“So all together, Faroe Isles are doing very, very well”

Vónandi fái eg ikki Eurosport upp á nakkan fyri at vísa hetta lítla brotið her, har Jutta svimur 200 frí og setur føroyskt met. Haldi tað er áhugavert at síggja hvussu væl Eurosport tekur fram sjálvt hesar í alheims høpi smáu svimjarar, og hoyra hvussu kompetentur og áhugaður journalisturin hjá teimum er.

Hann gitir til dømis at hetta er ein roynd eftir føroyska metinum, og leggur til merkis at hon sparkar meira enn Mona Simonsen gjørdi í riðlinum beint áðrenn. Minnist til navnið ‘Simonsen’ eisini. Og tosar um ‘same swimming suit style’, hvat hann so meinar við tað. Aftaná riðilin nevnir hann hvussu stór betringin er í mun til tilmeldingartíðina.

Í riðlinum hjá Monu legði hann til merkis hvussu lítið hon sparkaði, sjálvt seinastu longdina, og gitti at hon mátti vera langteinasvimjari. Púra rætt, vita vit føroyingar, men man má altso taka hattin av fyri einum journalisti sum dugir og orkar hetta, at fylgja við í øllum riðlum, hóast at talan er um yvir 2000 svimjarar tilsamans.

Her er brotið (ca. 8 MB tilsamans). Eg vildi gjarna víst tað í betri góðsku – og veit eisini hvussu man ger – men tori ikki so væl, vegna copyright og alt hatta har. Hetta við copyright er fremsta orsøkin til at tað er so soltið við videoum her á síðuni.

Get the Flash Player to see this player.

Heimsmet aftur í morgun

Michael Phelps hevur aftur sett heimset, sítt triðja higartil á heimsmeistarastevnuni í Melbourne, og fjórða gullheiðursmerkið. Hesu ferð var tað í 200 blandað, har hann svam 1:54.98, og átti tað gamla frá 2006 á 1:55.84. Leila Vaziri tangeraði sítt met frá semifinaluni í gjár, tá ið hon nú í finaluni aftur svam 28.16. Amerikansku kvinnurnar settu heimsmet í 4 x 200 frí. Og Nathalie Coughlin var akkurát 1/10 sekund frá at taka metið frá týsku Brittu Steffen í 100 frí, tá ið hon nú í semifinaluni svam teir 100 á 53.40 (metið er 53.30).

Heimsmethaldarin Jessicah Schipper vann gull í 200 firvald, Kitajima fekk bestu tíð í semifinaluni í 200 bringu, og amerikanski Ryan Locthe vann varð skjótastur í 200 rygg. Har vóru tveir vinnarar í 100 frí hjá monnum, Brent Hayden og Filippo Magnini úr Kanada og Italia, meðan Pieter van der Hoogenband bara bleiv nr 6. Nú róti eg eitt sindur runt í tí her, og listi tí heldur bara úrslitini upp her niðanfyri, í tíðarrøð:

100 frí kvinnur, semifinala

  1. Nathalie Coughlin (USA), 53.40
  2. Lisbeth ‘Libby’ Lenton (AUS), 53.85
  3. Britta Steffen (GER), 54.05

200 blandað menn, finala

  1. Michael Phelps (USA), 1:54.98 (WR)
  2. Ryan Lochte (USA), 1:56.19
  3. Laszlo Czeh (HUN), 1:56.92

200 bringu kvinnur, semifinala

  1. Leisel Jones (AUS), 2:23.75
  2. Kirsty Balfour (GBR), 2:25.45
  3. Suzaan van Biljon (RZA), 2:25.56

100 frí, finala

  1. Filippo Magnini (ITA), 48.43
    Brent Hayden (CAN), 48.43
  2. Eamon Sullivan (AUS), 48.47

200 firvald kvinnur, finala

  1. Jessicah Schipper (AUS), 2:06.39
  2. Kimberly Vandenberg (USA), 2:06.71
  3. Otylia Jedrzejczak (POL), 2:06.90

200 bringu menn, semifinala

  1. Kosuke Kitajima (JAP), 2:10.30
  2. Brenton Rickard (AUS), 2:11.41
    Paolo Bossini (ITA), 2:11.41

50 rygg kvinnur, finala

  1. Leila Vaziri (USA), 28.16 (=WR)
  2. Aliaksandra Herasimenia (RUS), 28.46
  3. Tayliah Zimmer (AUS), 28.50

200 rygg menn, semifinala

  1. Ryan Lochte (USA), 1:55.99
  2. Aaron Piersol (USA), 1:56.39
  3. Markus Rogan (AUT): 1:56.62

4 x 200 frí kvinnur, finala

  1. USA, 7:50.09
  2. Týskland, 7:53.82
  3. Frankaríki,  7:55.96

Phelps svimur nú skjótari firvald enn Spitz svam frí

Sum kunnugt jagstrar Michael Phelps metið hjá Mark Spitz, at vinna sjey gullheiðursmerki á einum og somu olympisku leikum. Vit fáa at síggja næsta ár, um hann klárar tað í Beijing, men Swimnews hevur her eina grein um m.a. hvussu ófatiliga skjótt Phelps svimur, til at røkka hesum máli. Har er nógv áhugavert eisini um kvinnusvimjingina, so eg royni sum frægast at týða tað besta úr greinini, her í tí fylgjandi.

Michael Phelps setti fyri einum mánaða síðani heimsmet í 200 frí við 1:53.71, og setti tað so aftur í gjár við 1:52.09. Ein betring á 1.62 sekund er størsta betring í 48 ár. Mark Spitz vann 200 firvald í München í 1972 við 2:00.70, og 200 frí við 1:52.78, og Phelps er altso nú skjótari í 200 firvald, enn Spitz var í frí.

Phelps er tó einsamallur at svimja so skjótt. Wu Peng, sum varð nummar 2 í 200 firvald í gjár, var 3.04 sekund aftanfyri Phelps. Hetta er væl og virðiliga størsta glopp nakrantíð í greinini, við tað at tað til nú hevur verið hildið at vera ófatiliga gott at týski Michael “The Albatross” Gross í 1986 vann við 1.83 sekundum.

Genturnar forbetra seg eisini við risalopum, og eru nú væl á veg at svimja líka so skjótt sum Mark Spitz. Manaudou setti heimsmet í gjár við 1:55.52, har Spitz sum nevnt svam 1:52.78. Hetta ljóðar kanska sum eitt ógvusligt lop, men Manaudou hevur faktiskt betrað seg við minst líka nógvum, seinastu árini. Hon vann OL gull í 2005 við 2:00.05, svam 1:57.81 í fjør, og nú 1:55.52.

Annika Lurz úr Týsklandi betrar seg eisini skjótt. Hon svam sum 25 ára gomul 2:04.53 í 2004, 1:59.99 í 2005, og 1:56.73 í november í fjør. Altso næstan 8 sekund, so mikið seint í karrieruni.

Eisini stuttligt at lesa hvussu Manaudou fyrireikaði seg til teir 200 frí. “Manaudou’s warm-up consisted of sitting on a seat at the end of lane 4, staring at the pool for the best part of 45 minutes. She then did a 600m paced swim, without much variation and break-up, and got out, her focus singular”

Nógv annað áhugavert er í greinini, so sum at Phelps nú við 18 heimsmetum er nummar 2 á metlistanum av flestu heimsmetum yvirhøvur, við bara Mark Spitz omanfyri (hann setti 26 tilsamans í karrieruni).

Og Michael Phelps um hví hann svimur so skjótt: “I’ve got no secret, it’s just training, training, training and I think I showed that. I was not nervous, it’s a sort of excitement that makes me sprint out.”

Lesið alla greinina á Swimnews.com

Hansen sjúkur, má droppa 200 bringu

Onkur ‘mystisk’ virus hevur rakt amerikanska Brendan Hansen her mitt í kappingini í Melbourne, so at hann ikki fær luttikið í 200 bringu. Keðiligt hjá honum, við tað at hann annars er væl fyri at forsvara sítt dupulta heimsmeistaraheiti í 100 og 200 bringu. Vann 100 bringu herfyri, og varð nummar 2 í 50 bringu. Men nú munnu tey bíða og vóna at hann verður klárur til stafettina. Sí tíðindi á Eurosport.com.

Mona Simonsen svam 100 frí í nátt

Tíðin varð 1:03.01, sum er væl betri enn hennara tilmeldingartíð á 1:04.33. Hetta rakk til ein 2. pláss í riðlinum og 96. pláss tilsamans av teimum 129 sum svumu. Ein Jessica Teixeira Vieira úr Mozambique spoleraði møguleikarnar fyri at síggja Monu í nærmynd á Eurosport, hesu ferð, við at betra seg frá 1:04.73 til 1:01.78. Føroyska metið eigur Elspa Mørkøre við 59.64, sett á Mallorca í fjør.

Frálíkar myndir úr Melbourne

HM er ein frálíkur møguleiki hjá føroyskum svimjarum at koma at heilt tætt uppá størstu svimjistjørnur yvirhøvur. Øll sita rættiliga tætt saman, tá ið man hugsar um at tey eru yvir 2000 tilsamans sum svimja, og at tey hava venjarar, fysioterapeutar o.t. tætt hjá. Her eru tríggjar myndir, sum Reidar á tsvim.com hevur verið so beinasamur at senda mær, frá teimum á kantinum í Avstraliu.

Her er Kristian Olsen saman við svianum Lars Frölander, OL-gullvinnari í 100 frí í Sydney 2000, fleirfaldur heimsmeistari og evropameistari (mest í firvald), sum eina tíð hevði heimsmetið í 100 firvald í stuttum hyli (25m). Frölander er, sum tað sæst, ikki serliga høgur, men hevur vunnið tann vansan inn aftur við at vera framúr góður til vendingar.

Á næstu mynd síggja vit Juttu Thomsen av Tvøroyri saman við avstralsku Lisbeth ‘Libby’ Lenton, fleirfaldur heimsmeistari í 50 frí, 100 frí og 100 firvald, OL-bronsuvinnari í 50 frí og OL-gullvinnari í 4 x 100 frí. Har Frölander kanska er eitt sindur á veg út nú (hann er eini 32 ár nú), er Libby Lenton veruliga í hæddini beint nú – hon hevur longu vunnið gull í 100 firvald og 4 x 100 frí, á stevnuni í Melbourne.

Og SSF-formaðurin Palli Ziskason hevur funnið polsku Otyliu Jedrzejczak, kontroversiellur OL-gullvinnari í Athen 2004, fleirfaldur heimsmeistari, evropameistari og heimsmethaldari í 200 firvald. Kelinavn ‘Otty’… vita Bogi Lenvig, Kristoffur Hentze og eg alt ov væl, eftir at hava sitið aftanfyri polska landsliðið alt EJM í Moskva í 1999.

Heimsmetini rapa aftur í morgun

Tey bestu svimja nú millum klokkan 10 og 12, og tað gongur uppá stás. Amerikanska Leila Vaziri hevur sett heimsmet í semifinaluni í 50 rygg við tíðini 28.16, meðan hvítarussiska Alexksandra Herasimenia tók silvur og japanska Reiko Nakamura bronsu. Og síðani knústi Michael Phelps heimsmetið hjá sær sjálvum í 200 firvald, við at svimja 1:52.09 (gamlað metið var 1:53.71). Har varð Wu Peng úr Kina nummar 2 og russiski Nikolay Skvortsov nr 3.

Síðani ‘hevndi’ franska Laure Manaudou seg inn á italsku Federica Pellegrini, sum í gjár dittaði sær at seta heimsmet í 200 frí. Manoudou svam beint nú teir 200 frí á 1:55.52, sum er næstan eitt sekund betri enn teir 1:56.47 hjá Pellegrini í gjár. Týska Annika Lurz vann silvur og Pellegrini bronsu.

3 finalur, 3 heimsmet. Um nakar ivast í hví eg kann sita og skriva í morgun, hóast eg segði at eg varð upptikin av arbeiði, so er tað tí at eg keikti fótin á veg út í gjøgnum hurðina í morgun. Havi nú læknaboð uppá at eg skal binda frið, hava fótin hægst og skifta millum ís og hita hvønn hálva tíma. Tað riggar fínt at gera á sofuni, frammanfyri sjónvarpið 🙂

50 bringu gav tíverri ikki nýtt heimsmet. Ukrainski Oleg Lisogor vann, amerikanski Brendan Hansen varð nummar 2 og suðurafrikanski Cameron van der Burgh nummar 3.

800 frí er faktiskt ófatiliga spennandi at hyggja at sum ‘live timing’ á omegatiming.com. Grant Hackett er ikki fremst, men heldur ikki langt aftanfyri teir tríggjar fremstu (Craiq Stevens, Oussama Mellouli og Federico Cobertaldo). Jú nú dragnar hann eitt sindur. Og meira. Oussama fer frá hinum.  Og Przemyslaw Stanczyk úr Póllandi kemur knappliga uppí leikin, og framum, nú teir hava svomið einar 300 metrar. Hann er á geil 7. Hinir dragna, Hackett vinnur so í øllum førum ikki. Og úrslitið varð at Oussama Mellouli úr Tunesia vann, Przemyslaw Stanczyk varð nummar 2 og Craiq Stevens nummar 3. Hackett varð nummar 7, uha uha.

Fyrsta heimsmet nakrantíð til Tunesia, viðmerkja tey á live-síðunum hjá eurosport.com. Vinnaratíðin á 7:46.95 var tó langt í verðini frá heimsmetinum hjá Grant Hackett á 7:36.65

Hatta var tað fyri í dag.

HM longu ein stór succés

Sum tey ið fylgja eitt sindur við vita, so var eg ein av teimum sum settu spurnartekin við, um tað var rætt at fara til HM. Og eg haldi enn at tað lættliga kundi gingið nógv verri 🙂 Men Jón Bjarnason hevur so sanniliga fyrireikað svimjararnar væl, og stuðla teimum á kantinum í Melbourne, so at vit nú kunnu siga at Melbourne varð ein succés fyri føroyingar, hóast stevnan ikki er meira enn hálvrunnin.

Allir 4 svimjarar hava betrað seg væl og virðiliga, og tríggir hava sett flott føroyskt met. Fjórði svimjarin eru umskyldaður við, at hon og hin svimja somu kappingar. Tey vinna sína riðlar hóast tey sjáldan eru ‘seedað’ sum nummar 1 í riðlinum. Vit sleppa at síggja tey ‘live’ á Eurosport, og føroysku fjølmiðlarnir hava eisini víst stóran áhuga, hóast talan jú slettis ikki er um kjans at vinna heiðursmerki.

So saman um tikið er luttøkan ein stór succés. Og her má man ikki undirmeta bragdið hjá landsliðsvenjaranum, Jón Bjarnasyni, at fáa svimjararnar at virka so væl, hóast hesar trykkjandi umstøðurnar, har alt er so stórt og heiðursmerkjamøguleikarnir (enn) so ófatiliga smáir. Hetta er ‘coaching’ á høgum stigi, at fáa svimjararnar at fokusera so væl á at betra seg sjálvi og føroyska støðið, heldur enn at fella saman ella royna eftir onkrum ógjørligum.

Pessimisturin í mær heldur enn, at tað líka so væl kundi endað í ein gang blaka pengar út úr vindeyganum, og vánaligari svimjing. Men tað er tað ikki blivið, og tí má man taka hattin av fyri teimum har suðuri, umframt teimum sum í gerandisdegnum hava verið um hesar svimjarar.

Vit hava fingið ein flottan, flottan start á HM-luttøkuni, og man kann væl næstan siga at næstu árini eru bjargað. Tí hóast Oyggjaleikir altíð eru spennandi, so eru Rhodos kanska ov spennadi, í mun til tað sum kemur aftaná. Ein svimjari sum hevur verið á Rhodos kann mest sannlíkt gerast rættiliga tungur at motivera til Áland (ella hvar tað nú er, næstu ferð).

Men nú hava vit HM! Longu næsta ár í stuttum hyli í Bretlandi, har vit í prinsippinum kunnu senda so nógv vit vilja (vegna prísin). Árið eftir í Rom, síðani árið eftir onkunstaðni sum eg ikki veit hvar er enn, og um 4 ár í Shanghai, Kina. Um tað ikki motiverar okkara bestu svimjarar, so eru teir ikki verdir at motivera 😉

Uha ja, men tað kostar jú nógv. Og mítt størsta kritikkpunkt var eisini, at hesir pengar kundi farið til so nógv annað. Avstralia er jú langt vekk og alt hatta har. Men her hevur FINA (og kanska okkara egni formaður, Palli Ziskason) gjørt tað bragd, at geva okkum oyramerktan fíggjarligan stuðul til luttøkuna. Vit fáa altso pengar frá FINA til at at fara til HM. Nú síggja vit so eisini, at teir við Jón kunnu seta met, og hvat er so eftir at brokka seg um?

Nei Jón og Palli, ein treytaleys umbering higani av Toftum. Tit høvdu rætt, ella í øllum førum dugdi tit at fáa tað at bera til.

Og til lukku tit fýra sum svimja í Melbourne. Tit eru knasandi góð !