Arkiv - Jun 2012

Juni 30th

EJM- og NMU-svimjarar komnir til KBH í øllum góðum

Í morgun fóru føroysku liðini avstað til Danmarkar, sum skulu luttaka á EJM í Antwerpen og NMU í Keypmannahavn. Hanna hevur longu fóðra Facebook við myndum og tíðindum, tey eru komin niður og eru svang, hava vist nokk smugla spik við til at klára fyrsta hungurin :-)

EJM-svimjarar klárir til take-off

EJM-liðið skulu longu í morgin víðari til Belgia, at fyri seg til fyrstu kappingar mikudag, meðan NMU-svimjararnir fara í venjingarlegu í Bellahøj fram til fyrstu kappingar har fríggjadag. Samstundis eru Pál og Jón komnir væl uppá pláss í Rijeka í Kroatia, har teir fínpussa tað síðsta áðrenn OL í London. Ein spennandi tíð hjá føroyingum.

Juni 30th

Góð grein um Pál á brasilskum miðli

Lesið hesa grein gjøgnum Google Translate, um tit ikki skilja portugisiskt :-)

'Føroyskur svimjari droymir um at vinna fyrsta gull fyri sítt land

Ein av størstu dreymum hjá einum ítróttarfólki er at sleppa at hoyra tjóðsangin hjá sínum landi verða spældan á olympiska heiðursmerkjapallinum. Hendan dreymin veit Pál Joensen longu at hann kann ikki uppliva. Tó so, so roynir føroyski svimjarin at skriva søgu á olympisku leikunum í London, har hann kann gerast fyrsti íðkari i vinnur sínum oyggjaríki eitt olympiskt heiðursmerki.'

(Foto: Das Büro for Danmarks Idræts-Forbund og Team Danmark)

On-Sport um venjingarumstøðurnar hjá Páli í Vági

Danska ítróttarmiðilin On-Sport hevur verið í Vági og vitjað, har tey ógvast um umstøðurnar hjá Páli Joensen, at venja ímóti OL við spælandi børnum hinumegin banatogið.

Men Pál tekur tað sum ikki einaferð róliga, at tað er tað sum hann er vanur við.

Juni 29th

Fylgið við EJM-liðnum á Facebook

Nú leygarmorgunin fer føroyska juniorlandsliðið úr Føroyum, yvir Keypmannahavn til Antwerpen í Belgia, at luttaka á Evropeisku JuniorMeistarastevnuni í svimjing. Ferðaleiðarin Hanna í Horni hevur stovnað bólkin "EJM Antwerpen 2012" á Facebook, har til ber at fylgja við fyrireikinunum og vælsagtans túrinum, við myndum frá seinast og líknandi. So um tit vilja vera heilt á forkant við hvussu tað gongst teimum har suðuri í Belgia, er tað har tit skulu fylgja við :-)

Juni 27th

Startlistar til NMU 2012

Vikuskiftið 7. og 8. juli verður Norðurlendska Meistarastevnan fyri Ung hildin í Bellahøj í Keypmannahavn, við luttøku av einum rættiliga sterkum føroyskum liði. Fyriskipararnir hava lagt startlistar út her á livetiming.dk, har vit millum annað síggja at Victoria Wigant Eysturdal úr Ægir liggur til gull í 200 og 400 frí og bronsu í 800 frí, Óli Mortensen úr Havnar Svimjifelag til silvur í 400 og 1500 frí og bronsu í 200 frí, Kristina Elin Thomsen úr Suðuroyar Svimjifelag til gull í 50 og 100 firvald, silvur í 200 firvald og bronsu í 100 rygg, og Alvi Hjelm úr Ægir til bronsu í 400 frí. Okkara stafettir burdu eisini verið rættiliga sterkar; so um úrslitið verður bara so nøkulunda sum hatta bendir á, so verður tað klárt besta úrtøka hjá føroyingum nakrantíð á NMU.

4x200frí

(Føroyskar dámur á NMU 2010)

EJM 2012 startlistin sæst nú á netinum

Nú 4. til 8. juli verður árliga evropameistarastevnan fyri juniorar, í býnum Antwerpen í Belgia, við luttøku av 4 ungum føroyingum. Startlistarnir síggjast her, sum ikki óvæntað avdúka at serliga Magnus Jákupsson liggur væl fyri, til at koma í finalu í 50 rygg og hálvfinalu í 50 firvald, umframt at liggja rættiliga nær við hálvfinalu í 100 firvald. Hini trý Heðin L. Olsen, Cecilia Eysturdal og Guðrun Mortensen liggja nærri hinum endanum av startlistanum, tó í heilum væl upp frá botninum,

EJM-liðið 2011

(EJM-liðið í Beograd í fjør. Hópurin er nærum hin sami í ár, tó er Birita nú fallin fyri aldur, og Guðrun komin í staðin)

Rikke Møller Pedersen tosar við Pál í Flagstaff

Eitt prát við Pál Joensen á hæddarleguni í Flagstaff, beint áðrenn tey fóru heim aftur. Pál og Jón eru í morgun á veg avstað aftur, fyrst til Danmarkar í ein dag og so víðari til Rijeka í Kroatia.

Rikke Møller Pedersen roynir OL-klæðini

Ikki eiti á rúgvi av klæðum og 'accessories', frá medaljubúna til ballkjóla og oyraringar. Handan taskan sær út sum um at tey fara at hava eitt sindur av yvirvekt á flúgvaranum.

Juni 21st

Stór grein um Pál í Idrætsliv: OL Special 2012

Hygga síggj, danir hava avsett 2 av 52 síðum til Pál í nýútkomna Idrætsliv: OL Special 2012, sum er blaðið hjá danska ítróttarsambandinum. Og stavað navnið rætt ! :-)

"I en svømmehal i en færøsk bygd med 1.200 indbyggere pisker en OL-svømmer med reelle medaljechancer rundt i bassinet. Pál Joensen, so ved OL stiller op under dansk flag, er mod al sund fornuft blevet en af verdens bedste svømmere og naturligvis nationalhelt på Færøerne"

 OL Special 2012

Juni 20th

David Carry 3:46.86 í 400 frí og við á bretska OL-liðnum

David Carry30-ára gamli kvart-føroyski skotin David Carry hevur í dag kvalifiserað seg til OL í London, tá ið hann á British Gas ASA National Championships í Sheffield vann finaluna í 400 metra frísvimjing, við 3:46.86 har OL-kravtíðin er 3:48.92. Hetta var síðsti kjansur hjá honum at kvalifisera seg, eftir at hava verið bara 0.23 sekund frá kravtíðini á British Trials í mars mánaða. Besta tíð hjá honum áðrenn hetta var 3:47.17 frá sjálvum OL í Beijing í 2008, og hetta verður so triðja OL hjá honum fyri Stórabretland. Carry er ættaður úr Klaksvík, sigst.