Ífall at onkur ikki hevur fingid tað við, so bloggi eg hesuferð mest á heimasíðuni hjá FLOT, um kappingina í Køge. Havi júst funnið staðfest at her er frítt internet í høllini, og hetta verður tí skrivað ‘live’ av balkongini í Køge.
Category: Kapping
Draktin skrædnaði hjá Kára
Óhepnið var eftir Kára í kvøld, tá ið hann skuldi svimja hálvfinalu í 100 rygg. Spildurnýggja draktin skrædnaði, so at vatn fyltist í hana; og hann svam tí ‘bara’ teinin við tíðini 59.32, har hann í innleiðandi í morgun svam 58.48. Teir 59 rukku bara til eitt tólvtapláss, og Kári kom tí ikki í finaluna.
Jón Hestoy vil vera SSF forseti
Tað er nú greitt at Jón Hestoy stillar upp at verða formaður í Svimjisambandi Føroya, á aðalfundinum í morgin. Sí t.d sportal.fo. Sum kunnugt leggur Palli Ziskason frá sær, og Jón er tí rættiliga tryggur at verða formaður, um ikki onkur annar stillar upp á sjálvum fundinum.
Mona setti met í 1500 frí
Sum tit kunnu lesa her á susvim.com, so betraði Mona Simonsen í dag um føroyska metið í 1500 frí við ikki færri enn 20 sekundum, nú hon á Danmarks Mesterskaberne på Kortbane svam teinin í tíðini 17:23.25. Hendan tíðin rakk til eitt sjeyndapláss í kappingini við danir.
Hildur og Astrid vunnu ávikavist silvur og bronsa
Hildur á Fløtti (FS) og Astrid Foldarskarð (FLOT) vunnu silvur og bronsa í 100 blandað í bólkinum fyri 14-15 ár. Astrid og Hildur svumu í sama riðli. Astrid vendi fyrst aftaná 50m (34.59), men Hildur hevði ein góðan endaspurt.
Poula Ø. Mohr (FS) og Birita Debes (FLOT) blivu nr 4 og 11 í sínum bólki (12-13 ár).
Continue reading Hildur og Astrid vunnu ávikavist silvur og bronsa
Elspa vann silvur í 200 frí
Elspa Mørkøre vann silvur í 200 frí við tíðini 2:00.53. Hon hevur harvið kvalifiserað seg til EM í desember, siga tey úr Danmark. Vinnarin, Lotte Friis, kom í mál við tíðini 1:58.19. Elspa lá annars nr 4 aftaná 50 m, men tók seg framm sum nr 3 eftir 100 m og vendi sum nr 2 aftaná 150 m.
Pál vann silvur í 200 frí og nýtt junior met
Mads Glæsner vann gull í 200 frí. Mads førdi frá byrjan til mál við Pál undir liðini allan vegin. Vinnaratíðin hjá Mads Glæsner var 1:45.55, sum er nýtt danskt senior met [Jón viðmerkti hósdagin at Mads setti nýtt met í 4×200 við tíðini 1:45.53]. Pál setti nýtt danskt/føroyskt/persónligt/Suðuroyar/evropeiskt? junior met við tíðini 1:47.13. Kappingin um 3. plássið var tøtt millum Johan Peen (Birkerød), Frederik Siem (Farum) og gamli junior met haldarin Jon Rud (West Swim). Aftaná 50 m lá Johan nr 3, men so vendi Frederik sum nr 3 við 100 inntil Jon Rud tók yvir 3. plássið tær seinastu 50-100 m.
(Myndin er av Páli, Mads Glæsner, Frederik Siem og Jon Rud, sum Jón Bjarnason tók fyrr í ár)
Pál setti nýtt danskt junior met í 200 frí
Ífylgi livetiming.dk setti Pál Joensen nýtt danskt junior met í 200 frí við tíðini 1:48.25. Men tað er allarhelst tí, at met listin á livetiming.dk ikki er dagførdur, tí Pál svam skjótari í gjár. Tíðin var eisini tann besta í teimum innleiðandi kappingunum. Meira er at lesa á Susvim.com. Undir øllum umstøðum verður tað ein gysari millum Mads Glæsner, Pál og co, tá finalurnar byrja kl 16.30 føroysk tíð. Fyrst verður stafett í 4×50, síðani finalan hjá kvinnum í 200 frí (Elspa) og aftaná verður tað 200 frí finalan hjá monnum (Pál), soleiðis sum eg havi skilt skránna.
Køge Open byrjar um eina løtu
Teir ungu svimjarnir eru nú á veg til Køge Svømmeland at kappast, havi eg frætt umvegis sms. Kappingarnar kunna fylgjast beinleiðis á livetiming.dk. Poula Ø. Mohr, Hildur á Fløtti, Astrid Foldarskarð, Birita Debes, Jónfríð Hansen, Jóhanna Egholm, Aimée Jacobsen, Eyðrið Hansen, Joan Kristina í Jákupsstovu og Bjørg Olsen svimja í kapping 3 (100 blandað). Tróndur Olsen, Kjartan Petersen og Jóhan Hermann Slættalíð luttaka í kapping 4 (100 blandað). Birita Debes, Jónfríð Hansen og Jóhanna Egholm skulla aftur í hylin í kapping 5 (200 rygg), meðan Tróndur Olsen luttekur í somu disiplin í kapping 6. At enda verða føroyingar við í einari 8 x 50 stafett.