Metnógvir føroyingar til Køge Open í ár

Frætti sum slatur í gjár at vit væntandi skulu við tveimum flúgvarum til Køge Open í ár, av tí at vit ikki passa í eitt. Flogførini hjá Atlantic taka upp í 96 fólk, so tað má merkja at vit vera í øllum førum um 100 fólk í Køge í oktober 🙂

Køge Open er árlig altjóða svimjistevna hjá Køge Svømmeklub, sum føroysk svimjifeløg hava luttikið á í fleiri ár eftirhondini. Í ár fara í øllum førum fýra svimjifeløg – tak meg ikki í tí, men eg meini tey eru FLOT, Fuglafjarðar Svimjifelag, Reki og Ægir.

Føroyingar hava klárað seg rættiliga væl á stevnuni, serliga í kraft av Elspu Mørkøre sum eigur heili 10 av teimum 17 metunum hjá gentum í ‘gruppe 2’. Føroyingar gjørdust nr 2 í kappingini í fjør, tá ið øll stig vórðu samanløgd, umframt at Elspa stendur upplistað fyri besta bragd hjá juniorgentum (747 stig í 200 frí).

Innbjóðing til Metstevnuna 2007

Árliga metstevnan verður í Tórshavn 25.-26. august, har svimjarar fáa ein síðsta kjans at seta met í nú skjótt farna svimjiárinum 2006/2007, áðrenn vit skifta svimjiár tann 1. september. Hetta hevur týdning hjá serliga bólkasvimjarum, við tað at teir eldru av teimum skifta bólk tá ið svimjiárið skiftir.

Tvøroyrar Svimjifelag hevur lagt út hesa skrá á heimasíðu síni tsvim.com, sum eg tí loyvi mær at endurgeva her.

Leygarmorgun: Upphiting kl 8.00, kapping kl 9.00

  • Kapping:1   400 metur  blandað gentur
  • Kapping:2   200 metur bringa dreingir
  • Kapping:3   100 metur rygg gentur
  • Kapping:4   100 metur firvald dreingir
  • Kapping:5   200 metur frí gentur
  • Kapping:6   50 metur rygg dreingir
  • Kapping:7   50 metur firvald gentur
  • Kapping:8   400 metur frí dreingir
  • Kapping:9   200 metur bringa gentur
  • Kapping:10  200 metur blandað dreingir
  • Kapping:11  4×100 metur blandað gentur
  • Kapping:12  4×100 metur frí dreingir                                

Leygardag: Upphiting kl 15.00,  kapping kl 16.00

  • Kapping:13  200 metur rygg dreingir
  • Kapping:14  100 metur blandað gentur
  • Kapping:15  50 metur bringa dreingir
  • Kapping:16  100 metur firvald gentur
  • Kapping:17  100 metur frí dreingir
  • Kapping:18  50 metur rygg gentur
  • Kapping:19  200 metur firvald dreingir
  • Kapping:20  400 metur frí gentur
  • Kapping:21  100 metur blandað dreingir
  • Kapping:22  100 metur bringa gentur
  • Kapping:23  4×50 metur blandað dreingir
  • Kapping:24  4×50 metur frí gentur

Sunnumorgun: Upphiting kl 8.00,  kapping kl 9.00

  • Kapping:25  800 metur frí gentur
  • Kapping:26  1500 metur frí dreingir
  • Kapping:27  50 metur frí gentur
  • Kapping:28  100 metur bringa dreingir
  • Kapping:29  200 metur rygg gentur
  • Kapping:30  100 metur rygg dreingir
  • Kapping:31  4×200 metur frí gentur
  • Kapping:32  4×200 metur frí dreingir                                 

Sunnudag: Upphiting kl 14.00,  kapping kl 15.00

  • Kapping:33  200 metur frí dreingir
  • Kapping:34  200 metur firvald gentur
  • Kapping:35  50 metur firvald dreingir
  • Kapping:36  100 metur frí gentur
  • Kapping:36  100 metur frí gentur
  • Kapping:37  4×100 metur blandað dreingir
  • Kapping:38  4×100 metur frí gentur
  • Kapping:39  200 metur blandað gentur
  • Kapping:40  400 metur blandað dreingir
  • Kapping:41  50 metur bringa gentur
  • Kapping:42  50 metur frí dreingir
  • Kapping:43  4×50 metur blandað gentur                               

Tilmeldingarnar skulu sendast til lssa[kurla]post.olivant.fo mikudagin 23. august kl 21.

Splitt-tíðir og annað frá EJM 2007

Til allar áhugaðar svimjinørdar, so kunnu splitt-tíðir, frekvensur og tílíkt hjá Elspu Mørkøre síggjast og samanberast við úrslitini hjá hinum gentunum í semifinalu og finalu á EJM 2007, við at fara her og velja at síggja spjaldrasíðuna “WBAC50F”. Vit síggja at Elspa hevur næstbestu armtakslongd av øllum, men hinvegin ikki heilt frekvensin hjá teimum skjótastu.

Vinnarin C. Zenner hevur ein meðalfrekvens á 51 armcyklur/min yvir teir 50 metrar rygg, og harvið eina meðal armtakslongd á 1,95 metrar, meðan nr 2 hevur ávíkavist 47 og 2 metrar, nr 3 hevur 56 og 1,71 metrar, og ein til samanberingar innskotin heimsstøðissvimjari hevur 56 og 1,76 metrar. Elspa hevur so aftur til samanberingar 44 í frekvens og 2,09 metrar lang tøk, sum alt annað líka merkir at hon hevur ein teknikk á heimsstøði (við tað at hon kann svimja so langt í hvørjum armtaki), men ikki heilt krefturnar til at fáa armarnar so skjótt runt. Ella møguliga hugsar eitt vet ov nógv um armtakslongd, so at frekvensurin fellur eitt sindur ov nógv.

Men bíða nú, nr 5 hevði enn longri armtøk sum Elspa (2,1 metur), og næstan líka so spakuligan frekvens (45), so sum ikki einaferð er alt individuelt. Tað er ikki fyrr enn vit síggja Elspu tvær ferðir í slíkum kappingaranalysum, at vit veruliga kunnu byrja at samanbera.

Tíverri finnast splitt-tíðirnar bara hjá Elspu í 50 rygg, og ongar hjá hinum annars góðu EJM-luttakarunum hjá okkum, av tí at Rejn Haljand bara leggur analysurnar hjá semifinalu- og finalu-luttakarum út á heimasíðu síni.

Jodie Henry ill inn á stranga dopingeftirlitið í Avstraliu

Olympiski meistarin í 100 frí orðar seg heldur løgið, tá ið hon ilskast inn á dopingeftirlitið í Avstraliu. Sambært SwimNews her so er hon nevniliga bangin fyri at Avstralia fer at hava tað hart á OL í Beijing 2008, av tí at onnur lond ikki hava líka strangt eftirlit. Ljóðar næstan sum hon kundi hugsað sær at dopað seg.

Nú kann tað væl vera at SwimNews leggur henni orð í munnin, spekulerar ov nógv ella útstillar hana ørvísi enn hon hevði ætlað. Men um vit hyggja at sitatum og orðaljóði í hasari greinini, so sær tað altso út sum um at Henry er meira ill inná at aðrar tjóðir hava lættari við at dopa seg, enn um tað at skula testast so ofta.

“Before the 2003 world champs over here, we had the girls watch us do our sample. In Barcelona, they just sent us into a room and we did our sample and came out. They wouldn’t watch us at all.” .. “That sort of stuff annoys you because you’d want to hope that athletes overseas are doing the same things as us”

Hesi sitat eru forrestin tikin beinleiðis úr eina samrøðu sum Jodie Henry hevði við The Sunday Telegraph, og sum tit kunnu lesa her. Tíverri nevna tosa tey ikki so nógv meira um hetta við dopingroyndunum har. So vit mugu bara gita um hon bara er stressað av øllum testunum, ella (vónandi) irriterað inn á at onnur sleppa at dopa seg, ella (puha) øvundsjúk inn á at onnur sleppa at dopa seg.

Veruliga úrslitini frá triathlon á Rhodos

DSC_0397So komu tey allíkavæl fram, tey offisiellu úrslitini frá Rhodos. Ella tað vil siga, eg haldi at hetta eru tey røttu, hóast tey ikki koma frá fyriskiparunum á Rhodos. Evald hevur nevniliga fingið tey frá triathletinum Torquil á Orkney, men tey síggja altso nóg nágreinilig út, til at talan kann vera um tær offisiellu elektronisku tíðtakingarnar.

Viðfest er skjalið sum Torquil sendi Evaldi, men annars taki eg skjótt saman um her niðanfyri. Um eg samanberi við splitt-tíðirnar sum Evald tók, so sær tað út til at hesi offisiellu úrslitini rokna skiftið frá svimjing til súkkling uppí svimjingina (har Evald tók tíð til tey komu upp úr havinum, altso áðrenn tey fóru at skifta), og skiftið frá súkkling til renning uppí súkklingina.

  1500m svimjing 40 km súkkling 10 km renning Samlað úrslit
Gudmundur 0.23.16 1.13.08 0.37.13 2.13.37
Andrass 0.28.02 1.10.12 0.37.38 2.15.52
Áslakur 0.31.36 1.08.47 0.37.22 2.17.45
Ottar 0.24.49 1.13.18 0.42.07 2.20.14
Karina 0.25.48 1.15.52 0.37.22 2.19.02
Súsanna 0.25.47 1.15.15 0.38.20 2.19.22
Joan 0.29.21 1.17.30 0.34.40 2.21.31

Legg forrestin til merkis rennitíðina hjá Joan nú… 10 km undir 35 minuttir 🙂

Føroysku úrslitini í triathlon á Rhodos

DSC_0419

Tað eru tíverri ongar millumtíðir í offisiellu úrslitalistunum frá triathlon-kappingini á Rhodos, og eg brúki tí her niðanfyri tær tíðir sum Evald Rasmussen tók í leypi av kappingini, umframt endaligu offisiellu tíðina. Millumtíðirnar hjá Evaldi raka nokk ikki beint á har sum tær áttu at hava verið tiknar, men tað er so betri enn einki.

Tíðir á Rhodos:

  1500m svimjing Skift + 40 km súkkling Skift + 10 km renning Samlað úrslit
Gudmundur 0.22.08 1.13.32 0.37.57 2.13.37
Andrass 0.27.11 1.10.17 0.38.24 2.15.52
Áslakur 0.30.48 1.08.59 0.37.58 2.17.45
Ottar 0.23.37 1.13.47 0.42.50 2.20.14
Karina 0.25.11 1.15.55 0.39.56 2.21.02
Súsanna 0.24.45 1.15.25 0.41.12 2.21.22
Joan 0.28.30 1.17.25 0.37.36 2.23.31

Samanbera vit við úrslitini úr Haderslev, umleið ein mánaða áðrenn kappingina, so síggja vit at tað serliga er í svimjingini og súkklingini at íðkararnir dragna, meðan teir faktiskt renna ‘yvir evni’ í tí nógva hitanum. Hetta luktar eitt sindur av at svimjiteinurin var ov langt og renniteinurin ov stuttur, meðan súkklitíðirnar nokk eru rímiliga á leið (krevjandi ruta við vindi og brekkum, smølum vegum og krappum svingum).

Navn 1500m svimjing + skift 40km súkkling Skift + 10km renning Tilsamans
Joan Bláfoss 00:24.42 01:10:09 00:37:18 02:12:09
Karina Ottesen 00:22:23 01:10:01 00:40:30 02:12:54
Súsanna Skylv Sørensen 00:24.01 01:14:59 00:42:43 02:21:43
Sóley í Eyðansstovu 00:31.18 01:15:18 00:52:47 02:39:23
Áslakur Nesá ? ? ? 02:14:06
Andrass Joensen 00:25.42 01:08:23 00:42:41 02:16.41

Gev gætur at svimjingin í Haderslev er íroknað skift úr vátdrakt til súkkling, meðan skiftið á Rhodos er tikið uppí súkklingina.

Sviar duga eisini

Stefan Nystrand (25 ár) og Therese Alshammar (30 ár) hava í dag hvør í sínum lagi sett næstbestu tíð í heiminum nakrantíð; Nystrand í 100 frí við tíðini 47.91, og Alshammar í 50 frí við tíðini 24.23 (báðar tíðir í 50 metra hyli). Bæði venja tey til dagliga í SK Neptun í Stockholm, og rættiliga áhugavert so eru bæði kend fyri at venja rættiliga lítið til dagliga.

Nystrand nevnir í tíðindunum her um sína venjing, at hann venur umleið 3000 metrar í hvørjari venjing, ongantíð meira enn 20 km um vikuna, umframt at venja tvær ferðir um vikuna á landi, eina ferð við medisinbólti og eina ferð vekttrening við fokus á at gerast sterkur uttan at gerast stórur. Hann venur bara lætt ella max í hylinum, og altso ongantíð við ferðum í millum lætt ella max.

Alshammar nevnir ikki nakað um sína venjing í tíðindunum her á SwimNews, annað enn at hon (sum Nystrand) hevur betrað um sín teknikk, og tí svimur við færri tøkum enn nakrantíð fyrr. Men tað er alment kent at hon í øllum førum í Hamburg sjáldan vandi meira enn 2000 metrar í hvørjari venjing, og tí óivað illa kann lokkast at venja nógv meira í Stockholm, um Nystrand ikki svimur meira enn 3000 metrar har.

Lesið upprunatíðindini her og her á SwimNews.

Dara Torres sett USA met í 50 frí, 40 ára gomul

Dara Torres vann OL bronsu 33 ára gomul í Sydney ár 2000, og setur nú amerikanskt met í 50 frí sum 40 ára gomul, við tíðini 24.53 (langbani). Hetta er næstbesta tíð í heiminum í ár, og sama tíð sum Libby Lenton vann HM í Melbourne við í vár. Tíðindini kunnu lesast her á SwimmingWorld, og í longdari útgávu við spekulatión um doping her á SwimNews.

Phelps øgiligur í rygg eisini

Phelps er til nú mest kendur fyri síni úrslit og heimsmet í firvald, crawl og blandað, men hann kann so sanniliga eisini svimja rygg. Á amerikansku meistarastevnuni svam hann herfyri triðbestu tíð nakrantíð í 200 rygg (1:54.65, Ryan Lochte eigur heimsmetið á 1:54.32), og í gjár hótti hann so aftur heimsmetið á einum ryggteini við at svimja næstbestu tíð nakrantíð í 100 rygg (53.01, Aaron Piersol eigur heimsmetið á 52.98). Continue reading Phelps øgiligur í rygg eisini