svimjing.com

Team Danmark gav í gjár út hendan bókling, við 19 handgrípiligum viðmælum frá ítróttargranskarum, til hvussu venjarar og íðkarar í "Elitesport med høj intensitet" kunnu arbeiða fram ímóti toppúrslitum. Svimjing er ein av hesum ítróttum, sum krevja stóra mongd av harðari venjing, við nógvum endurtøkum og eyka venjing afturat ítróttargreinini. Og har íðkararnir hava somu likamligu og sálarligu trupulleikar; at langt er millum kappingar, at tey ikki fáa hvílt nóg nógv og tí fáa skaðar sum tey ikki sleppa av við aftur, tí at tey eru von at venja við pínu, og at tey kunnu fáa etingarólag av tí at kroppsvektin hevur týdning fyri úrslitið.

Ráðini eru millum annað, viðvíkjandi sálarfrøðina, at ansa eftir at íðkarin inn í millum kann 'løða upp aftur', og at hugsa langt heldur enn ímóti úrslitum í allarnærmastu framtíð. Viðvíkjandi likamligu venjingina, at raðfesta tunga og eksposiva styrkivenjing høgt, og at minka venjingarnøgdina við 50% upp ímóti teimum mest týdningarmestu kappingunum. Og viðvíkjandi kost, at venja og kappast "á fullan tanga", bæði tá ið tað kemur til kolvætu og vatn, og at fylla upp aftur við kolvæti og protein beint eftir venjing.

Tíðindaskriv frá Svimjisambandi Føroya

Leygardagin 6. mars er Slóðaraskipanin hjá Svimjisamband Føroya aftur á vitjan í Sørvági. Svimjisambandi var har vesturi 9. januar, og hevði tá eitt sera væleydnað tiltak fyri vágafólki. Hesuferð er tiltakið skipað næstan sum seinast, einasti munur er at frálæran fyrrapartin er býtt í tvey, har kl. 10.00 er tað fyri tey minni royndu, har eru øll vælkomin, tað er bara at møta upp. So klokkan 11.00 verður venjing og frálæru fyri tey, ið eru meira roynd, her er neyðugt at melda til hjá Anniku ella Joan.

Michael Phelps kemur við nøkrum góðum ráðum her á mensfitness.com, um at venja undirvatnsbein og 'skodd', at venja á landi eisini og minnast til at fáa svøvn. Og at venja seg mentalt, til at klára eisini óynsktar avbjóðingar:

"In Beijing, when my goggles filled with water, I didn't panic," Phelps says. "I went back to all of my training. I knew how many strokes it takes me to get up and down the pool, so I started counting my strokes. I didn't reach the time I was aiming for, but I did win the race."

Danska Micha Østergaard greiðir her á svoem.dk frá sínari venjingarlegu í "Olympia Stütz Punkt Berlin", har hon nú í eina tíð hevur vant saman við Britta Steffen og øðrum. Eitt áhugavert innlit í hvussu tey í løtuni venja "meget alternativ i forhold hvad de plejer", við éinari venjing í hylinum um kvøldið, typiskt 7 kilometrar har høvuðsserian er 6 kilometrar, og so annars við styrkivenjing og eftirfylgjandi sprintvenjing í svimjikanal um morgunin, ella 1,5 tíma "fitness" í rúmi sum kann stillast til at simulera at tú ert í 3200 metra hædd. Alt ógvuliga professionelt, í umstøðum sum hon lýsir sum "en lille olympisk by", har íðkarar úr ymiskum ítróttargreinum kunnu búgva, venja og fáa øll sløg av viðgerð, íroknað sólviðgerð ímóti vetrardepressión. Svimjihylurin er ein 50 metra hylur við 8 geilum, svimjikanal, spa og heitum pottum ... bara til hesar olympisku svimjararnar.

Danski Mads Glæsner er í hesum døgum á venjingarlegu í USA, har hann venur saman við Zhang Lin og Oussama Mellouli, ið vunnu ávíkavist 800 og 1500 frí á HM í Rom í fjør summar. Teir venja í felagnum Trojan Swim Club hjá venjaranum Dave Salo, sum eisini venur amerikansku Jessica Hardy, og sum er kendur fyri at skipa fyri stuttum men hørðum venjingum, har næstan alt er 'race pace'.

'Árgangsliðið' hjá Lyngby Svømmeklub valdu her fyrradagin at brúka eitt døgn av sínari vetrarferiu uppá at svimja eitt marathon, 42195 metrar, í hylinum í Lyngby. Eitt videoinnslag sæst her á TV2 Lorry, har tosað verður við venjaran Martin Bank, og ein av teimum 13-16 ára gomlu svimjarunum. Svimjararnir gjøgnumførdu allir, tíðliga týsmorgunin. Les her á SwimNews.dk

6-faldaði olympiski heiðursmerkjavinnarin Ryan Lochte hevur ikki luttikið á størri svimjistevnu teir 6 mánaðirnar, vegna knæskaða. Nú avdúkar Columbia Daily Tribune, at knæskaðin er eitt sundurskrætt liðband í knænum, sum kom tá ið hann í einum balli fór at dansa breakdance. Ja, breakdance, í 2009.

“You know how it is,” he said. “People go around in a circle and you start break-dancing. Someone comes in, someone comes out. So it’s my turn, I start dancing, my knee went one way, my foot went the other and I heard a pop.”

Danska svimjisambandið hevur eftir øllum at døma gjørt sína egnu OL stigaskipan, har 1000 stig eru tað sum tey vænta fer at krevjast til at koma í finalu á Olympisku Leikum. Hartil hava tey eina "anbefalet udviklingskurve", sum lýsir hvussu svimjararnir kunnu røkka hesum málum tá ið mennirnir eru 22 og kvinnurnar 20, "via en naturlig og forsvarlig udvikling år for år fra årgangssvømmere til seniorsvømmere. Og alt er enntá gjørt soleiðis, at tú við einum interaktivum "OL pointberegner" kann tasta tíðir inn hjá svimjarum frá tí at genturnar eru 9 og dreingirnir eru 11, og so síggja hvussu tey fyrihalda seg í mun til viðmældu framgongdina. Sí her á svoem.dk

Jyllandsposten skrivar her um nakað nýtt og fantastiskt sum tey kalla "aquaspinning", har ið rustfríar kondisúkklur verða settar niður í ein 1,30 metra djúpan hyl, og tey so súkkla á staðnum í 30-60 minuttir, undir leiðslu av einum instruktøri. Har eru bløð á hjólinum sum kunnu stillast til meira ella minni mótstøðu, og venjingin skal so nærmast sníkja teg inn, við tað at tú bara sveittar út í vatnið, og vegna tað lutfalsliga kalda vatnið ikki følir hvussu hart tað hevur verið fyrr enn aftaná. »Aquamotion er måske den sundeste form for træning, fordi den både beskytter kroppen og virkelig giver bonus for pengene«, sigur instruktørurin Søren Rune Andersen. Eeg spyrji bara, um tey ikki bara burdu roynt at svomið í staðin ;-)

Hóast vit eru mitt í myrkastu tíð, so kann man ikki siga annað enn at nógv hevur verið at frætt um svimjing, hesa seinastu vikuna. Vit hava hoyrt um svimjing bæði í Útvarpinum og á Rás 2, umframt at eitt stutt innslag var í 3-2. Bæði Dimmalætting og Sosialurin hava skrivað vítt og breitt um serliga stuðulin frá Leif Mohr til Pál. Vit hava verið í Barnaútvarpinum og Góðan Morgun Føroyar, og á flestu 'portalum'. Og tað hevur verið rímiliga breitt, um úrvalsítrótt, kappingar og útbúgving, og svimjing frá teimum heilt ungu, yvir rørslusvimjarar, til gamlar damur sum leypa á bláman.