Hygg ein røð av svimjivideoum á Dagbladet.no og NSF

Norska svimjisambandið og avísin Dagbladet hava gjørt eina áhugaverda røð av teknikk-videoum saman, sum kunnu síggjast fyri einki á svomming.no og dagbladet.no. Talan er tó um nokk so grundleggjandi øvilsi, sum tey flestu av okkum hava roynt, um vit yvirhøvur hava verið í nærheitini av einum svimjifelag. Men góðskan er góð, svimjararnir tveir bestu í Noregi, og tað er jú heldur ikki so galið at vita at man ger tað hampuliga rætt 🙂

Alt er so mikið opið hjá teimum, at eg faktiskt fái lagt tað her á heimasíðuna. So her er fyrsti partur í røðini …

Gev gætur at myndin er her rættiliga nógv minni enn tann sum verður víst á dagbladet.no, men líka stór sum tann á svomming.no. Tey hava gjørt 9 partar inntil nú, og ætla sær at leggja sær ein part út afturat hvønn sunnudag, fram til 1. apríl, so at teir verða 13 tilsamans.

Hetta er liður í einum motiónstiltaki kallað “Svøm deg til Island“, sum norska svimjisambandið skipar fyri á hvørjum ári, til at fáa fleiri fólk at svimja. Øll áhugað kunnu fáa eitt kort í svimjihallunum runt landið, har tey síðani fáa skrásett hvussu ofta tey svimja, í so og so nógva tíð. Aftaná er lutakast millum tey luttakandi, har børnini kunnu vinna ein túr til okkurt ‘vandland’ í Noregi, og tey vaksnu ein túr til Íslands (pheew, so skuldu tey ikki svimja haryvir allíkavæl).

Partarnir eru upplistaðir á hasari fyrrnevnu síðuni á svomming.no. Men við tað at myndin sum sagt er eitt sindur størri á dagbladet.no, og valmyndarskipani har tíverri syndarlig, so havi eg leitað tær fram og listi tær upp her niðanfyri:

  1. Basisøvelser
  2. Brystbensparket
  3. Bryst – armtakets første del
  4. Bryst – armtakes siste del
  5. Brystsvømning i hele teknikken
  6. Vending i brystsvømning
  7. Crawl – rotasjoner og pusting
  8. Crawl – bensparket
  9. Crawl – armtaket
  10. Saltovending
  11. Ryggsvømming – grundprinsipper
  12. Ryggsvømming – armtaket
  13. Gratis treningstips fra Norges beste svømmere!

Hackett metir at minst 6-7 fara undir 15 í 1500 frí

Larsen Jensen,Yuri Prilukov,Grant HackettVerandi heimsmethaldari og OL gullvinnari á 1500 frí, Grant Hackett, metir at teir 1500 í Melbourne verða "the most competitive in history". Hann metir ikki at heimsmetið er í vanda, men at teir verða nakrir sum fara undir 14:40, og einir 6 ella 7 sum fara undir 15 minuttir.

Atvoldin til at hann sigur so, er at amerikanski 1500 metra svimjarin Larsen Jensen eitt sindur nasadjarvt hevur sagt, at Grant Hackett bara kemur við umskyldningum, um at hann (Hackett) ikki er í so góðum formi sum vanligt. Hackett skifti venjara fyri einum mánaða síðani, og hevur sambært sær sjálvum undirmett hvussu tað fór at ávirka formin.

So Hackett metir altso ikki at hann kann taka metið sjálvur, og spurningurin er tí hvussu góðir hinir eru. Viðvíkjandi Larsen Jensen er hann (Hackett) tó nokk so bersøgdur: "I hope he competes as well as he talks".

Upprunalig tíðindi á heimasíðuni hjá heimsmeistarastevnuni

Myndin er fingin av Flickr kontoini hjá ‘vanou’, og vísir frá vinstru Larsen Jensen (USA), Yuri Prilukov (RUS) og Grant Hackett (AUS), eftir 1500 frí finaluna á síðstu heimsmeistarastevnu í Montreal (Kanada) í 2005. Hackett vann gull, Jensen silvur, David Davies (GBR) bronsa, og Prilukov varð nr. 4 (almennur úrslitalisti sum pdf-fíla).

Fá boð um svar til tínar postar og viðmerkingar

Eg havi í kvøld lagt inn eitt mótul sum ger tað gjørligt hjá skrásettum brúkara at fáa fráboðan í telduposti, um onkur ger viðmerkingar til postar ella viðmerkingar sum hesin hevur gjørt. So sleppur man undan at skula hyggja inn aftur á síðurnar allatíð, fyri at kanna eftir um nakar svarar.

Tað byrjaði at blíva eitt sindur óruddiligt við leinki undir sjálvum postunum, og eg havi tí fyribils óvirkjað ein part av funkunum. Sovorðið sum at man kann fáa fráboðan hvørja ferð onkur skrivar um eitt ávíst evni, ella í eitt ávíst forum, osfr. Haldi at týdningarmesta funka er at kunna fylgja við hvat sum hendir við postarnar hjá einum sjálvum.

Brúkararnir kunnu seta skipanina til sjálvvirkandi at tekna sovorðin hald, so at man ikki skal minnast til at gera tað so hvørt. Sí mynd niðanfyri, sum er av møguligu setingunum undir ‘Mín konto’ í valmyndini til høgru (hjá innritaðum brúkarum). Har er eisini ein møguleiki til at strika hald aftur fyri allar ella hvønn einstaka post, ífall at man ikki longur tímir at fáa hasar teldupostarnar longur.

Gould og Fraser spáa heimsmet í Melbourne

Tær báðar Dawn Fraser og Shane Gould hava verið og hugt at hylinum sum verður settur upp til heimsmeistarakappingina í Melbourne um 10 dagar, og siga at hann er ógvuliga góður. Hann er so mikið djúpur, at tað ikki skuldi komið nakar turbulensur frá botninum av, og hartil er vatnið ógvuliga bleytt. Gould er faktiskt ikki í iva um, at metið á 100 metrum hjá kvinnum rýkur.

Avstralsku Dawn Fraser og Shane Gould vóru tiltiknar svimjistjørnur í sínari tíð. Fraser er ein av tveimum svimjarum sum hevur vunnið gull í somu grein á trimum OL á rað (1956, 1960 og 1964), meðan Gould er einasti svimjari sum hevur átt í heimsmet í øllum olympiskum frígreinum í senn , frá 100 til 1500 metrar, áðrenn hon gavst sum 16 ára gomul í 1972.

Eg var so heppin at møta Gould í 2005, sum liður av einum venjaraskeiði í Holstebro við Bill Boomer og Milt Nelms. Hon svam tá enn 100 firvald á langbana við eini tíð á 1:08, 50 ára gomul.

Eg eri tann fullisjúki móði í FLOT-troyggju her niðanfyri, meðan hini eru Lars Kirkegaard (dani, fyrrverandi venjari hjá Louse Ørnstedt), Bill Boomer (amerikansk teknikk-guru), Shane Gould og Milt Nelms (tiltikin amerikanskur venjari… var t.d. síðsta vón hjá Ian Thorpe, áðrenn Thorpe valdi at gevast heilt).

Upprunalig tíðindi á heimasíðuni hjá Melbourne 2007

Teldupostlistarnir klárir

Nú ber tað til hjá brúkarum her at melda seg til ella frá ein teldupostlista, sum ger tað lættari at senda teldupostar út til øll. Til dømis um man hevur onkur áhugaverd ella átroðkandi tíðindi, sum áhugaði burdu fingið at vitað um beinan veg.

Ein teldupostlisti er ein slags postsentralur sum tekur ímóti og sendir víðari teldupostar. Fólk melda seg til tænastuna; og so er bara at senda teldupostar til news[kurla]svimjing.com, til at øll tilmeldaði fáa boðini. Og øvut er tað lætt at melda seg frá aftur, ífall at tað vísir seg at man allíkavæl ikki er áhugaður í tað sum verður sent ígjøgnum skipanina.

Um tit longu eru á onkrum teldupostlista á alnetinum, so er talan mest sannlíkt um somu Mailman skipan sum her. Hon er eitt sindur gamaldags í sniði, men er robust og fylt við øllum møguligum trygdarfunkum, til at umganga spam og ov stórar teldupostar og so framvegis. Umframt at eg sum ein eyka trygdarfunka havi avgjørt, at einans tilmeldaðir brúkarar kunnu senda inn teldupostar til listan.

So tað er væl bara at royna, um skipanin er nakað fyri tykkum. Annaðhvørt við at brúka funkuna sum er her úti til vinstru hjá skrásettum og innritaðum brúkarum, ella at hyggja á teimum meira nørdutu síðunum her. Nørdasíðurnar og umsitingar-teldupostarnir tosa tíverri danskt enn, av tí at eg ikki havi tikið meg saman til at týða tað til føroyskt.  Og tí at eg mátti velja okkurt norðurlendskt, til at fáa ‘ð’ og tílíkt at rigga.

Forrestin, ikki stressa um at teldupostadressan til tíðir eitir news[kurla]lists.svimjing.com og til tíðir news[kurla]svimjing.com, tí báðar gera tað sama. Og um tit ikki tíma at skráseta tykkum á svimjing.com bara fyri at sleppa á teldupostlistan, so riggar tað útmerkað at gera tað har yviri á donsku nørdasíðunum. Tilmeldaðir brúkarar kunnu eisini kaga í arkivið, sum goymir allar teldupostar sendar til news[kurla]svimjing.com.

Eg havi fyribils samansett skipanina soleiðis, at einans umsitarar kunnu síggja hvørji sum eru tilmeldað listan. Møguleiki er annars at loyva øllum tilmeldaðum at síggja hvør annar sum er tilmeldaður, ella at lata hann vera almennur. Men eg helt at hetta fór at avskrekka minst, ífall man ikki er áhugaður í at enda á øðrum listum eisini. Eitt annað val hjá mær var at lata øll tilmeldaði síggja hvør ið upprunaliga sendi teldupostin inn, heldur enn at skifta hann út við news[kurla]svimjing.com.

Her er enn eingin funka til at fáa teldupostar beint á forsíðuna ella tílíkt, ella at tíðindina fara hinvegin út til teldupostlistan. Men tað kemur vónandi seinni, tá ið eg havi fingið testað tær funkurnar betri.

Hackett lendi á búkinum

Avstralska svimjistjørnan Grant Hackett var heldur óheldigur, tá hann síðsta vikuskifti kappaðist í Melbourne. Hann gleið á skamlinum, og lendi tí pladask á búkinum. Men tað var ikki verri enn at hann vann teir 400 crawl, við eini 200 metra splitt-tíð á 1:51.60 og eini samlaðari (langbana-) tíð á 3:54.17.

Talan var lukkutíð bara um eina vanliga kapping, har hann skuldi testa seg áðrenn HM í sama býi um nakrar vikur. Hackett kundi sjálvur flenna at hendingini, og segði at tað var tí at hann brúkar track start og lítir so nógv á aftara fótin. Ein troyst var eisini at ein annar frá sama felag gjørdi sama stunt, við sama starti.

Continue reading Hackett lendi á búkinum

Ægir vann HS-stevnuna

Poula, Astrid, JónfríðStór svimjistevna var í Havn síðsta leygardag, har 95 gentur og 67 dreingir úr trimum teimum yngstu deildunum kappaðust um tilsamans 58 gullheiðursmerki. Hetta eru svimjarar føddir frá 1994 til 2000, og lat tað verða sagt, at sterkastu árgangssvimjarar finnast har norðuri runt Klaksvíkina.
Continue reading Ægir vann HS-stevnuna

Møguliga seinastu Oyggjaleikir hjá SSF

IGA logoÍ samrøðu í Útvarpi Føroya í gjár, nevndi formennirnir hjá Flogbóltssamband Føroya og Svimjisamband Føroya møguleikan fyri at gevast við luttøku á Oyggjaleikum, hóast góð úrslit. Hetta serliga tí at luttøkukostnaðurin bara veksur, so at Flogbóltssambandið til dømis mátti gjalda 400.000 krónur fyri luttøku á Oyggjaleikunum í Hetlandi; hóast teir leikirnir kanska áttu at verið teir bíligastu, tá ið man hugsar um frástøðuna úr Føroyum.

Continue reading Møguliga seinastu Oyggjaleikir hjá SSF

svimjing.com á alnetið

Vælkomin til hesa nýggju føroysku heimasíðu um svimjing. Sum tað í løtuni stendur á forsíðuni, so er endamálið við heimasíðuni at gera tað lættari hjá føroyingum at frætta frá og samskifta um svimjing, í vón um at hetta kann styrkja um áhugan hjá fjølmiðlum og føroyingum sum heild fyri hesum frálíka ítrótti.

Harða kjarnan aftanfyri heimasíðuna eru Ottar í Hjøllum og Bartal Højgaard, umframt undirritaði Rókur í Jákupsstovu. Við mær sum ábygdara, við tað at eg eigi heimasíðunavnið svimjing.com, ambætaraplássið á Dreamhost, og flestu rættindi sum ‘admin’. Vit hava til nú staðið fyri heimasíðuna flot.info hjá Svimjifelagnum FLOT, men eru komnir eitt sindur í eina trongstøðu, við tað at vit har skriva skiftivís subjektivt fyri FLOT og meira objektivt fyri føroyska svimjing sum heild. Við tí úrsliti, at lesarar hava ilskast skiftivís um at vit vóru og ikki vóru lokalir. So nú hugsa vit at tað er betri at skifta millum tveir hestar, enn at royna at ríða á báðum í senn.

Hartil vóru aðrar orsøkir til at skifta, so sum at verandi heimasíðuskipan á flot.info hevur ávísar irriterandi avmarkingar, samstundis sum hendan virkar at vera ógvuliga góð, og vit hartil gjarna vilja koma eitt sindur úr skugganum av Svimjifelagnum FLOT. Alt heimasíðuarbeiði hjá okkum hevur til nú verið fullkomiliga frívilligt og ólønt, og verður tað mest sannlíkt eisini í framtíðina. Men tá ið man skrivar á eini heimasíðu sum eitt ítróttarfelag leggur navn til, so sigur tað seg sjálvt, at tað er neyðugt at leggja ávísar bindingar á seg, fyri ikki at ganga ímóti áhugamálunum hjá felagnum. So sum at skula skriva um FLOT-svimjarar, og ikki tala at viðurskiftum sum kann fáa FLOT og/ella FLOT-svimjarar í klemmu. Og lat tað verða sagt, at vit ongar ætlanir hava um at rýma frá heimasíðuni FLOT fyri tað… hon verður bara enn meira subjektiv 🙂

So sum man sigur: Her á svimjing.com avgera vit tríggir (og serliga eg) hvat sum er vert at skriva um, og hvat sum ikki má skrivast um. Ætlanin er ikki at hetta skal blíva tann rokmikla heimasíðan sum ‘niðurbrýtur føroyska svimjing’, sum onkur longu hevur sagt viðvíkjandi skrivingina á flot.info. Vit vilja absolutt helst hava eina sakliga og siðiliga síðu, og fara at sláa rímiliga hart niður á tey sum bara vilja spilla út. Men ætlanin er heldur ikki at kína øllum eftir hárunum, bara fyri at fáa frið. Líka mikið hvussu tað sær út, so royna øll at hjálpa, um tey yvirhøvur royna gera nakað;;og vit trúgva uppá at eisini kritikkur kann vera konstruktivur. Eisini kritikkur ímóti okkum.

Heimasíðan er ikki liðug enn, og tað verður hon nokk heldur ongantíð. Men kjarnufunkurnar eru klárar, og tað nýttar tí ikki at sita og bøla á henni longur. Her fara at vera almennar frásagnir, sum eru tíðindi og frágreiðingar føroyskari og altjóða svimjing. Bloggpostar, sum eru meira persónligar journalir frá okkum og vónandi øðrum eisini. Og vónandi eisini eitt sakligt og gevandi kjak í forum. Og nógv annað er í stoypiskeiðini, so sum myndasavn og teldupost-listar og annað gott. Allir skrásettir brúkarar kunnu gera øll sløg av tilfari, og eisini ikki-skrásett kunnu gera viðmerkingar. So bíða bara… um tit hjálpa til og uppføra tykkum væl, so kann hetta gerast ein heilt hampuliga góð síða!