Darren Mew er hin stóra stjørnan á Isle of Wight

Hóast hann við sínum 31 árum væl er við at vera liðugur sum úrvalssvimjari, so er Darren Mew ikki at kimsa at, tá ið tað kemur til bringusvimjing á Isle of Wight. Hann eigur enn bretsku metini í 50 bringusvimjing á lang- og stuttgeil, ávíkavist 27.44 og 26.72, og oyggjaleikametini í 50 og 100 metra bringusvimjing, 28.25 og 1:02.99 frá leikunum á Isle of Wight í 1997.

Hann luttók á olympisku leikum í Sydney 2000 og Athen 2004, har hann í Sydney rakk finalu sum partur av brestu 4×100 blandað stafettini, og í Athen sum 100 metra bringusvimjari. Hann hevur luttikið á HM í 1998, 1999, 2000, 2001, 2003, 2005, 2007 og 2008, har hann tilsamans rakk 7 finalum og vann 2 bronsuheiðursmerki. Commonwealth Games í 1998, 2002 og 2002, har hann rakk 6 finalum og vann 2 silvur og 2 bronsu. EM í 1998, 1999, 2000, 2001, 2002, 2006 og 2009, har hann rakk 14 finalum og vann 1 silvur og 6 bronsu. Og sum hann sigur her á sínari heimasíðu, so slapp hann at møta Princess Anne í 1997 🙂

Mew fer at svimja í øllum førum 50 og 100 metra bringusvimjing á Isle of Wight, har føroyska kappingin í 50 metra bringusvimjing verður Pauli Øssursson Mohr, og í 100 metra bringusvimjing Pál Joensen og Pauli Ø. Mohr. Um vit hyggja at SwimRankings, so sær tað út til at hann fyribils hevur tikið sær av løttum í 2011, við tað at har bara eru 3 úrslit í 2011, harav bestu úrslit eru 29.64 í 50 bringu og 1:03.72 í 100 bringu. Í 2010 svam hann eitt sindur oftari, av eini og hvørjari orsøk bara á langgeil, við imponerandi tíðum 28.93 í 50 bringu og 1:03.16 í 100 bringu. Og fara vit aftur til 2009, so verður tað sovorðið óhugnaligt sum (stuttgeilatíðir) 26.76 í 50 bringu og 58.87 í 100 bringu.

Her verður futtur í, í bringusvimjingini, tá ið Mew skal verja æruna heima á Isle of Wight.

Ger viðmerking

This site uses Akismet to reduce spam. Learn how your comment data is processed.