki so langt frá einum norðurlendskum juniormeistaraheiti til eitt evropeiskt, sum man kanska hevur hug til at halda. Og EJM… EJM er longu komandi summar !

89 luttakarar tilsamans á NJM 2007

Sum tit eisini kunnu lesa her á serligu heimasíðuna fyri NJM 2007, so verða tað 45 gentur og 44 dreingir sum fara at kappast á Norðurlendsku JuniorMeistarastevnuni í Tórshavn, 1. til 2. desember 2007. Freistin fyri endarligar tilmeldingar er nú leygardagin 24. november, og vit fyrireikarar fara so eftirfylgjandi at royna at fáa startlistarnar út sum skjótast.

Tað gongur fínt við fyrireikingum, um enn man (tvs. eg 🙂 konstant stúrir fyri at okkurt er gloymt. Flestu útlendingar fara at búgva og eta á Kerjalon, og koyra so við bussum aftur og fram til høllina. Fyrireiking av høllini gongur eftir øllum at døma sum ætlað, og alt hatta við WinGrodan og LiveTiming er eisini undir kontrol. Fólk er sett av til at taka video og myndir, og vit fara so at royna at halda serligu NJM-heimasíðuna støðugt dagførda í leypi av vikuskiftinum.

So er bara at vóna at øll tit onnur eisini stuðla okkum væl, sum ikki longu eru lokkað til at taka sær av onkrari uppgávu. Vit (tvs. eg 🙂 síggja gjarna at so nógv fólk sum yvirhøvur gjørligt koma niðan í høllina at hyggja, til at skapa stemning og heppa á okkara mongu føroysku luttakarar, harav onkur enntá hevur heiðursmerkjamøguleikar av fínasta slag.

Komið niðan og hyggið, tí tað verður kanska leingi til vit aftur hava sama møguleika at vinna gull 🙂

11 svimjarar úttiknir til NJM

5 dreingir og 6 gentur fara at luttaka fyri Føroyar á Norðurlendsku JuniorMeistarastevnuni í Tórshavn, 1. til 2. desember 2007. Serliga Havnar Svimjifelag ger seg galdandi, við at eiga 5 av gentunum og ein drong á føroyska unglingalandsliðnum í ár. Fuglafjarðar Svimjifelag er eisini sterkt her við 3 landsliðssvimjarum, meðan Suðuroyar Svimjifelag faktiskt ‘bara’ hevur tann eina – Pál Joensen hesu éin, sum tó uttan iva er mest lovandi svimjari á liðnum í ár.
Continue reading 11 svimjarar úttiknir til NJM