Ongantíð fyrr…

Ongantíð fyrr hava so nógvir føroyskir svimjarar luttikið á oyggjaleikum. Nakð soleiðis ljómaði úr Útvarpslurtinum her fyri. Soleiðis eru vit menniskju, fyrr er farið og hetta man verða tað besta og tað mesta, ið nakrantíð hevur verið.

Lat meg byrja við at siga, at eg haldi at oyggjaleikaliðið til Oyggjaleikirnar á Rhodos, uttan iva er besta lið vit nakrantíð hava sent til oyggjaleikir. Tey hava møguleika at skapa besta úrslit hjá okkum nakrantíð bæði á oyggjaleikum og aðrastaðni.

Til oyggjaleikir í Føroyum 1989 luttóku 16 svimjarar:
Durita Dahl Djurhuus
Anita Ryggshamar
Annika Olsen
Elisabeth Mortensen
Elmar Ósá
Heri Mortensen
Høgni T. Hansen
Ian Skylv Jacobsen
Jákup Johansen
Johannes Nysted
Margreta Hansen
Martin Venned
Maud Poulsen
Petur Heðin á Fløttti
Sára Bech
Signar Hammer

Til oyggjaleikir 1991 luttóku 17 svimjarar:
Annika Anthoniussen
Annika Olsen
Dia Jacobsen
Durita Djurhuus
Elmar Ósá
Høgni T. Hansen
Ian Skylv Hansen
Jákup Johansen
Katrin Michaelsen
Kristina Danielsen
Malena Hansen
Martin Venned
Remi Lamhauge
Rúna Poulsen
Súsanna Petersen
Súsanna Reinert Petersen
Sørin Olsen

Leggið til merkis at hesar báðar úttøkurnar vóru uttan kravtíðir.

Góða eydnu á Rhodos.

Heilsan Jon

Meðan vit bíða…

Ímeðan vit bíða eftir at hoyra frá føroyingunum á Rhodos muga vit lána tilfar frá øðrum keldum.

Veðrið á Rhodos er gott. Tey hava 30 hitastig og bakandi sól. Súkklarar úr Jersey hava roynt kappingarteinin, ið er 120 km langur við brekkum upp í 10% hall (hallið niðan á Eiðisskarð úr Funningi er í miðal 6,8%). Tíbetur eru tey lokalu fólkini fús í at koma við eina kalda, hjálpandi hond.

Vónandi finna Rókur og Ottar ókeypis tráðleyst net her, so vit kunna fáa fersk tíðindi teimum. Continue reading Meðan vit bíða…

Um myndir á svimjing.com

Hendan heimasíða hevur tíverri einki skipað myndasavn enn, og fær tað nokk heldur ikki í bræði. Men nú Oyggjaleikir standa fyri durum, og tveir av trimum fyrisitarum av heimasíðuni fara til Rhodos við myndatólum, so leggja vit fyribils myndir her á Flickr-kontini hjá Róki og Lis, so hvørt sum vit fáa høvi til tess.

Tað er ikki tí at tað ikki ber til at gera eina myndaloysn til hesa heimasíðu, men meira tí at eg (Rókur) ikki veit hvørja eg skal velja. Trupulleikin er snøgt sagt, at har finst éin rímiliga góð loysn til skipanina, sum kjarnulimir aftan heimasíðuskipanina siga fer at doyggja út, til frama fyri eina sum eg ikki meti at vera nóg góð enn.

Hartil er tað alt tað prinsipiella, um hvussu eitt slíkt myndasavn skal virka, á eini heimasíðu sum svimjing.com.

Persónliga vildi eg helst at hon var rættiliga frí, so at skilja at øll svimjiáhugaði frítt kundu leggja tær myndir á síðuna, sum tey hildu vera viðkomandi. Og gjarna so lætt sum yvirhøvur gjørligt, við møguleika at senda inn myndir á allar møguligar mátar. Til dømis gjøgnum heimasíðuna, í telduposti, av fartelefonini; og gjarna við okkum uppsendingaramboði eisini, ífall man vil senda upp fleiri í senn.

Men myndir eru jú rættiliga nógv vandamiklari enn tekstur, tá ið tað kemur til hvussu stoytandi tær kunnu vera. Vit risikera jú nógv ógvusligari porno ella hán í myndum enn í teksti. Og tað kann tí væl vera at ein sovorðin skipan ikki kann verða heilt frí til brúkararnar at stýra sjálvi, um vit ábyrgdarar ikki skulu risikera at koma í klemmu við lóg og landaskil.

Men hetta við ljótum myndum er nú ikki tann viktigasta orsøkin til at myndasavnið ikki finst enn, um enn vit sjálvsagt mugu taka støðu til hesar spurningar. Eg kann væl byrja varliga, og so loyva meira og meira. Ella brúka øvutu loysnina, har eg leggi út við at líta á tykkum. Ella seta í verk eina skipan har eingin mynd kemur á síðuna, fyrr enn ein fyrisitari hevur góðkent hana fyrst.

Nei, trupulleikin er sum sagt meira tað, at eg bíði eftir einum greiðum tekni frá teimum sum gera hesa heimasíðuloysn, um hvat mótul er tað rættasta at satsa uppá. Eg havi bíðað leingi, og kann væl bíða eina løtu afturat; tí eg ivist ikki í at hon kemur, ein dag.

Men Oyggjaleikir koma nú óivað áðrenn, haðani eg vænti mær nógvar myndir. Eitt er at eg sjálvur fari at taka nógvar myndir, men Ottar hevur eisini myndatól við, og fer mest sannlíkt eisini at taka eina rúgvu av myndum frá serliga svimjingini.

Konan og eg hava í longri tíð brúkt eina fína loysn kallað Flickr til familjumyndir og tílíkt; og eg havi tí bara gjørt mær ein undirbólk til mínar svimjimyndir har nú, heldur enn at stríðast við at gera eina heilt triðju loysn, meðan vit bíða eftir teirri røttu til svimjing.com. Ein annar bólkur finst so til triathlon-myndir, og ein triðja til alt av Rhodos.

Ein heilt annar spurningur er, hvussu tað fer at gangast okkum at fáa myndir upp á alnetið, frá Rhodos av. Okkara íbúð hevur mær vitandi ikki alnetsamband, og hartil verða vit meira ella minni upptikin frá morgun til myrkurs, av at hyggja at svimjing og súkkling og øðrum, og venja triathlon og so framvegis. Kanska finna vit onkra alnet-café í Rhodos býi, ella sleppa til eitt tráðleyst samband hjá SVF, ella okkurt tílikt. Ella kanska vit mugu bara bíða til vit koma heim aftur.

Men tað er púra vist, at allar borðbærar myndir frá Oyggjaleikum av koma upp á hasa Flickr-konto, fyrr ella seinni 🙂

Forrestin – um nakar hevur nakrar svimjimyndir sum viðkomandi kundi hugsað sær at fingið á hasa Flickr-kontoina, so setið tykkum endiliga í samband við meg (Rók). Vit hava óavmarkað pláss til myndir har, aftur fyri at gjalda nakrar fáar hundrað krónur um árið.

Sensurur á svimjing.com

Ja so kom tað hartil, tíverri. Eftir at hava tosað við Bartal og Ottar í kvøld, so havi eg avgjørt at taka burtur nakrar viðmerkingar her á heimasíðuni, av tí at har vóru beinleiðis persónlig álop í teimum. Tað er við ringum tannabiti; men vit halda ikki at føroyska svimjingin er klár til at hava sovorðið opið stríð liggjandi á eini almennari heimasíðu, og tað var so í øllum førum ikki endamálið við svimjing.com.

Sjálvur haldi eg at kjak er gott, í øllum førum millum røttu viðkomandi. Eisini klandurskjak. Sum Sørin S Djurhuus segði tað, tá einaferð á einum fundi ella onkrum tílíkum, so er tað einki sum kann reinsa luftina so væl sum eitt ordiligt klandur aftanfyri afturlætnar hurðar. ‘Lata hurðina aftur og so ordiliga skelda seg lidnan’.

Men altso, vit vilja gjarna at hendan heimasíðan skal vera eitt positivt stað at fáa kunning um føroyska svimjing. Fyri at menna svimjingina, styrkja um samanhaldið hjá teimum sum longu eru uppi í svimjingini, og kanska lokka onnur til eisini. Hvør veit, kanska enntá áskoðarar 🙂

Bartal helt, at um ikki eg trekti eina linju nú, so fór tað at verða torført at trekkja hana seinni. Til dømis um onkur skuldi lagt ógvusliga eftir onkrum sum kundi tulkast at vera nærri mær sjálvum. Tá fór tað at virka ógvuliga partískt at byrja at taka burtur viðmerkingar, um eg longu hevði lovað fólki at leggja eftir øðrum.

Tí er ‘lætta’ loysnin at taka alt burtur sum inniheldur beinleiðis persónlig álop. ‘Taka burtur’ merkir her at goyma tey aftanfyri, heldur enn at strika. Eg havi tikið tey aftur, á sama hátt sum eg kann geva út. So um nakar er ógvuliga fortørnaður um at hava mist sítt tilfar, so kann eg senda viðkomandi tað í telduposti.

Eg vóni at lesarar og brúkarar skilja okkara støðu. Vit vilja helst ikki styggja fólk burtur við at strika, men heldur ikki enda við eini síðu sum bara er kend fyri klandur. Um tit vilja tala at onkrari støðu, so roynið vinarliga at gera tað uppá ein so positivan máta sum gjørligt, og uttan at nevna persónar ov nógv. Minnist til at eisini fjølmiðlar hyggja inn á síðuna, av og á.

Við svimjikvøðu

Rókur

PS Barba: Ein viðmerking hjá tær er av órøttum tikin aftur, av tí at hon var eitt aftursvar til viðmerking sum nú er burtur. Tú rósar annan venjaran; men tá ið eg hevði tikið fyrru viðmerking burtur, sá tað út sum um at tú rósaði mær (tí at eg hevði skrivað eina viðmerking beint áðrenn). Tað kunnu vit ikki hava 🙂

Fer Phelps at taka 8 gull ?

Eingin svimjari hevur nakrantíð vunnið 8 gullheiðursmerki á heimsmeistarastevnu, men Michael Phelps úr USA er eitt gott boð at gera tað hesu ferð. Hann skal luttaka í 5 einstaklingakappingum, harav hann eigur heimsmetið í 200 og 400 blandað, í 200 firvald, er næstskjótasti nakrantíð í 100 firvald, og forsvarandi heimsmeistari í 200 frí. Og ferðin burdi verið har, við tað at hann setti heimsmetið í 200 firvald so seint sum 17. februar í ár.

5 einstaklingakappingar eru sjálvsagt ikki nóg mikið til at vinna 8 gull. Men serfrøðingarnir vænta at hann skal luttaka í teimum trimum stafettunum eisini (4 x 100 frí, 4 x 100 blandað og 4 x 200 frí), um ikki onkur annar verður valdur í staðin fyri hann.

Amerikanar eru absolutt kvalifiseraðir til at taka gullheiðursmerki (og heimsmet) í serliga blandað stafettini, við tað at aktivir svimjarar hjá teimum eiga heimsmetini í bringu, rygg og firvald, umframt teir óivað eiga góðar crawlsvimjarar eisini.

Men trupulleikin hjá Phelps er akkurát hesin, at ‘hin’ firvaldasvimjarin, Ian Crocker, heimsmethaldari í 100 firvald, eisini er amerikani. Phelps jagstraði eisini heimsmet í heiðursmerkjum í Olympisku leikunum í Athen, men ‘gav’ tá firvaldaplássið til Ian Crocker, av tí at Phelps vísti seg ikki at vera heilt í stoytinum, meðan Crocker var flúgvandi. Og teir settu heimsmet og alt hatta har.

Viðvíkjandi kapping í einstaklinakappingunum, so er Phelps fullstendiga einaráðandi í 200 firvald, meðan hann kann fáa kapping frá t.d. Laszlo Cseh úr Ungarn í blandað, og frá t.d. Pieter van der Hoogenband og Grant Hackett í 200 frí. Ein lætti má tað tó vera, at heimsmethaldarin í 200 frí, Ian Thorpe, er givin, og Phelps tí er tann av hesum sum hevur svomið teinin skjótast.

Av øðrum ‘metum í heiðursmerkjum’ kann nevnast, at Grant Hackett hevur møguleika at seta met í flest heimsmeistaraheiti í somu grein á rað, við at hann til nú hevur vunnið 1500 frí gullheiðursmerki rað. Hann og Hoogenband fara eisini eftir hvørjum sínum meti á OL næsta ár, tá ið báðir kunnu gerast fyrsti maður sum vinnur OL-gull í somu grein 3 ferðir á rað, Hackett í 1500 frí og Hoogenband í 100 frí.

Upprunalig tíðindi á Eurosport

Myndin er fingin av Flickr-kontoini hjá ‘Danzden’

Fá boð um svar til tínar postar og viðmerkingar

Eg havi í kvøld lagt inn eitt mótul sum ger tað gjørligt hjá skrásettum brúkara at fáa fráboðan í telduposti, um onkur ger viðmerkingar til postar ella viðmerkingar sum hesin hevur gjørt. So sleppur man undan at skula hyggja inn aftur á síðurnar allatíð, fyri at kanna eftir um nakar svarar.

Tað byrjaði at blíva eitt sindur óruddiligt við leinki undir sjálvum postunum, og eg havi tí fyribils óvirkjað ein part av funkunum. Sovorðið sum at man kann fáa fráboðan hvørja ferð onkur skrivar um eitt ávíst evni, ella í eitt ávíst forum, osfr. Haldi at týdningarmesta funka er at kunna fylgja við hvat sum hendir við postarnar hjá einum sjálvum.

Brúkararnir kunnu seta skipanina til sjálvvirkandi at tekna sovorðin hald, so at man ikki skal minnast til at gera tað so hvørt. Sí mynd niðanfyri, sum er av møguligu setingunum undir ‘Mín konto’ í valmyndini til høgru (hjá innritaðum brúkarum). Har er eisini ein møguleiki til at strika hald aftur fyri allar ella hvønn einstaka post, ífall at man ikki longur tímir at fáa hasar teldupostarnar longur.

Teldupostlistarnir klárir

Nú ber tað til hjá brúkarum her at melda seg til ella frá ein teldupostlista, sum ger tað lættari at senda teldupostar út til øll. Til dømis um man hevur onkur áhugaverd ella átroðkandi tíðindi, sum áhugaði burdu fingið at vitað um beinan veg.

Ein teldupostlisti er ein slags postsentralur sum tekur ímóti og sendir víðari teldupostar. Fólk melda seg til tænastuna; og so er bara at senda teldupostar til news[kurla]svimjing.com, til at øll tilmeldaði fáa boðini. Og øvut er tað lætt at melda seg frá aftur, ífall at tað vísir seg at man allíkavæl ikki er áhugaður í tað sum verður sent ígjøgnum skipanina.

Um tit longu eru á onkrum teldupostlista á alnetinum, so er talan mest sannlíkt um somu Mailman skipan sum her. Hon er eitt sindur gamaldags í sniði, men er robust og fylt við øllum møguligum trygdarfunkum, til at umganga spam og ov stórar teldupostar og so framvegis. Umframt at eg sum ein eyka trygdarfunka havi avgjørt, at einans tilmeldaðir brúkarar kunnu senda inn teldupostar til listan.

So tað er væl bara at royna, um skipanin er nakað fyri tykkum. Annaðhvørt við at brúka funkuna sum er her úti til vinstru hjá skrásettum og innritaðum brúkarum, ella at hyggja á teimum meira nørdutu síðunum her. Nørdasíðurnar og umsitingar-teldupostarnir tosa tíverri danskt enn, av tí at eg ikki havi tikið meg saman til at týða tað til føroyskt.  Og tí at eg mátti velja okkurt norðurlendskt, til at fáa ‘ð’ og tílíkt at rigga.

Forrestin, ikki stressa um at teldupostadressan til tíðir eitir news[kurla]lists.svimjing.com og til tíðir news[kurla]svimjing.com, tí báðar gera tað sama. Og um tit ikki tíma at skráseta tykkum á svimjing.com bara fyri at sleppa á teldupostlistan, so riggar tað útmerkað at gera tað har yviri á donsku nørdasíðunum. Tilmeldaðir brúkarar kunnu eisini kaga í arkivið, sum goymir allar teldupostar sendar til news[kurla]svimjing.com.

Eg havi fyribils samansett skipanina soleiðis, at einans umsitarar kunnu síggja hvørji sum eru tilmeldað listan. Møguleiki er annars at loyva øllum tilmeldaðum at síggja hvør annar sum er tilmeldaður, ella at lata hann vera almennur. Men eg helt at hetta fór at avskrekka minst, ífall man ikki er áhugaður í at enda á øðrum listum eisini. Eitt annað val hjá mær var at lata øll tilmeldaði síggja hvør ið upprunaliga sendi teldupostin inn, heldur enn at skifta hann út við news[kurla]svimjing.com.

Her er enn eingin funka til at fáa teldupostar beint á forsíðuna ella tílíkt, ella at tíðindina fara hinvegin út til teldupostlistan. Men tað kemur vónandi seinni, tá ið eg havi fingið testað tær funkurnar betri.

svimjing.com á alnetið

Vælkomin til hesa nýggju føroysku heimasíðu um svimjing. Sum tað í løtuni stendur á forsíðuni, so er endamálið við heimasíðuni at gera tað lættari hjá føroyingum at frætta frá og samskifta um svimjing, í vón um at hetta kann styrkja um áhugan hjá fjølmiðlum og føroyingum sum heild fyri hesum frálíka ítrótti.

Harða kjarnan aftanfyri heimasíðuna eru Ottar í Hjøllum og Bartal Højgaard, umframt undirritaði Rókur í Jákupsstovu. Við mær sum ábygdara, við tað at eg eigi heimasíðunavnið svimjing.com, ambætaraplássið á Dreamhost, og flestu rættindi sum ‘admin’. Vit hava til nú staðið fyri heimasíðuna flot.info hjá Svimjifelagnum FLOT, men eru komnir eitt sindur í eina trongstøðu, við tað at vit har skriva skiftivís subjektivt fyri FLOT og meira objektivt fyri føroyska svimjing sum heild. Við tí úrsliti, at lesarar hava ilskast skiftivís um at vit vóru og ikki vóru lokalir. So nú hugsa vit at tað er betri at skifta millum tveir hestar, enn at royna at ríða á báðum í senn.

Hartil vóru aðrar orsøkir til at skifta, so sum at verandi heimasíðuskipan á flot.info hevur ávísar irriterandi avmarkingar, samstundis sum hendan virkar at vera ógvuliga góð, og vit hartil gjarna vilja koma eitt sindur úr skugganum av Svimjifelagnum FLOT. Alt heimasíðuarbeiði hjá okkum hevur til nú verið fullkomiliga frívilligt og ólønt, og verður tað mest sannlíkt eisini í framtíðina. Men tá ið man skrivar á eini heimasíðu sum eitt ítróttarfelag leggur navn til, so sigur tað seg sjálvt, at tað er neyðugt at leggja ávísar bindingar á seg, fyri ikki at ganga ímóti áhugamálunum hjá felagnum. So sum at skula skriva um FLOT-svimjarar, og ikki tala at viðurskiftum sum kann fáa FLOT og/ella FLOT-svimjarar í klemmu. Og lat tað verða sagt, at vit ongar ætlanir hava um at rýma frá heimasíðuni FLOT fyri tað… hon verður bara enn meira subjektiv 🙂

So sum man sigur: Her á svimjing.com avgera vit tríggir (og serliga eg) hvat sum er vert at skriva um, og hvat sum ikki má skrivast um. Ætlanin er ikki at hetta skal blíva tann rokmikla heimasíðan sum ‘niðurbrýtur føroyska svimjing’, sum onkur longu hevur sagt viðvíkjandi skrivingina á flot.info. Vit vilja absolutt helst hava eina sakliga og siðiliga síðu, og fara at sláa rímiliga hart niður á tey sum bara vilja spilla út. Men ætlanin er heldur ikki at kína øllum eftir hárunum, bara fyri at fáa frið. Líka mikið hvussu tað sær út, so royna øll at hjálpa, um tey yvirhøvur royna gera nakað;;og vit trúgva uppá at eisini kritikkur kann vera konstruktivur. Eisini kritikkur ímóti okkum.

Heimasíðan er ikki liðug enn, og tað verður hon nokk heldur ongantíð. Men kjarnufunkurnar eru klárar, og tað nýttar tí ikki at sita og bøla á henni longur. Her fara at vera almennar frásagnir, sum eru tíðindi og frágreiðingar føroyskari og altjóða svimjing. Bloggpostar, sum eru meira persónligar journalir frá okkum og vónandi øðrum eisini. Og vónandi eisini eitt sakligt og gevandi kjak í forum. Og nógv annað er í stoypiskeiðini, so sum myndasavn og teldupost-listar og annað gott. Allir skrásettir brúkarar kunnu gera øll sløg av tilfari, og eisini ikki-skrásett kunnu gera viðmerkingar. So bíða bara… um tit hjálpa til og uppføra tykkum væl, so kann hetta gerast ein heilt hampuliga góð síða!