FINA 2013 World Cup – svimjing.com

3 heimsmet afturat sett í vikuskiftinum

Sunnudagin setti ungarska Katinka Hosszu fyrst nýtt heimsmet í 100 metra blandaðari svimjing, tá ið hon í innleiðandi riðlunum á World Cup stevnuni í Berlin svam 57.45, har hennara heimsmet frá Eindhoven fyrr í vikuni var 57.50. Síðani setti hon í finaluni í 400 metra blandaðari svimjing nýtt heimsmet við tíðini 4:20.85, har heimsmetið hjá amerikansku Julia Smit frá 2009 var 4:21.04. Og so svam spanska Mireia Belmonte 400 frí uppá 3:54.52, har heimsmetið hjá fronsku Camille Muffat var 3:54.85. Hosszu setti sostatt 6 heimsmet uppá 5 dagar, og eigur nú øll heimsmetini á stuttgeil í blandaðari svimjing, meðan Belmonte setti 2 uppá 2 dagar, og eigur tey í 400 og 800 frí.

Katinka Hosszú 57.73 og nýtt heimsmet í 100 blandað

Ungarska Katinka Hosszu koyrir á har suðuri á World Cup stevnuni í Eindhoven – Eftir at hava sett hemsmet í 200 blandað bæði í innleiðandi riðlunum og síðani við einum heilum sekundi í finaluni í gjár, setti hon í morgun aftur heimsmet í 100 metra blandaðari svimjing á stuttgeil. Nýggja metið er 57.73, éin hundraðpart skjótari enn nú farna heimsmetið hjá niðurlendsku Hinkelien Schreuder frá World Cup stevnuni í Berlin í november 2009. Finalan er í kvøld.

Sí úrslitalistan her.

Trý heimsmet sett afturat í dag

Tað hevur ordiliga riggað hjá FINA at leggja World Cup stevnu so stutt eftir heimsmeistarastevnu, tí í kvøld vórðu trý heimsmet sett finalunum í Eindhoven, afturat tí hjá Katinka Hosszú í morgun. Suðurafrikanski Chad Le Clos svam 1:49.04 í 100 firvald har heimsmetið hjá Kaio Almeida frá 2009 var 1:49.11. Ungarska Katinka Hosszú trýsti heimsmetið í 200 blandað niður á 2:03.20 eftir at hava svomið 2:04.39 í morgun. Og niðurlendska Ranomi Kromowidjojo svam 23.24 í 50 frí, har heimsmetið hjá Marleen Veldhuis frá 2008 var 23.25.

Ein góð orsøk til at so gomul heimsmet so lættliga kunnu setast nú, er sjálvsagt at svimjararnir bera toppformin víðari frá HM í Barcelona. World Cup stevnurnar eru á stuttgeil og vanliga svomnar um veturin, tá ið svimjararnir ikki trappa niður uppá sama máta, sum til prestigufyltu stevnunum sum HM og EM á langgeil um summarið. Og tað var tí rættiliga snilt av FINA at leggja eina sovorðna stuttgeilastevnu beint við langgeila-HM, til at fáa strikað nøkur av teimum gomlu metunum.