Stór avbjóðing hjá Páli í Rio

Altjóða svimjisambandið FINA hevur nú kunngjørt startlistarnar til OL í Rio, har Pál sum kunnugt skal royna seg í 1500 metra frísvimjing. Og latum okkum heldur bara staðfesta beinanvegin, at kappingin verður sera hørð, um at sleppa í finaluna.

Teir eru 20 við tilmeldingartíð undir 15 minuttir

  1. 14:34.04 Gregorio Paltrinieri, Italia
  2. 14:39.54 Mack Horton, Australia
  3. 14:41.20 Connor Jaeger, USA
  4. 14:46.48 Gabriele Detti, Italia
  5. 14:48.60 Jack McLoughlin, Australia
  6. 14:49.19 Jordan Wilimovsky, USA
  7. 14:50.33 Mykhailo Romanchuk, Ukraina
  8. 14:51.08 Ryan Cochrane, Kanada
  9. 14:53.66 Mahmoud Akaram, Egyptaland
  10. 14:53.77 Henrik Christiansen, Noreg
  11. 14:54.55 Gergely Gyurta, Ungarn
  12. 14:55.11 Sun Yang, Kina
  13. 14:55.17 Stephen Milne, Stórabretland
  14. 14:55.23 Tim Shuttleworth, Stórabretland
  15. 14:55.49 Florian Wellbrock, Týskaland
  16. 14:56.13 Damien Joly
  17. 14:58.34 Qiu Ziao, Kina
  18. 14:58.52 Pál Joensen, Danmark
  19. 14:58.62 Jan Micka, Kekkia
  20. 14:59.66 Wojdak Wojciech, Pólland

Tíðin hjá Páli er frá innleiðandi riðlunum á HM í Kazan í fjør, har hann sum kunnugt akkurát ikki slapp í finaluna. Besta tíð hjá honum nakrantíð er hansara norðurlendska met á 14:46.33, frá HM í Shanghai í 2011, og annars hevur hann svomið 14:50.66 tá ið hann vann silvur á EM í Berlin í 2014, 14:56.66 í innleiðandi á HM í Shanghai í 2011, og 14:56.90 tá ið hann vann silvur á EM í Budapest í 2010.

So her er eingin ivi um at hann má svimja upp til sítt allarbesta, fyri at kunna náa finaluna í Rio. Tíðirnar hjá restini eru vælsagtans allar frá hesum farna árinum, ella har á leið, og hinumegin 15 minuttir eru aðrir kendir menn sum t.d. bronsuvinnarin frá OL í 2012, Oussama Mellouli.

Tað sleppa 8 í finaluna, sum verður leygarkvøldið 13. august 2016. Innleiðandi riðlarnir eru fríggjadagin hin 12. august.

Rio Olympics photo
Photo by Around the rings1992

Ger viðmerking