Viðfestur er úrslitalistin frá Ægir-stevnuni 10. september 2011. Saman um tikið vann Suðuroyar Svimjifelag greitt flest heiðursmerki – 24 gull, 27 silvur og 22 bronsu – meðan HS vann 15 gull, 2 silvur og 3 bronsu, og Reysti 4 gull, 5 silvur og 3 bronsu.
| Gull | Silvur | Bronsa | |
|---|---|---|---|
| SuSvim | 24 | 27 | 22 |
| HS | 15 | 2 | 3 |
| Reysti | 4 | 5 | 3 |
| Ægir | 2 | 5 | 6 |
| FLOT | 1 | 2 |
Viðfest er innbjóðingin til svimjistevnu í Klaksvík hin 10. september 2011, fyri bólkar 2 og 3 umframt dreingir bólk 4. Kappingin byrjar klokkan 13 seinnapart, tilmeldingarfílan kemur seinni og skulu tilmeldingar tá sendast til Rúna Gaardbo.
Viðfest eru úrslitini frá Ægir stevnuni í gjár og í dag, umframt RE- og lef-fílur til hagtalsbrúk. Saman um tikið vann Suðuroyar Svimjifelag flest heiðursmerki – 26 gull, 18 silvur og 7 bronsu – meðan Ægir varð nummar tvey við 20 gull, 8 silvur og 6 bronsu, og Svimjifelagið FLOT nummar trý við 16 gull, 7 silvur og 5 bronsu.
Cecilia Eysturdal úr Ægir setti 4 juniormet í 200, 400, 800 og 1500 frí, umframt at klára kravtíð til evropeisku meistarastevnuna í Beograd í summar. Turið S. Christiansen úr Ægir setti juniormet í 200 bringu, og Birita Debes úr FLOT nýtt juniormet í 50 frí.
Hartil vann Alvi Hjelm úr Ægir sær silvurnál við stjørnu í 800 frí, Erna Katrin Olsen silvurnál við stjørnu í 1500 frí, Eva Trygvadóttur úr Ægir silvurnál við stjørnu í 50 bringu, og Krista Mørkøre úr Ægir bronsunál í 50 frí.
Continue reading Úrslit frá Ægir stevnuni 19. – 20. februar 2011
Birita Debes úr FLOT setti í áðni nýtt føroyskt juniormet í 50 metra frísvimjing, við tíðini 26.54 har juniormetið hjá henni frá FM 2010 var 27.03. Ein betring á næstan eitt heilt hálvt sekund, og bara 5 hundraðpartar frá føroyska metinum á 26.49, sum Shaila millum Garðarnar svam á evropeisku stuttgeilameistarastevnuni í Rijeka í 2008.
Eva Trygvadóttir úr Ægir var í morgun heilt nær kravtíðina til Oyggjaleikir í summar, tá ið hon á Ægir stevnuni í Klaksvík vann 50 metra bringusvimjingina við tíðini 34.84, har kravtíðin til Oyggjaleikir er 34.82.
Cecilia Eysturdal úr Ægir setti fyri løtu síðani nýtt føroyskt juniormet í 400 metra frísvimjing, við tíðini 4:25.58 har juniormetið hjá henni frá X-mas Sprint kappingini hjá HS í desember var 4:29.86. Hon hevur harvið kvalifiserað seg til evropeisku juniormeistarastevnuna í Beograd í summar, har kravtíðin hjá hennara árgangi var 4:25.85. Og hon er aftur í hesari greinini nær kravtíðini til Oyggjaleikir í summar, sum er 4:23.46.
Cecilia Eysturdal úr Ægir setti beint nú nýtt føroyskt juniormet í 200 metra frísvimjing, við tíðini 2:08.23 har juniormetið hjá henni frá NJM í desember mánaða var 2:08.53. Tíðin er tó enn nøkur sekund frá oyggjaleikakravtíðini á 2:05.75, og hon var tí týðiligvís sjálv ikki heilt nøgd við avrikið.
Turið S. Christiansen úr Ægir setti fyri løtu síðani nýtt juniormet í 200 metra bringusvimjing, við tíðini 2:40.07, har juniormetið hjá henni frá Ægir stevnu í oktober mánaða í fjør var 2:40.30. Nýggja metið var bara 3 tíggjundapartar frá kravtíðini til Oyggjaleikir á 2:39.72, sum kanska forklárar hví at tey tó so ikki vóru heilt nøgd, her norðuri.
Cecilia Eysturdal úr Ægir setti í dag føroyskt juniormet í 1500 frí, við tíðini 17:33.16 har juniormet hennara frá FM í fjør var 18:30.11. Splitt-tíðin hjá henni eftir 800 frí á 9:18.01 var eisini føroyskt juniormet, í mun til metið hjá henni frá NJM í desember á 9:20.65. Altso tvey juniormet í somu kapping, og ein betring á næstan 1 heilan minutt, og bara tvey sekund frá gullnálakravtíðini á 17:31.05.
Viðfestur er startlistin til Ægir-stevnu nú í vikuskiftinum. Hann er merktur av at Havnar Svimjifelag er á venjingarlegu í Íslandi, men tó so eru ‘kanónirnar’ har, so sum Pál Joensen úr Suðuroyar Svimjifelag, Birita Debes úr FLOT, Cecilia Eysturdal úr Ægir og Poula Ø. Mohr úr Fuglafjarðar Svimjifelag.
